ރަތަފަންދޫ ބަނދަރު މަޝްރޫއުގެ 18 އިންސައްތަ ނިމިއްޖެ

ގދ. ރަތަފަންދޫ ބަނދަރު ތަރައްގީކުރުމުގެ މަޝްރޫއުގެ 18 އިންސައްތަ ނިމިފައިވާ ކަމަށް، ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ. މިއީ ސަރުކާރުން ހެވީފޯސް ޕްރައިވެޓް ލިމިޓެޑްއާ ހަވާލުކޮށްގެން ކުރިއަށްގެންދާ  މަޝްރޫއެކެވެ.

މިކަން ހާމަކުރައްވާ އެކްސްގައި ކުރެއްވި ޕޯސްޓެއްގައި އެ އިދާރާއިން ވިދާޅުވީ މި މަޝްރޫއުގެ ދަށުން މިހާރު ރިއަށްދަނީ ބަނދަރު ފުންކުރުމުގެ މަސައްކަތުގެ އިތުރުން އެއްގަމު ތޮށީގެ މަސައްކަތް ކަމަށެވެ.

މި މަޝްރޫއުގެ އަމަލީ މަސައްކަތް ފަށާފައި ވަނީ މި އަހަރުގެ މާރިޗު  މަހުގެ ތެރޭގައެވެ. އަމަލި  މަސައްކަތް ފަށްޓަވައިދެއްވީ، އެކަމަށްޓަކައި ބޭއްވި ހާއްސަ  ރަސްމިއްޔާތެއްގައި އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބްއެވެ.

އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ވަނީ، މި މަޝްރޫއުގެ ދަށުން، 905  ފޫޓު ދިގު އަދި 300 ފޫޓު ފުޅާ ބަނދަރެއް ހެދުމަށް ހަމަޖެހިފައިވާ ކަމަށް ވިދާޅުވެފައެވެ.  އެގޮތުން، 70 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމެންޓް ޖެހުމާއި، 40 މީޓަރުގެ ސަރަހައްދެއްގައި ގްރޮއިން ޖެހުމާއި، 280 މީޓަރުގެ ސަރަހައްދެއްގައި ބޮޑު ހިލައިގެ ބޭރުތޮށި ޖެހުމުގެ މަސައްކަތް ކުރިއަށްދާނެއެވެ.

ގދ. ރަތަފަންދޫ ބަނދަރު ތަރައްޤީކުރުމުގެ މަޝްރޫޢު pic.twitter.com/r2bXKXnRwt

— Ministry of Infrastructure, Housing and Urban Dev. (@MIHUDmv) August 6, 2026

މީގެ އިތުރުން، 2 ނެވިގޭޝަން ލައިޓު ހަރުކުރުމާއި، 464 މީޓަރުގެ ސަރަހައްދެއްގައި އެއްގަމު ތޮށި ޖެހުމާއި، އެއްގަމު ތޮށި ވަށައިގެން ޕޭވްމަންޓް އެޅުމަށް ހަމަޖެހިފައިވާކަމަށް އެ ވުޒާރާއިން މައުލޫމާތުދެއެވެ.

ރަތަފަންދޫ ބަނދަރު ތަރައްގީކުރުމުގެ މަޝްރޫއުގެ މަސައްކަތް ނިމުމާއެކު، އެ ރަށުގެ ލަފާފުރުމުގެ މައްސަލައަށް ބޮޑެތި ފަސޭހަތަކެއް ލިބިގެންދާނެއެވެ. އަދި މިއީ ސަރުކާރުން އެ ރަށުގެ ރައްޔިތުންނަށް ދިމާވެފައިވާ ދަތިތައް ހައްލުކުރުމަށް ކުރިއަށްގެންދަވާ މުހިންމު މަޝްރޫއެއްކަން ފާހަގަކޮށްލެވެއެވެ.