ދައުރުވާ ވީޑިއޯއިން ފެންނަނީ ނައްތާލުމުގެ ހުއްދަ ދެވިފައިވާ ސައިކަލުތަކެއް: ފުލުހުން

ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ ނައްތާލުމުގެ ހުއްދަ ދެވިފައިވާ ސައިކަލުތަކެއް ކަމަށް ދިވެހި ފުލުހުންގެ ހިދުމަތުން ވިދާޅުވެއްޖެއެވެ.

ފުލުހުން މިފަދައިން ވިދާޅުވީ، ސޯޝަލް މީޑިއާގައި ދައުރުވަމުންދާ، ސައިކަލެއް ޓްރަކަކުން ވައްޓާލާ މަންޒަރު ދައްކުވައިދޭ ވީޑިއޯއާ ގުޅިގެން ނެރުއްވި ބަޔާނެއްގައެވެ.

އެ ވީޑިއޯއިން ފެންނަ އުޅަނދުތަކަކީ، ޓޯކޮށް، ދޫކުރުމަށް ހަމަޖެހިފައިވާ މުއްދަތުގައި އުޅަނދުތަކުގެ ވެރިފަރާތްތަކުން ހަވާލުނުވެ ހުރި އުޅަނދުތަކެއް ކަމަށް ފުލުހުން ވިދާޅުވިއެވެ. 

އަދި އެއީ ގާނޫނީ އަދި އިދާރީ ގޮތުން ފުރިހަމަކުރަންޖެހޭ އެންމެހައި އިޖުރާއަތްތައް ފުރިހަމަކުރުމަށްފަހު، ނައްތާލުމަށް ރަސްމީކޮށް ހުއްދަ ދެވިފައިވާ އުޅަނދުތަކެއްކަން ވެސް ފުލުހުންގެ ބަޔާނުގައި ވަނީ ފާހަގަކުރައްވާފައެވެ.

ފުލުހުން ވިދާޅުވީ، ވީޑިއޯއިން ފެންނަ މަންޒަރަކީ އެ އުޅަނދުތައް ނައްތާލުމަށް ޓަކައި ތިލަފުށްޓަށް ކުނީގެ ގޮތުގައި ގެންދިއުމަށް، ހުޅުމާލެ ފޭސް 2 އިން ފުލުހުންނަށް އަލަށް ހަމަޖެހުނު ޓޯޔާޑަށް ގެންގޮސް ކުނީގެ ގޮތުގައި އެއްތަނަކަށް ޖަމާކުރަމުންދިޔަ މަންޒަރު ކަމަށެވެ. 

ސޯޝަލް މީޑިއާގައި ދައުރުވަމުންދާ، ސައިކަލެއް ޓްރަކަކުން ވައްޓާލާ މަންޒަރު ދައްކުވައިދޭ ވީޑިއޯއާ ގުޅޭ pic.twitter.com/WUckGjwhLb

— Maldives Police (@PoliceMv) September 22, 2026

ފުލުހުން ޓޯވްކުރާ އުޅަނދުތައް އަނބުރާ ގެންދިއުމަށް ދޭ މުއްދަތު ހަމަވާއިރު ވެސް ވެރިފަރާތުން ނުގެންގޮސްފިނަމަ، 60 ދުވަހުގެ ތެރޭގައި އެ އުޅަނދަކާ ހަވާލުވުމަށް ޢާންމުކޮށް އިޢުލާނުކުރެއެވެ. އަދި މި މުއްދަތު ހަމަވާއިރު ވެސް އުޅަނދު ގެންގޮސްފައިނުވާނަމަ، އޭގެ ރަޖިސްޓްރީ ބާޠިލުކުރަން އެދެންޖެހޭނެ ކަމަށާއި، ހުށަހަޅާތާ 7 ދުވަސް ތެރޭގައި މިނިސްޓްރީން އެ އުޅަނދެއްގެ ރަޖިސްޓްރޭޝަން އުވާލަންވާނެ ކަމަށް ޤަވާޢިދު ބަޔާންކުރެއެވެ.

އިޢުލާނުކުރާ މުއްދަތުގައި ވެރިފަރާތުން ހަވާލުނުވާ އުޅަނދުތައް، ނީލަން ކިޔައިގެން ވިއްކާލުމުގެ ނުވަތަ އެއްކޮށް ނައްތާލުމުގެ ފުރިހަމަ އިޚްތިޔާރާއި ބާރު މި ޤަވާޢިދުގެ ދަށުން ފުލުހުންގެ މުއައްސަސާއަށް ލިބިގެންވެއެވެ.