އުފެއްދުންތެރިކަމުގެ މައުރަޒަށް ހުށަހެޅި އެޕްލިކޭޝަންތައް ދެގުނަ އިތުރު: ވަޒީރު ސަޢީދު

ދިވެހި އުފެއްދުންތެރިކަމުގެ މައުރަޒަށް 700 އަށްވުރެ ގިނަ ފަރާތުން ވަނީ ކުރިމަތިލާފައި ކަމަށް އިޤުތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު  ވިދާޅުވެއްޖެއެވެ. 

މައުރަޒުގައި ބައިވެރިވުމުގެ ފުރުސަތު މިދިޔަ ހޯމަ ދުވަހު ހަމަވެފައިވާއިރު، ވަޒީރު މުޙައްމަދު ސަޢީދު  އެކްސްގައި ކުރެއްވި ޕޯސްޓެއްގައި ވިދާޅުވީ، މިއަހަރުގެ މައުރަޒަށް ލިބުނު 700 އަށްވުރެ ގިނަ އެޕްލިކޭޝަނަކީ ވޭތުވެދިޔަ އަހަރާ އަޅާބަލާއިރު ދެގުނައިގެ އިތުރުވުމެއް ކަމަށެވެ. 

 މީގެއިތުރުން މި މައުރަޒަކީ އަލަށް ވިޔަފާރި ފަށާ ފަރާތްތަކަށާއި، ކުރިއަރަމުން އަންނަ ވިޔަފާރިތަކުގެ އުފެއްދުންތަކާއި ހުނަރުވެރިކަން ދައްކާލުމަށް ލިބިގެންދާ އަގުހުރި ފުރުސަތެއްކަންވެސް ވަޒީރު ފާހަގަކުރެއްވިއެވެ.

Handmade crafts by a promising young talent, turning creativity into products and ideas into opportunity.

With over 700 applicants already registered, nearly double last year, this year’s Expo will showcase the growing energy, ambition and entrepreneurial spirit of our emerging… pic.twitter.com/Ofeh7r2HcS

— Mohamed Saeed (@em_saeed) September 1, 2026

ވޭތުވެދިޔަ އަހަރު މި މައުރަޒުގައި ބައިވެރިވުމަށް އެދި ހުށަހެޅީ ގާތްގަނޑަކަށް 270 ފަރާތަކުންނެވެ. ދިވެހި އުފެއްދުންތެރިކަމުގެ މައުރަޒަކީ ރާއްޖޭގެ މަސައްކަތްތެރިންނާއި ހުނަރުވެރި އުފެއްދުންތެރިންގެ މަސައްކަތްތައް އެއް ފުރާޅެއްގެ ދަށުން ދައްކާލުމަށާއި، އެ ތަކެތި އިޝްތިހާރުކޮށް މާކެޓްކުރުމުގެ މަގުފަހިކޮށްދިނުމަށް ބާއްވާ މިފަދަ އެންމެ ބޮޑު ހަރަކާތެވެ.

މި އަހަރުގެ އޮކްޓޯބަރު މަހުގެ ފަހުކޮޅު ބޭއްވުމަށް ކަނޑައަޅާފައިވާ މި މައުރަޒާއި ގުޅޭ  މުހިންމު ކަންކަން ނިންމައި، ވާންޖެހޭ ތައްޔާރީތައް މިހާރު ދަނީ ކުރިއަށެވެ. ވެ. މި އަހަރުގެ މައުރަޒުން ފާހަގަކޮށްލެވޭ އެންމެ ފާހަގަކޮށްލެވޭ އެއް ބަދަލަކީ ބައިވެރިވެވޭ އުމުރުފުރާތަކަށް ގެނައި ބަދަލެވެ. އެގޮތުން، މިފަހަރުގެ ދިވެހިންގެ އުފެއްދުންތެރިކަމުގެ މައުރަޒުގައި އުމުރުން 13 އަހަރު ފުރިފައިވާ ކޮންމެ ފަރާތަކަށް ވެސް ބައިވެރިވުމުގެ ފުރުސަތު ވަނީ ހުޅުވާލާފައެވެ.

މި ހަރަކާތުގައި އުފެއްދުންތައް ދައްކާލުމުގެ އިތުރުން، ވިޔަފާރިތައް އިޝްތިހާރުކުރުމަށާއި މުދާ ވިއްކުމަށް ޚާއްޞަ އެކި ޒޯންތައް ހުންނާނެއެވެ. ދިވެހީންގެ އުފެއްދުންތެރިކަމުގެ މައުރަޒުގައި 16 ދާއިރާއަކަށް ނިސްބަތްވާ 73 ކެޓަގަރީއަކުން އުފެއްދުންތަކާއި ޚިދުމަތްތައް ހުށަހެޅުމުގެ ފުރުސަތު ލިބިގެންދާނެއެވެ. މި މައުރަޒު ކުރިއަށް ގެންދިއުމަށް ހަމަޖެހިފައިވަނީ އޮކްޓޯބަރު މަހުގެ 23 އިން ފެށިގެން 31 ވަނަ ދުވަހުގެ ނިޔަލަށެވެ.

ރާއްޖޭގެ މަސައްކަތްތެރިންގެ ވިޔަފާރިތައް އިޝްތިހާރުކޮށް ތަރައްޤީކުރުމާއެކު، އާމްދަނީ ހޯދޭނެ މަގުތައް ތަނަވަސްކޮށްދިނުމަކީ ވިޔަފާރީގެ ސިޔާސަތުތަކުގެ ތެރެއިން ސަރުކާރުން އެންމެ އިސްކަންދޭ އެއް ލަނޑުދަނޑިއެވެ.