އޭވިއޭޝަން އިންސްޓިޓިއުޓާއެކު ދާއިރާއަށް ބޭނުންވާ ގާބިލު މީހުން ބިނާކުރުން ހަލުވިވާނެ: އިބްރާހީމް ޝަރީފް

އޭވިއޭޝަން އިންސްޓިޓިއުޓް އޮފް މޯލްޑިވްސް (އެއިމް) ގެ ސަބަބުން ރާއްޖޭގެ އޭވިއޭޝަން ދާއިރާއަށް ބޭނުންވާ ގާބިލު މީހުން ބިނާކުރުމަށް ކުރެވޭ މަސައްކަތްތައް އިތުރަށް ހަލުވިވެގެންދާނެ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދު ވިދާޅުވެއްޖެއެވެ.

ޝަރީފް މިހެން ވިދާޅުވީ މިއަދު ހުޅުލޭ އައިލެންޑް ހޮޓެލްގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތަކީ އޭވިއޭޝަން އިންސްޓިޓިއުޓް ރަސްމީކޮށް އިފްތިތާހުކުރުމާއި، އެ އިންސްޓިޓިއުޓްގެ ފުރަތަމަ ދަސްވެނިވުން ފާހަގަކުރުމަށް ބޭއްވި ބައްދަލުވުމެކެވެ.

މި ރަސްމިއްޔާތުގައި ވާހަކަފުޅު ދައްކަވަމުން ޝަރީފް ފާހަގަކުރެއްވި ގޮތުގައި، އެމްއޭސީއެލްގެ ކުރިއެރުން ބިނާވެފައިވަނީ މެދުކެނޑުމެއްނެތި ތަރައްގީވަމުން އަންނަ، ގާބިލު މަސައްކަތްތެރި މުވައްޒަފުންގެ މައްޗަށެވެ. އަދި މި އިންސްޓިޓިއުޓް ގާއިމުކުރުމުގެ މައިގަނޑު މަގުސަދަކީ އެމްއޭސީއެލްގެ މުވައްޒަފުންނަށް ބޭނުންވާ ތަމްރީނުތައް ފޯރުކޮށްދީ، ހަމަޖެހިފައިވާ އޮނިގަނޑެއްގެ ތެރެއިން ސަނަދު ހާސިލުކޮށްގެން ވަޒީފާގެ ކުރިއެރުން ހޯދައިދިނުން ކަމަށް އޭނާ ވިދާޅުވިއެވެ.

މިއަދުގެ ރަސްމިއްޔާތުގައި އޭވިއޭޝަން އިންސްޓިޓިއުޓްގެ ފުރަތަމަ ބެޗުގެ ދަރިވަރުން ވަނީ ދަސްވެނިވެފައެވެ. އެގޮތުން ސެޓްފިކެޓް ލެވެލް 3 އިން 'އެއަރޕޯޓް ސެކިއުރިޓީ މެނޭޖްމަންޓް' ކޯސް ފުރިހަމަކުރި 29 ދަރިވަރަކަށް ވަނީ ސެޓްފިކެޓް ހަވާލުކޮށްފައެވެ.

ރަސްމިއްޔާތު ނިންމަވާލައްވަމުން ސީއީއޯ އިބްރާހީމް ޝަރީފް ވަނީ ދަސްވެނިވި ހުރިހާ ދަރިވަރުންނަށް މަރުހަބާ ދަންނަވާފައެވެ. އަދި އެމްއޭސީއެލްގެ އެންމެހައި މުވައްޒަފުންވެސް މި އިންސްޓިޓިއުޓް މެދުވެރިކޮށް ހުޅުވިފައިވާ ތައުލީމާއި ތަމްރީނުގެ ފުރުސަތުތަކުގެ ބޭނުން އެންމެ ހެޔޮގޮތުގައި ހިފުމަށް އޭނާ ވަނީ އިލްތިމާސް ކުރައްވާފައެވެ.