ފުވައްމުލަކު އެތެރޭގެ މަގުތައް ހެދުމުގެ ދެވަނަ ފިޔަވަހީގެ މަސައްކަތް ބާރަށް ކުރިއަށް

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކުރިއަށްގެންދާ ޏ. ފުވައްމުލަކު އެތެރޭގެ މަގުތައް ހެދުމުގެ ދެވަނަ ފިޔަވަހީގެ މަސައްކަތްތައް ބާރަށް ކުރިއަށްދާ ކަމަށް އެ ކުންފުނިން ހާމަކޮށްފިއެވެ.

އެމްޓީސީސީން މައުލޫމާތު ދޭ ގޮތުގައި މި މަޝްރޫއުގެ ދަށުން މިހާރު ކުރިއަށްދަނީ ކާބްސްޓޯން ކާސްޓްކުރުމާއި، ފެންހިންދާ ނިޒާމު ގާއިމުކުރުމުގެ އިތުރުން ސާވިސް ލައިން އެޅުމުގެ މަސައްކަތްތަކެވެ. މީގެއިތުރުން ސެޓްލްމަންޓް ޓޭންކްތަކާއި، ކޭބަލް ޖަންކްޝަން ބޮކްސް އަދި ހޮޅި އެޅުމުގެ މުހިންމު މަސައްކަތްތައް ވެސް ސައިޓުގައި މިހާރު ދަނީ ކުރެވެމުންނެވެ.

Project Update: Design and Build of Gn. Fuvahmulah Internal Roads - Phase 2

Settlement tank, cable junction box and pipe installation works are ongoing.

Follow more updates at: https://t.co/RjAFCf3rnI #MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/6nidzwKpIC

— MTCC Plc (@MTCCPlc) September 1, 2026

މި މަޝްރޫއަކީ ފުވައްމުލައް ސިޓީގެ އެތެރޭގެ މަގުތައް ޒަމާނީ ފެންވަރަށް ތަރައްގީކޮށް، ފެންބޮޑުވުމުގެ މައްސަލައަށް ދާއިމީ ހައްލެއް ހޯދައިދިނުމުގެ މަގްސަދުގައި ކުރިއަށްގެންދާ މަޝްރޫއެކެވެ. މީގެ ކުރިން މަގުތަކުގައި ފެންހިންދާ ނިޒާމުގެ މަސައްކަތްތަކެއް ފެށިފައިވީ ނަމަވެސް، މި ފިޔަވަހީގެ ދަށުން މައިގަނޑު ގޮތެއްގައި އަމާޒު ހިފާފައިވަނީ މަގުތައް ޒީނަތްތެރިކުރުމާއި، ތާރު އެޅުމާއި އަދި ޔުޓިލިޓީ އިންފްރާސްޓްރަކްޗާ ފުރިހަމަކުރުމަށެވެ.

ފުވައްމުލަކު މަގުހެދުމުގެ ދެވަނަ ފިޔަވަހީގެ އެއްބަސްވުމުގައި އޭރުގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗާއާއި އެމްޓީސީސީއާ ދެމެދު ސޮއިކޮށްފައިވަނީ 25 ޖުލައި 2023 ގައެވެ. އެމްޓީސީސީން އަންދާޒާކުރާ ގޮތުގައި ކުރިއަށް އޮތް އަހަރުގެ ކުރީކޮޅަށް މި މަޝްރޫއުގެ މަސައްކަތްތައް އެއްކޮށް ނިންމާލެވޭނެއެވެ.