ހޭނައްތާ ޑޮކްޓަރުންގެ 15 ވަނަ ސަރަހައްދީ ބައްދަލުވުން ރާއްޖޭގައި ބާއްވައިފި

ދެކުނު އޭޝިއާ ސަރަހައްދުގެ، ހޭނައްތާ ޑޮކްޓަރުންގެ 15 ވަނަ ސަރަހައްދީ ބައްދަލުވުން ރާއްޖޭގައި ފުރަތަމަ ފަހަރަށް ބާއްވައިފިއެވެ.

މި ބައްދަލުވުން ބާއްވާފައި ވަނީ، އއ. އުކުޅަހުގައެވެ. ބައްދަލުވުން ކުރިއަށް ގޮސްފައި ވަނީ މި މަހުގެ 15-16 އަށް ކަމަށް ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއިން ވިދާޅުވެއެވެ. 

ރާއްޖޭގެ ހޭނައްތާ ޑޮކްޓަރުންގެ  ޖަމިއްޔާ (MAA) އާއި ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއިން ގުޅިގެން ބޭއްވި މި ބައްދަލުވުމުގައި ޖުމްލަ 220 ފަރާތަކުން ވަނީ ބައިވެރިވެފައެވެ. އޭގެ ތެރޭގައި،  އޭގެތެރެއިން ސާކްގެ އެކި ގައުމުތަކުގެ އެނެސްތީސިއޮލޮޖީ ދާއިރާގެ 190 ތަޖުރިބާކާރުން ހިމެނެއެވެ.

އެގޮތުން، އިންޑިޔާ، ޕާކިސްތާން، ބޫޓާން، ސްރީލަންކާ، ނޭޕާލް ފަދަ ގައުމުތަކުގައި ފާހަގަކޮށްލެވޭ ސްޕެޝަލިސްޓް ޑޮކްޓަރުންނާއި، ސިއްޙީ ޚިދުމަތްތެރިންނާއި، ކީނޯޓް ސްޕީކާރސް ވަނީ މި ކޮންފަރެންސްގައި ބައިވެރިވެފައެވެ.

ދެ ދުވަހުގެ މުއްދަތައް ކުރިއަށް ދިޔަ ކޮންފަރެންސްގައި އެނެސްތީޝިއޮލޮޖީ ދައިރާގެ އެންމެ ފަހުގެ ދިރާސާތަކާއި ގުޅޭ މައުލޫމާތު ހިއްސާކޮށްފައިވެއެވެ. އަދި ރާއްޖޭގައި  މިދާއިރާއިން ކިޔެވުމަށް ހުރި ފުރުސަތުތަކާއި، ކްލިނިކަލް ތަޖުރިބާ، ރިސާރޗާއި، މައުލޫމާތާއި ތަޖުރިބާތައް ހިއްސާކޮށްފައިވެއެވެ. 

Maldives hosts the 15th International Scientific Congress of Anaesthesiologists (SAARC-AA 2026) in Maldives. 🇲🇻

The Congress brings together regional expertise to advance anaesthesia standards, strengthen collaboration, and promote excellence in healthcare across the SAARC… pic.twitter.com/erPrgfmG2o

— Ministry of Health, Family and Welfare (@MoHmv) August 16, 2026

މީގެ އިތުރުން، މި ދާއިރާ އިތުރަށް ތަރައްގީކުރުމަށް، ހުރިހާ ގައުމުތަކުން ގުޅިގެން ކުރެވިދާނެ މުހިންމު މަސައްކަތްތަކުގެ މައްޗަށް އަލިއަޅުވާލާފައިވެއެވެ.

އަދި، މި ސަރަހައްދުގެ ސްޕެޝަލިސްޓުން މި ދާއިރާ ތަރައްގީކޮށް ކުރިއެރުވުމަށް ޕްރޮފެޝަނަލް ނެޓްވޯކްތައް ބިނާކުރުމާއި، އެކި ޤައުމުތަކުގެ ބެސްޓް ޕްރެކްޓިސްތައް ދެނެގަތުމާއި ފުރުޞަތުތައް ހޯދުންމަކީ ވެސް މި ބައްދަލުވުމުގެ މުހިންމު މަގްސަދެކެވެ.