ވިޒިޓް މޯލްޑިވްސްގެ މެނޭޖިން ޑިރެކްޓަރަކަށް ޔާސިރު އައްޔަންކުރައްވައިފި

ރާއްޖޭގެ ފަތުރުވެރިކަން އިޝްތިހާރުކުރުމުގެ މައި ކުންފުނި ކަމަށްވާ ވިޒިޓް މޯލްޑިވްސްގެ މެނޭޖިން ޑިރެކްޓަރު އަދި ޗީފް އެގްޒެކެޓިވް އޮފިސަރު (ސީއީއޯ) ގެ މަގާމަށް އަބްދުﷲ ޔާސިރު އައްޔަންކުރައްވައިފިއެވެ.

ވިޒިޓް މޯލްޑިވްސްއިން މިކަން ހާމަކުރައްވާ އެކްސްގައި ކުރެއްވި ޕޯސްޓެއްގައި ވަނީ ކުންފުނިން ހިންގުމާ އޭނާ ހަވާލުވެވަޑައިގަތުމާއެކު، އައު ހިޔާލުތަކާއި، ގުޅިގެން މަސައްކަތްކުރުމުގެ ރޫހެއްގައި، ބައިނަލްއަގުވާމީ ފަތުރުވެރިކަމުގެ ބާޒާރުތަކުގައި ރާއްޖޭގެ މަގުބޫލުކަން އިތުރަށް ވަރުގަދަކުރުމަށް ކުރަމުންދާ މަސައްކަތްތަކުގެ އާ ބާބެއް ފެށިގެންދާނެ ކަމަށް އުންމީދުކުރާ ކަމަށް ވިދާޅުވެފައެވެ.

VMC welcomes Abdulla Yaasir as our new CEO and Managing Director.

As he takes on the leadership of the Corporation, we look forward to a new chapter of ideas, collaboration, and continued efforts to strengthen the Maldives’ presence across global travel markets.#VisitMaldives pic.twitter.com/FYuApRgKs7

— Visit Maldives Corporation (@visitmaldivesco) August 26, 2026

ވިޒިޓް މޯލްޑިވްސްގެ މެނޭޖިން ޑިރެކްޓަރުގެ މަގާމުގައި އެންމެ ފަހުން ހުންނެވީ އިބްރާހިމް ޝިއުރީއެވެ. އޭނާ އެ މަގާމުން އިސްތިއުފާ ދެއްވީ މި މަހުގެ 24 ވަނަ ދުވަހުއެވެ. ނަމަވެސް އެ މަގާމުން ޝިއުރީ އިސްތިއުފާ ދެއްވި ވަކި ޚާއްސަ ސަބަބެއް މިހާތަނަށް ރަސްމީކޮށް ހާމަކުރައްވާފައެއް ނުވެއެވެ.

ވިޒިޓް މޯލްޑިވްސްއަކީ  ދިވެހިރާއްޖެ ދުނިޔޭގެ އެކި ކަންކޮޅުތަކުގައި ފަތުރުވެރިކަމުގެ މަންޒިލެއްގެ ގޮތުގައި އިޝްތިހާރުކޮށް ޕްރޮމޯޓްކުރުމަށް ޓަކައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ބޭނުންކުރާ ރަސްމީ ބްރޭންޑެވެ.

ވިޒިޓް މޯލްޑިވްސްގެ މައިގަނޑު މަޤްޞަދަކީ ދުނިޔޭގެ ފެންވަރުގައި ރާއްޖޭގެ ޤުދުރަތީ ރީތިކަމާއި، ދިވެހިންގެ މުއްސަނދި ސަގާފަތް  އިޝްތިހާރުކުރުމެވެ. އަދި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކޮށް، ދުނިޔޭގެ މަޤްބޫލު މަންޒިލެއްގެ ގޮތުގައި ރާއްޖެ ދެމެހެއްޓުމަކީ މި ބްރޭންޑުގެ މުހިންމު އަމާޒެކެވެ.