ރާއްޖޭގެ ކްލައިމެޓް އިންވެސްޓްމަންޓް ޕްރޮފައިލް ގްރީން ޓެކްނޮލޮޖީ ކުންފުނިތަކާ ހިއްސާކޮށްފި

ގްރީން ޓެކްނޮލޮޖީގެ ދާއިރާގައި ހަރަކާތްތެރިވާ ކުންފުނިތަކާ ދިވެހިރާއްޖޭގެ "ކްލައިމެޓް އިންވެސްޓްމަންޓް ޕްރޮފައިލް" ހިއްސާކޮށްފައިވާ ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ވިދާޅުވެއްޖެއެވެ.

މި މަޢުލޫމާތު ހިއްސާކޮށްފައިވަނީ "ސެމިނާ އޮން ގްރީން އެންޑް ލޯ-ކާބަން ޑިވެލޮޕްމަންޓް ފޯ މޯލްޑިވްސް" ގެ ތެރެއިން ކުރިއަށްދިޔަ އެންޓަޕްރައިޒް އެކްސްޗޭންޖް ސެޝަންގައެވެ. 

ދިވެހި ވަފުދުގެ ފަރާތުން މި ޕްރެޒެންޓޭޝަން ހުށަހަޅުއްވައިދެއްވީ ސީނިއާ އެންވަޔަރަންމަންޓް މެނޭޖްމަންޓް އޮފިސަރު އަޙްމަދު މަޢުސޫމެވެ.

Senior Environment Management Officer Ahmed Masoon shared the Maldives Climate Investment Profile with green technology companies during the Enterprise Exchange Session of the Seminar on Green & Low-Carbon Development for Maldives, on behalf of the Maldivian delegation pic.twitter.com/OqMzbMekE0

— Min. of Climate Change, Environment and Energy, MV (@MoEnvmv) August 23, 2026

މި ބައްދަލުވުމުގައި އަޙްމަދު މަޢުސޫމް ވަނީ ރާއްޖޭގެ ތިމާވެށި ރައްކާތެރިކުރުމަށާއި، އިއާދަކުރަނިވި ހަކަތައިގެ ދާއިރާ ފުޅާކުރުމަށް ސަރުކާރުން އަޅަމުންދާ ފިޔަވަޅުތަކުގެ މައުލޫމާތު ހިއްސާކުރައްވާފައެވެ. އަދި ތިމާވެށްޓާ ރައްޓެހި ޓެކްނޮލޮޖީގެ ދާއިރާއިން ރާއްޖޭގައި ފަހިވެފައިވާ އިންވެސްޓްމަންޓް ފުރުސަތުތަކާ ގުޅޭގޮތުން ބައިވެރިވި ފަރާތްތަކަށް ތަފްސީލު ދެއްވިއެވެ.

މި ބައްދަލުވުމުގެ މައިގަނޑު އަމާޒަކީ ދުނިޔޭގެ ފެންވަރުގައި ފާހަގަކޮށްލެވޭ ފެހި ޓެކްނޮލޮޖީ ކުންފުނިތަކާއެކު ގުޅުން ގާއިމުކޮށް، ރާއްޖެއަށް މުހިންމު ޒަމާނީ އަދި ތިމާވެށްޓާ ރައްޓެހި އީޖާދުތަކާއި އިންވެސްޓްމަންޓްތައް ހޯދުމަށް މަގުފަހިކުރުން ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ވިދާޅުވެއެވެ. 

އަދި މި ސެމިނާގެ ސަބަބުން ރާއްޖޭގެ ދެމެހެއްޓެނިވި ތަރައްގީގެ އަމާޒުތަކަށް ވާސިލުވުމަށް ދުނިޔޭގެ އެކި ކަންކޮޅުތަކުން އެހީތެރިކަން ލިބިގެންދާނެ ކަމަށް ބެލެވޭ ކަމަށް އެ ވުޒާރާއިން ވަނީ ވިދާޅުވެފައެވެ.