ދަރަނި ދެއްކުމުގެ ގާބިލުކަން އިތުރުކުރުމަށް އެސްޑީއެފަށް ޖަމާކުރި އަދަދު 1.3 ބިލިއަން ރުފިޔާއަށް އަރައިފި

ދިވެހި ދައުލަތުން ނަގާފައިވާ ބޮޑެތި ލޯނުތަކާއި މާލީ އިލްތިޒާމްތައް ފަސޭހަކަމާއެކު އަދާކުރުމުގެ މަގުސަދުގައި ގާއިމުކޮށްފައިވާ ސޮވެރިން ޑިވެލޮޕްމަންޓް ފަންޑު (އެސްޑީއެފް) އަށް މިއަހަރުގެ މިހާތަނަށް 1.38 ބިލިއަން ރުފިޔާ ޖަމާކޮށްފިއެވެ.

މިނިސްޓްރީ އޮފް ފިނޭންސްގެ އެންމެ ފަހުގެ ހިސާބުތައް ދައްކާގޮތުން، މި ހިނގާ މަހުގެ 13 ވަނަ ދުވަހާ ހަމައަށް އެސްޑީއެފަށް ފައިސާ ޖަމާކުރެވުނު މިންވަރު ވަނީ މިދިޔަ އަހަރުގެ މި މުއްދަތާ އަޅާބަލާއިރު ވަރަށް ބޮޑަށް އިތުރުވެފައެވެ. މިއަހަރަށް ފާސްކޮށްފައިވާ ދައުލަތުގެ ބަޖެޓުގައި މި ފަންޑަށް ޖުމްލަ 2.4 ބިލިއަން ރުފިޔާ ޖަމާކުރުމަށް ވަނީ އަމާޒު ހިފާފައެވެ.

2017 ވަނަ އަހަރު އުފެއްދި މި ފަންޑަށް އާމްދަނީ ހޯދަނީ ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ދަތުރުކުރާ ފަސިންޖަރުންގެ އަތުން ނަގާ އެއާޕޯޓް ޑިވެލޮޕްމެންޓް ފީ (އޭޑީއެފް) އާއި، އެ އެއާޕޯޓުން ފޯރުކޮށްދޭ އެކި ހިދުމަތްތަކުގެ އަގުތަކަށް ބަދަލު ގެނެސްގެން ލިބޭ ފައިސާއިންނެވެ. މި ފަންޑުގެ އެހީތެރިކަމާއެކު މި އަހަރުގެ ތެރޭގައި ސަރުކާރުން ވަނީ ދައުލަތުގެ ދަރަނީގެ ބޮޑު ބައެއް ހަލާސްކޮށް، ސުކޫކަށް ދައްކަންޖެހޭ ފައިސާ ވެސް ދައްކައި ހަލާސްކޮށްފައެވެ.

ފަންޑުގެ މާޒީއަށް ބަލާއިރު، 2018 ވަނަ އަހަރު ނިމުނުއިރު އެސްޑީއެފްގައި ބޭރު ފައިސާގެ ގޮތުގައި ގާތްގަނޑަކަށް 200 މިލިއަން ޑޮލަރު ރައްކާކުރެވިފައި ހުއްޓެވެ. އެހެންނަމަވެސް، 2019 ވަނަ އަހަރު ފިނޭންސް މިނިސްޓްރީ އާއި އެމްއެމްއޭ ދެމެދު ހެދި އެއްބަސްވުމެއްގެ ސަބަބުންނާއި، ކޮވިޑް-19 ގެ ދުވަސްވަރު އިގްތިސާދަށް ކުރިމަތިވި ލޮޅުންތަކާ ގުޅިގެން ފަންޑުގައި ހުރި ބޭރު ފައިސާތައް ވަނީ ދިވެހި ރުފިޔާއަށް މާރުކޮށްފައެވެ.

މީގެ ނަތީޖާއެއްގެ ގޮތުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު 2023 ވަނަ އަހަރު ވެރިކަމާ ހަވާލުވެވަޑައިގެންނެވި އިރު، ފަންޑުގައި ބޭރު ފައިސާގެ ގޮތުގައި ބާކީ ހުރީ އެންމެ 2 މިލިއަން ޑޮލަރެވެ. ނަމަވެސް މިހާރުގެ ސަރުކާރުން އިސްކަންދީގެން ކުރަމުންދާ މަސައްކަތްތަކުގެ ތެރެއިން، ފަންޑަށް ޖަމާކުރާ ބޭރު ފައިސާގެ މިންވަރު އަލުން އިތުރުކޮށް، ރާއްޖޭގެ މާލީ ރައްކާތެރިކަން ވަރުގަދަކުރުމަށް އަންނަނީ ހާއްސަ ފިޔަވަޅުތަކެއް އަޅަމުންނެވެ.