އުތީމުގައި ބިނާކުރި "ބޮޑުތަކުރުފާނުގެ ހަދާނީ ދޮރާށި" މިއަހަރުގެ ގައުމީ ދުވަހު ހުޅުވަނީ

އުތީމު ތިންބެއިންގެ ޒިކުރާ އާލާކުރުމުގެ ގޮތުން އެ ރަށުގައި ސަރުކާރުން ގާއިމުކުރި "ބޮޑުތަކުރުފާނުގެ ހަދާނީ ދޮރާށި" މިއަހަރުގެ ގައުމީ ދުވަހުގެ މުނާސަބަތުގައި ރަސްމީކޮށް ހުޅުވުމަށް ނިންމައިފައިވާކަމަށް ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.

މިއަހަރުގެ ގައުމީ ދުވަހުގެ ރަސްމީ ހަރަކާތްތައް ބޭއްވުމަށް ހަމަޖެހިފައިވަނީ އުތީމުގައެވެ. މިކަމާ ގުޅޭގޮތުން ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބިންގާ އަޅުއްވައިދެއްވި މި ދޮރާށި ހުޅުވުމަކީ ގައުމީ ދުވަހުގެ ހަރަކާތްތަކުގެ ތެރެއިން ހިމެނޭ ވަރަށް މުހިންމު ކަމެއް ކަމަށެވެ.

"މީގެކުރިން ރައީސުލްޖުމްހޫރިއްޔާ ޑރ، މުހައްމަދު މުއިއްޒު ބިންގާ އަޅުއްވައިދެއްވި ބޮޑުތަކުރުފާނުގެ ހަދާނީ ދޮރާށި ރަސްމީކޮށް ހުޅުވުން އޮންނާނެ." 

ހީނާ ވިދާޅުވިއެވެ.

ހީނާ ފާހަގަކުރެއްވި ގޮތުގައި، މި ދޮރާށި ބިނާކޮށްފައިވަނީ އުތީމު ތިންބެއިންގެ ހަނދާނުގައެވެ. އަދި އުތީމު ބަނދަރު ސަރަހައްދުގައި ކަޅުއޮށްފުންމި ފަރުމާކޮށްފައިވާ ނަކަލެއް ބަހައްޓާފައިވާއިރު، މި ދޮރާށި ހުޅުވިގެންދިޔުމުން އެ ސަރަހައްދުން ބޮޑުތަކުރުފާނުގެ އާސާރުތަކާއި ހަނދާންތައް ވަރަށް ފުރިހަމައަށް ފެނިގެންދާނެއެވެ.

ގައުމީ ދުވަހުގެ މުހިންމު ހަރަކާތްތައް:

• ހުކުރު ދުވަހުގެ ހެނދުނު: ގައުމީ ދިދަ ނެގުމުގެ ރަސްމިއްޔާތު.
• މިމަހުގެ 15 ވަނަ ދުވަސް: ގައުމީ ދުވަހުގެ ރަސްމީ ޖަލްސާ.
• "ބޮޑުތަކުރުފާނުގެ ހަދާނީ ދޮރާށި" އިފްތިތާހުކުރުން.
• "ވާހަކަ ވާ" (ސްޓޯރީ ފޯރެސްޓް) ހުޅުވުން.

ދޮރާށީގެ އިތުރުން، އުތީމު ކަނދުވަލު މިސްކިތް ކައިރީގައި ތަރައްގީކޮށްފައިވާ "ވާހަކަ ވާ" ނުވަތަ ސްޓޯރީ ފޯރެސްޓަކީވެސް މި ދުވަހު ހުޅުވުމަށް ހަމަޖެހިފައިވާ ހިތްފަސޭހަ ބިނާއެކެވެ. ވަޒީރު ވިދާޅުވި ގޮތުގައި މިތަން ފަރުމާކޮށްފައިވަނީ ހިނގާލުމެއްގެ ތެރެއިން ބޮޑުތަކުރުފާނުގެ ތާރީޚީ ވާހަކަތައް ކިޔާލެވޭނެ ގޮތަށެވެ. މީގެއިތުރުން ކަނދުވަލު މިސްކިތުގެ އާބާތުރަ ފިލުވައި، ލައިޓް ހަރުކޮށް، ވެވުގެ މަސައްކަތްތައްވެސް މިހާރު ވަނީ ނިންމާލާފައެވެ.

މީގެއިތުރުން، އުތީމު ގަނޑުވަރުގެ އާބާތުރަ ފިލުވުމާއި ބޮޑު ދިދަ މަރާމާތުކުރުމުގެ މަސައްކަތްވެސް އުތީމު ކައުންސިލާ ގުޅިގެން މިނިސްޓްރީން ދަނީ ކުރަމުންނެވެ. ގައުމީ ދުވަހުގެ މި ހަރަކާތްތަކަށް އުތީމަށް ވަރަށް ގިނަ ބަޔަކު ޒިޔާރަތްކުރާނެ ކަމަށް ބެލެވޭއިރު، އެ ރަށުގައި މިހާރު ދަނީ އެންމެ ފަހުގެ ތައްޔާރީތައް ވަމުންނެވެ.