ވައިގެ މަގުން އެތެރެކުރަން އުޅުނު ދެ ކިލޯގެ މަސްތުވާތަކެތި ކަސްޓަމްސްއިން ހިފަހައްޓައިފި

ވައިގެ މަގުން ރާއްޖެއަށް އެތެރެކުރަން އުޅުނު ދެ ކިލޯގެ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން ހިފަހައްޓައިފިއެވެ.

ކަސްޓަމްސްއިން ވިދާޅުވި ގޮތުގައި މި ތަކެތި އަތުލައިގެންފައިވަނީ މި ހިނގާ 2026 ވަނަ އަހަރުގެ އޮގަސްޓް މަހުގެ 29 ވަނަ ދުވަހު ވެލާނާ އިންޓަނޭޝަނަލް އެއާރޕޯޓުންނެވެ. މި ތަކެތި ފެނިފައިވަނީ އިންޑިއާއިން ރާއްޖެ އައި އިންޑިއާ ރައްޔިތެއްގެ ލަގެޖުންނެވެ. އެ މީހާގެ ލަގެޖު ބަލައިފާސްކުރީ އޭނާގެ އަމަލުތައް ހުރިގޮތުން ޝައްކުކުރެވިގެން ކަމަށްވެސް ކަސްޓަމްސްއިން މައުލޫމާތު ދެއެވެ.

އެ އިދާރާއިން ހާމަކުރި ގޮތުގައި، އަތުލައިގަނެވުނު ތަކެތި ޓެސްޓުކުރުމުން މަސްތުވާތަކެތީގެ ބާވަތެއް ކަމަށްވާ ކެނަބިސްއަށް ވަނީ ޕޮޒިޓިވް ވެފައެވެ. އަދި މި ތަކެތީގެ ބަރުދަނުގައި ދެ ކިލޯ ހުރި ކަމަށްވެސް ކަސްޓަމްސްއިން ބުނެފައިވެއެވެ.

29 އޮގަސްޓް 2026 ވަނަ ދުވަހު ވައިގެމަގުން ރާއްޖެއެތެރެކުރަން އުޅުނު 2 ކިލޯގެ މަސްތުވާތަކެތި ކަސްޓަމްސްއިން އަތުލައިގެންފި.

🔹ބާވަތް: ކެނަބިސް
🔹 ބަރުދަން: 2000 ގްރާމް pic.twitter.com/yu8EGK8Hzu

— Maldives Customs Service (@CustomsMv) August 31, 2026

މީގެ އިތުރުން، މި ހިނގާ މަހުގެ މެދުތެރޭގައި ޕޯސްޓު މެދުވެރިކޮށް ރާއްޖެ އެތެރެކުރަން އުޅުނު 3.2 ކިލޯގެ މަސްތުވާތަކެތިވެސް ކަސްޓަމްސްއިން ވަނީ އަތުލައިގެންފައެވެ. އެ ތަކެތި އަތުލައިގެންފައިވަނީ ޕޯސްޓު މެދުވެރިކޮށް ރާއްޖެ ގެނެސްފައިވާ ޕެކޭޖެއް ބަލައިފާސްކުރަމުންދިޔައިރު، އޭގައި މަސްތުވާތަކެތި ފޮރުވާފައި ހުރިކަމަށް ޝައްކުކުރެވިގެން އިތުރަށް ބެލުމުގެ ތެރޭގައެވެ.

ރާއްޖެއަށް އެތެރެކުރަން މަސައްކަތްކުރާ މަސްތުވާތަކެތި އެތެރެކުރުން ހުއްޓުވުމަށްޓަކައި ކަސްޓަމްސްއިން އަންނަނީ ޚާއްސަ ފިޔަވަޅުތަކެއް އަޅައި، ޗެކްކުރުމުގެ ކަންކަން ވަރުގަދަކުރަމުންނެވެ. ވައިގެ މަގުންނާއި ޕޯސްޓު މެދުވެރިކޮށް އަތުލައިގަނެވުނު މި މައްސަލަތައް އިތުރަށް ތަޙުޤީޤު ކުރުމަށްޓަކައި މޯލްޑިވްސް ޕޮލިސް ސަރވިސްއާ ވަނީ ހަވާލުކޮށްފައެވެ.