ރ. މީދޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢުގެ މަސައްކަތް ހަލުވިކަމާއެކު ކުރިއަށް

ރ. މީދޫގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ ބޮޑު މަޝްރޫޢުގެ ޢަމަލީ މަސައްކަތްތައް ބާރަށް ކުރިއަށްދާ ކަމަށް އެ މަސައްކަތުގެ ކޮންޓްރެކްޓަރު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ. މި މަޝްރޫޢުގެ ދަށުން މިހާރު ކުރިއަށްދަނީ ބިން ހިއްކުމަށް ކަނޑައަޅާފައިވާ ސަރަޙައްދު ވަކިކޮށް، ވެލި ބޭރުވިޔަނުދީ ހިފެހެއްޓުމަށްޓަކައި އަޅަންޖެހޭ ވެލި ބަންޑު (sand bund) ތައްޔާރުކުރުމުގެ މުހިންމު މަސައްކަތެވެ.

ރ. މީދޫއަކީ  ބިމުގެ ދަތިކަން އިންތިހާއަށް ކުރިމަތިވެ، ގެދޮރުވެރިކަމަށް އިތުރަށް ގޯތި ދޫކުރެވޭނެ އެއްވެސް ޖާގައެއް ނެތް ރަށެކެވެ. ސަރުކާރުން މި މަޝްރޫޢު ފައްޓަވާފައިވަނީ ރަށުގެ އިޤްތިޞާދީ އަދި އިޖުތިމާޢީ ކުރިއެރުމަށް މަގުފަހިކޮށް، އެތައް ސަތޭކަ އައު ގޯއްޗާއި ޢާންމު ޚިދުމަތްތަކަށް ބޭނުންވާ ބިން އިތުރުކޮށްދިނުމުގެ މައިގަނޑު މަޤްޞަދުގައެވެ.

Project Update: Design and Build of Land Reclamation and Shore Protection Works at R. Meedhoo

Construction of a sand bund around the fill area is currently ongoing.

Follow more updates at: https://t.co/RjAFCf3rnI#MTCCProjects #TeamMTCC #RayyithungeKunfuni… pic.twitter.com/WWnwcG6TaY

— MTCC Plc (@MTCCPlc) August 30, 2026

މި މަޝްރޫޢުގެ މައިގަނޑު ދާއިރާތަކުގެ ތެރޭގައި ފަޅު ފުންކޮށް، ރަށުގެ ވަށައިގެންވާ ލަގޫނުން ވެލި ނަގައިގެން ބިން ހިއްކުމާއި، ހިއްކާ ސަރަޙައްދު ގިރުމުން ސަލާމަތްކުރުމަށްޓަކައި ބޮޑުހިލައިގެ ރިވެޓްމަންޓާއި ގްރޮއިން ޖަހައިގެން ވަރުގަދަ ގޮނޑުދޮށް ހިމާޔަތްކުރުމުގެ ނިޒާމެއް ޤާއިމުކުރުން ހިމެނެއެވެ. މީގެއިތުރުން ގުދުރަތީ ރާޅުތަކާއި އުދައިން ރަށް ރައްކާތެރިކުރުމަށް ގޮނޑުދޮށް މުއްސަނދިކުރުމުގެ މަސައްކަތްވެސް ހިމެނިފައިވެއެވެ.

އެމްޓީސީސީއާ ޙަވާލުކޮށްގެން ކުރިއަށްގެންދާ މި މަޝްރޫޢުގެ ޢަމަލީ މަސައްކަތްތައް ނިމުމުން، ކަމާބެހޭ ވުޒާރާއާ ރަސްމީކޮށް މި ބިން ޙަވާލުކުރެވޭނެއެވެ. މި މަޝްރޫޢަކީ ރ. އަތޮޅުގެ އެކި ރަށްރަށުގައި އެމްޓީސީސީން ކުރިއަށްގެންދާ ބަނދަރު ހެދުމާއި ގޮނޑުދޮށް ހިމާޔަތްކުރުމުގެ ގިނަ މަޝްރޫޢުތަކުގެ ތެރެއިން ފާހަގަކޮށްލެވޭ މުހިންމު އެއް މަޝްރޫޢެވެ.