ސައިޓޯޓޮކްސިކް ކުނި ރައްކާތެރިކަމާއެކު މެނޭޖުކުރުމަށް މުހިންމު ފިޔަވަޅެއް އަޅައިފި

ދިވެހިރާއްޖޭގައި ސައިޓޯޓޮކްސިކް ކުނި ނުވަތަ ސިއްހީ ގޮތުން އުފެދޭ ނުރައްކާތެރި ކުނި ރައްކާތެރިކަމާއެކު މެނޭޖުކުރުމުގެ ގޮތުން މުހިންމު ފިޔަވަޅެއް އަޅައިފައިވާ ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ވިދާޅުވެއްޖެއެވެ.

އެގޮތުން، މިފަދަ ކުނި ނައްތާލުމަށާއި، ރައްކާކުރުމަށް ހާއްސަ ފެސިލިޓީއެއް ޤާއިމުކޮށް ހިންގުމަށް ޓަކައި، ތިމާވެށްޓާއި ބެހޭ ވުޒާރާއާއި، އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ ދެމެދު ވަނީ ފަހުމުނާމާއެއްގައި ސޮއިކޮށްފައި ކަމަށް ތިމާވެއްޓާއި ބެހޭ ވުޒާރާއިން ވިދާޅުވެއެވެ.

މި ފެސިލިޓީ ޤާއިމުކުރެވުމުން، ކެންސަރު ބައްޔަށް ދެވޭ ފަރުވާއެއް ކަމަށްވާ ކީމޯތެރަޕީގެ ސަބަބުން އުފެދޭ ނުރައްކާތެރި ކުނި އެކަށީގެންވާ ގޮތެއްގައި މެނޭޖުކުރުމަށް ރާއްޖެއަށް ފުރިހަމަ ހައްލެއް ލިބިގެންދާނެ ކަމަށް ތިމާވެއްޓައި ބެހޭ ވުޒާރާއިން ވިދާޅުވެއެވެ. 

މީގެ އިތުރުން، މި ފެސިލިޓީގެ ސަބަބުން، ސިއްހީ ދާއިރާގައި މަސައްކަތްކުރާ ފަރާތްތަކާއި، ކުނި އުކާލުމުގައި ހަރަކާތްތެރިވާ މުވައްޒަފުންނާއި، އާންމު ރައްޔިތުންނަށް ސައިޓޯޓޮކްސިކް ކުނީގެ ސަބަބުން ކުރިމަތިވެދާނެ ސިއްހީ ނުރައްކާތަކުން ރައްކާތެރިކޮށްދިނުމަށް ބޮޑު އެހީތެރިކަމެއް ލިބިގެންދާނެ ކަމަށް އެ ވުޒާރާއިން ވިދާޅުވެއެވެ.

އަދި ހަމައެހެންމެ، ރާއްޖޭގެ ނާޒުކު ތިމާވެއްޓަށް ވެސް ސައިޓޯޓޮކްސިކް ކުނީގެ ސަބަބުން ދިމާވާ ނުރައްކާތަކުން ސަލާމަތްކުރުމަށް ބޮޑު އެހީތެރިކަމެއް މީގެ ސަބަބުން ލިބިގެންދާނެ ކަމަށް އެ ވުޒާރާއިން ވިދާޅުވެއެވެ.

A major step towards safer management of cytotoxic waste in Maldives.
Ministry of Climate Change, Environment and Energy, @aeh_mv and @WAMCOmv signed a tripartite MoU to establish and operationalise a cytotoxic waste treatment and storage facility.

The facility will provide a… pic.twitter.com/W2mBZAT55F

— Min. of Climate Change, Environment and Energy, MV (@MoEnvmv) August 19, 2026

މި މުހިންމު މަސައްކަތަކީ 'ގްލޯބަލް އެންވަޔަރަންމަންޓް ފެސިލިޓީ' (ޖީ.އީ.އެފް) ގެ މާލީ އެހީތެރިކަމާއެކު، 'ރިވިއު އެންޑް އަޕްޑޭޓް އޮފް ދަ ނޭޝަނަލް އިމްޕްލިމެންޓޭޝަން ޕްލޭން ފޯ ދަ ސްޓޮކްހޯމް ކޮންވެންޝަން އޮން ޕާސިސްޓަންޓް އޯގަނިކް ޕޮލިއުޓަންޓްސް އިން މޯލްޑިވްސް' މަޝްރޫއުގެ ދަށުން ކުރިއަށްގެންދާ ހަރަކާތެއް ކަމަށް ތިމާވެއްޓާއި ބެހޭ ވުޒާރާއިން ވިދާޅުވެއެވެ. އަދި ފުރިހަމަކަމާއެކު މި މަސައްކަތް ކުރިއަށްގެންދިއުމުގައި 'އެލިމިނޭޓިންގް ޕީ.އޯ.ޕީސް ތްރޫ ސައުންޑް މެނޭޖްމަންޓް އޮފް ކެމިކަލްސް' މަޝްރޫއުގެ ފަންނީ އެހީތެރިކަން ލިބެމިންދާ ކަމަށް އެ ވުޒާރާއިން ވިދާޅުވެއެވެ.

މި އެއްބަސްވުމަކީ ރާއްޖޭގެ ސިއްހީ ނިޒާމާއި ކުނި މެނޭޖުކުރުމުގެ ނިޒާމު އިތުރަށް ހަރުދަނާކޮށް، ދެމެހެއްޓެނިވި ގޮތެއްގައި ތިމާވެށި ހިމާޔަތްކުރުމަށް އެޅުނު މުހިންމު ފިޔަވަޅެއް ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ވިދާޅުވެއެވެ.