އޮންލައިން ވިޔަފާރިތަކުގެ ލިމިޓް ކޮންމެ ދުވަހެއްގެ ހެނދުނު 7:00 ގައި އައުވާނެ: ބީއެމްއެލް

ދިވެހި ރުފިޔާ ކާޑުތައް ބޭނުންކޮށްގެން ރާއްޖޭން ބޭރުގެ އީ-ކޮމާސް ޕްލެޓްފޯމްތަކުގައި މުއާމަލާތްކުރެވޭ މިންވަރު ދެމެހެއްޓެނިވި ގޮތެއްގައި ބެލެހެއްޓުމަށްޓަކައި ދުވަހަކަށް ކަނޑައެޅިފައިވާ ލިމިޓްތައް، ކޮންމެ ދުވަހެއްގެ ވެސް ހެނދުނު 7:00 ގައި އަލުން އައުވެގެން (ރީސެޓްވެގެން) ދާނެ ކަމަށް ބޭންކް އޮފް މޯލްޑިވްސް (ބީއެމްއެލް) އިން ހާމަކޮށްފިއެވެ.

ޤައުމީ ބޭންކުން ނެރުނު ބަޔާނެއްގައި ބުނެފައިވަނީ، ވަކި ކެޓަގަރީއަކުން ނުވަތަ މާޗަންޓަކުން އެ ދުވަހަކަށް ކަނޑައަޅާފައިވާ ލިމިޓް ހަމަވި ނަމަވެސް، ޖެހިގެން އަންނަ ދުވަހުގެ ހެނދުނު 7:00 ގެ ފަހުން އަލުން އެ މުއާމަލާތް ކުރުމުގެ ފުރުޞަތު ކަސްޓަމަރުންނަށް ފަހިވެގެންދާނެ ކަމަށެވެ. މީގެއިތުރުން، ޔޫއެސް ޑޮލަރު އެކައުންޓްތަކާ ގުޅިފައިވާ ކާޑުތައް ބޭނުންކުރާ ފަރާތްތަކަށް އެއްވެސް ދަތިކަމެއް ނެތި މުއާމަލާތްތައް ފުރިހަމަކުރެވޭނެ އިންތިޒާމު ވެސް ވަނީ ހަމަޖައްސައިދީފައެވެ.

ބީއެމްއެލް އިން މި ބަދަލު ގެނެސްފައިވަނީ ބައިނަލްއަޤްވާމީ ކާޑު މުއާމަލާތްތަކަށް ޑޮލަރުގެ ޑިމާންޑް ބޮޑުވެ، ބޭންކުގެ ބޭރު ފައިސާގެ ރިޒާވަށް ބާރުބޮޑުވަމުންދާތީ، އެކަން ޒިންމާދާރުކަމާއެކު މެނޭޖްކުރުމަށެވެ. އަދި ރާއްޖެއަށް ކޮންމެހެން ބޭނުންވާ ޒަރޫރީ މުދަލާއި ޚިދުމަތްތައް އެތެރެކުރުމަށް ބޭނުންވާ ޓީޓީ ފަދަ ޚިދުމަތްތައް މެދުކެނޑުމެއްނެތި ފޯރުކޮށްދިނުމަކީ ވެސް މި ނިންމުމުގެ މުހިންމު މަޤްޞަދެކެވެ.

މި އުސޫލުގެ ދަށުން އެކި ދާއިރާތަކަށް ދުވާލަކު ދޫކުރުމަށް ހަމަޖެހިފައިވާ ލިމިޓްތަކަކީ:

• ދަތުރުފަތުރާއި ހުރުމުގެ ޚިދުމަތްތައް: ދުވާލަކަށް ގާތްގަނޑަކަށް 200,000 ޑޮލަރު (މަހަކު 6 މިލިއަން ޑޮލަރު)
• އެންމެ ގިނައިން ވިޔަފާރިކުރާ 150 އީ-ކޮމާސް މާޗަންޓުން: ދުވާލަކަށް ގާތްގަނޑަކަށް 100,000 ޑޮލަރު (މަހަކު 3 މިލިއަން ޑޮލަރު)
• ޒަރޫރީ ސަބްސްކްރިޕްޝަންތަކާއި މުހިންމު ޚިދުމަތްތައް: ދުވާލަކަށް ގާތްގަނޑަކަށް 100,000 ޑޮލަރު (މަހަކު 3 މިލިއަން ޑޮލަރު)
• ސޯޝަލް މީޑިއާ ޕްލެޓްފޯމްތައް: ދުވާލަކަށް ގާތްގަނޑަކަށް 50,000 ޑޮލަރު (މަހަކު 1.5 މިލިއަން ޑޮލަރު)
• އެހެނިހެން ހުރިހާ ވިޔަފާރިތައް: ދުވާލަކަށް ގާތްގަނޑަކަށް 60,000 ޑޮލަރު (މަހަކު 1.8 މިލިއަން ޑޮލަރު)

މި ލިމިޓްތައް ކަނޑައެޅި ނަމަވެސް، ޞިއްޙީ އަދި ތަޢުލީމީ ބޭނުންތަކަށް ކުރާ މުއާމަލާތްތައް ވަނީ މި ލިމިޓްތަކުން އިސްތިސްނާކޮށްފައެވެ. އެ ޚިދުމަތްތައް ކުރިއަށްދާނީ ބޭންކުގެ މަހަކު 16 މިލިއަން ޑޮލަރުގެ ޖުމްލަ އެލޮކޭޝަންގެ ތެރެއިން ވަކިން ޚާއްޞަކުރެވިފައިވާ ބައެއްގެ ދަށުންނެވެ.

ބީއެމްއެލް އިން ވިދާޅުވީ، ކަސްޓަމަރުން ކާޑު ބޭނުންކުރާ މިންވަރާއި ބޭންކަށް ލިބެން ހުންނަ ޑޮލަރުގެ މައްޗަށް ބަލައި، މި ލިމިޓްތައް ގަވާއިދުން މުރާޖައާކޮށް ބަދަލުތައް ގެންނަމުންދާނެ ކަމަށެވެ.