ފާއިތުވި 4 މަހެއްހާ ދުވަހުގެ ތެރޭގައި ޑްރަގް ވިއްކާ 17 ތަނެއް ބަންދުކޮށްފި: އިޙްސާން

ފާއިތުވެދިޔަ ގާތްގަނޑަކަށް ތިން ހަތަރު މަހެއްހާ ދުވަހުގެ ތެރޭގައި ޑްރަގް ވިއްކާ 17 ތަނެއް ބަންދުކޮށްފައިވާ ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. 

"އަހާ" ފޯރަމްގެ 7 ވަނަ އެޕިސޯޑުގައި އާންމުންގެ ތެރެއިން ބޭފުޅަކު ކުރެއްވި ސުވާލަކަށް ޖަވާބު ދެއްވަމުން ވަޒީރު ވަނީ، މަސްތުވާތަކެއްޗާއި ގުޅޭ މައްސަލަތަކުގައި ތަކުރާރުކޮށް ދިމާވާ އެންމެ ބޮޑު އެއް މައްސަލައަކީ، ޑްރަގް ކެފޭތައް ހިންގަމުންދާ ކަމުގެ މައްސަލަ ކަމަށް ވިދާޅުވެފައެވެ.

ފުލުހުން މިފަދަ ތަންތަން ބަލައި ފަސްކުރި ނަމަވެސް، އަނެއް ދުވަހު އެތަނުގައި ޑްރަގް ބޭނުންކުރުމުގެ މަސައްކަތް ފަށާކަން ފާހަގަކުރައްވާ ވަޒީރު ވަނީ، އެއް ގެއެއް 140އަށް ވުރެ ގިނަ ފަހަރު ރެއިޑުކޮށްފައިވާކަމަށް ވިދާޅުވެފައެވެ.

މި މައްސަލަ ހައްލުކުރުމުގެ ގޮތުން، ކޯޓު އަމުރެއްގެ ދަށުން އެ ތަންތަން ބަންދުކޮށް، ކުށް ތަކުރާރުވާ ނަމަ އިމާރާތް ދައުލަތަށް ނެގޭގޮތައް ގާނޫނަށް ބަދަލު ގެނެސްފައިވާ ކަމަށް ވަޒީރު ވިދާޅުވިއެވެ.

"އެގޮތުން މިހާރު ވާނެ 17 ތަނެއް ބަންދުކުރުވާފަ. ފާއިތުވެދިޔަ ގާތްގަނޑަކަށް ތިން ހަތަރު މަހެއް ތެރޭގަ 17 ތަނެއް. އެއީ. އައްޑޫ އަތޮޅުގަ 4 ތަނާ، ފުވައްމުލަކުގެ އެއް ތަނާ، އަދި ބާކީ މާލޭގެ 12 ތަން."

ވަޒީރު ވިދާޅުވިއެވެ.

ވަޒީރު ވިދާޅުވީ، ކުރިއަށް އޮތް ނޮވެމްބަރު މަހާއި ހަމައަށް އަމާޒު ހިފާފައިވަނީ މާލޭގައި އާންމުކޮށް މަސްތުވާތަކެތީގެ ވިޔަފާރިކުރާ ގެތަކާއި، "ޑްރަގް ކެފޭ" ތަކުގެ ގޮތުގައި ބޭނުންކުރަމުންދާ ހުރިހާ ތަނެއް އެއްކޮށް ބަންދުކުރުމަށް ކަމަށެވެ.

ދިވެހި ފުލުހުން ފާއިތުވެދިޔަ ދެ އަހަރާއި ބައިގެ ތެރޭގައި ހިންގި އޮޕަރޭޝަންތަކުގައި، 1.3 ޓަނުގެ މަސްތުވާތަކެތި ރާއްޖޭގެ "މަގުމަތިން" ނަގާފައިވާކަން ވެސް ވަޒީރު ވަނީ ފާހަގަކުރައްވާފައެވެ.