ކްރޫޒްލައިނާތަކުން ރާއްޖެއަށް 15،500 އަށްވުރެ ގިނަ ފަތުރުވެރިން ޒިޔާރަތްކޮށްފި

މިއަހަރުގެ މިހާތަނަށް ކްރޫޒްލައިނާތަކުގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު، މިދިޔަ އަހަރުގެ މި މުއްދަތާ އަޅާބަލާއިރު ވަރަށް ބޮޑަށް އިތުރުވެފައިވާކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ އެންމެފަހުގެ ރިޕޯޓުތަކަށް ބަލާއިރު، މިއަހަރުގެ މިހާތަނަށް ކްރޫޒްލައިނާތަކުގައި ޖުމްލަ 15,577 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތުގައި ކްރޫޒްލައިނާތަކުން އައި 8,263 ފަތުރުވެރިންނާ އަޅާބަލާއިރު 89 އިންސައްތައިގެ ބޮޑު ކުރިއެރުމެކެވެ.

ތަފާސްހިސާބުތައް ދައްކާގޮތުން، ކްރޫޒްލައިނާތަކުން އެންމެ ގިނަ ފަތުރުވެރިން ރާއްޖެ އައިސްފައިވަނީ މިއަހަރުގެ ފެބްރުއަރީ މަހުގައެވެ. އެ މަހު 5,237 ފަތުރުވެރިން ޒިޔާރަތްކުރިއިރު، މާރިޗް މަހު 4,049 ފަތުރުވެރިން އަދި އޭޕްރިލް މަހު 3,457 ފަތުރުވެރިން ކްރޫޒްލައިނާތަކުން ރާއްޖެ އައިސްފައިވެއެވެ. މީގެ ތެރެއިން އެންމެ ގިނަ ފަތުރުވެރިން އައިސްފައިވަނީ ފްރާންސް އިންނެވެ.

ކްރޫޒްލައިނާތަކުން އަންނަ ފަތުރުވެރިންގެ އަދަދު އިތުރުވި ނަމަވެސް، ވައިގެ މަގުން ރާއްޖެ އަންނަ ފަތުރުވެރިންގެ އަދަދު ވަނީ މިދިޔަ އަހަރާ އަޅާބަލާއިރު 4.5 އިންސައްތަ ދަށްވެފައެވެ. މިއަހަރުގެ މިހާތަނަށް މުޅި ޖުމްލަ 1,281,360 (1.2 މިލިއަން) ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މީގެ ތެރެއިން ވައިގެ މަގުން އައިސްފައިވަނީ 1,265,783 ފަތުރުވެރިންނެވެ.

ރާއްޖެއަށް މިހާރު އެންމެ ގިނައިން ފަތުރުވެރިން ޒިޔާރަތްކުރާ ގައުމުތަކުގެ ތެރޭގައި ހިމެނެނީ:

• ޗައިނާ: 224,107 ފަތުރުވެރިން
• ރަޝިއާ: 183,969 ފަތުރުވެރިން
• އިނގިރޭސިވިލާތް: 99,286 ފަތުރުވެރިން
• އިޓަލީވިލާތް: 81,144 ފަތުރުވެރިން
• ޖަރުމަނުވިލާތް: 78,046 ފަތުރުވެރިން
• އިނގިރޭސިވިލާތުން އަންނަ ފަތުރުވެރިންގެ އަދަދު 19 އިންސައްތަ ދަށްވެފައިވީ ނަމަވެސް، އެ ގައުމަކީ އަދިވެސް ރާއްޖޭގެ ފަތުރުވެރިކަމުގެ ތިންވަނަ މާކެޓެވެ.

ފަތުރުވެރިން ރާއްޖޭގައި ޗުއްޓީ ހޭދަކުރާ ތަންތަނަށް ބަލާއިރު، އެންމެ ގިނަ ބަޔަކު އިޚްތިޔާރުކޮށްފައިވަނީ ރިސޯޓުތަކެވެ. އެގޮތުން 917,305 ފަތުރުވެރިން ރިސޯޓުތަކުގައި ޗުއްޓީ ހޭދަކުރިއިރު، 281,633 ފަތުރުވެރިން ގެސްޓްހައުސްތަކުގައި، 29,852 ފަތުރުވެރިން ހޮޓާތަކުގައި އަދި 23,729 ފަތުރުވެރިން ސަފާރީތަކުގައި ޗުއްޓީ ހޭދަކޮށްފައިވާކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައެވެ.

ކްރޫޒްލައިނާ ފަތުރުވެރިކަން ކުރިއަރަމުން އަންނައިރު، މިއީ ރާއްޖޭގެ އިގްތިސާދަށް ލިބޭ ބޮޑު ކުރިއެރުމެއްގެ ގޮތުގައި ދާއިރާގެ މާހިރުން ފާހަގަކުރެއެވެ.