އުމްރާއިން އައުމަށްފަހު ބަލިތަކުން ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފި

މި އަހަރުގެ ފުރަތަމަ ޓާމުގެ ސްކޫލު ބަންދާ ދިމާކޮށް އުމްރާގެ އަޅުކަން އަދާކުރުމަށްފަހު އެނބުރި އަންނަ ފަރާތްތަކުން ބަލިތަކުން ރައްކާތެރިވުމަށް ޚާއްސަ ސަމާލުކަމެއް ދިނުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެގޮތުން އުމްރާއިން އެނބުރި އަންނަ ފަރާތްތަކަށް އަމާޒުކޮށް އެޗްޕީއޭއިން ވަނީ ރައްކާތެރިކަމުގެ 8 ފިޔަވަޅެއް ހިއްސާކޮށްފައެވެ. އޭގެ ތެރޭގައި އަރިދަފުސް ރޯގާ ޖެހިއްޖެނަމަ ކެއްސާ ކިނބިހި އަޅާއިރު އަނގަމައްޗާއި ނޭފަތް ނިވާކުރުމާއި، ބޭނުންކުރާ ޓިޝޫ ފަދަ ތަކެތި ރައްކާތެރި ގޮތުގައި ނައްތާލުން ހިމެނެއެވެ. އަދި ގިނަގިނައިން ސައިބޯނި ލައިގެން އަތް ދޮވުމަށާއި، ދަތުރުމަތީގައާއި އުމްރާގެ އަޅުކަމުގައި އުޅޭއިރު މާސްކު އެޅުމަށްވެސް ވަނީ އިރުޝާދު ދީފައެވެ.

މީގެއިތުރުން، ރޯގާ ޖެހި ކެއްސާނަމަ މީހުން އެއްވެ އުޅޭ ތަންތަނަށް ނުދިއުމަށާއި، ކުޑަކުދިން ކައިރިއަށް ނުދިއުމަށް އެޗްޕީއޭއިން ބާރުއަޅައެވެ. "އުމްރާއިން އެނބުރި އަންނަތާ 14 ދުވަސް ތެރޭގައި އެއްވެސް ބައްޔެއްގެ އަލާމާތެއް ފެންނަނަމަ ލަސްނުކޮށް ޑޮކްޓަރެއްގެ މަޝްވަރާ ހޯދަންވާނެ،" އެޗްޕީއޭއިން ބުނެފައިވެއެވެ. ޑޮކްޓަރަށް ދައްކާއިރު އެއީ އުމްރާއިން އެނބުރި އައި މީހެއްކަން ބުނެދިނުމަކީވެސް ވަރަށް މުހިންމު ކަމެކެވެ.

ހުން އަދި އަރިދަފުސް ރޯގާ ޖެހިއްޖެނަމަ ގޭގައި ތިބެގެން ފަރުވާ ހޯދޭނެ ގޮތްތައްވެސް އެޗްޕީއޭއިން ވަނީ ހިއްސާކޮށްފައެވެ. އެގޮތުން ގިނަގިނައިން ދިޔާތަކެތި ބޭނުންކުރުމާއި، ފުރިހަމައަށް އަރާމުކުރުމުގެ އިތުރުން، ހުން ގަދަނަމަ ގައިގައި ފެންހޭކުމަށް ވަނީ ލަފާދީފައެވެ. އަދި ޕެރެސެޓަމޯލް ފިޔަވައި އެހެން އެއްވެސް ބޭހެއް ޑޮކްޓަރުގެ މަޝްވަރާއާ ނުލައި ބޭނުން ނުކުރުމަށް ވަނީ އިލްތިމާސްކޮށްފައެވެ.

ރާއްޖެއިން އުމްރާގެ މަތިވެރި އަޅުކަން އަދާކުރަންދާ މީހުންގެ އަދަދު ފަހަކަށް އައިސް ވަނީ ވަރަށް ބޮޑަށް އިތުރުވެފައެވެ. ޚާއްސަކޮށް ސްކޫލު ޗުއްޓީއާއި ރަމަޟާން މަހު ދާ މީހުން ގިނަކަން ފާހަގަކުރެވެއެވެ. ތަފާސްހިސާބުތަކުން ދައްކާ ގޮތުގައި މިދިޔަ މަހު އެކަނިވެސް އެކި ޖަމާޢަތްތަކުގައި 5,000 އަށްވުރެ ގިނަ ދިވެހިން ވަނީ އުމްރާއަށް ގޮސްފައެވެ.