ހުޅުމާލޭ ސިންތެޓިކް ޓްރެކް ޕީޔޫ ޓްރެކަކަށް ބަދަލުކުރުމުގެ މަސައްކަތް އޮކްޓޫބަރު 1ގައި ފަށާނެ

ދުނިޔޭގެ އެތުލެޓިކްސްގެ މައި އިދާރާގެ މިންގަނޑަށް ފެތޭ ގޮތަށް ހުޅުމާލޭ ސިންތެޓިކް ޓްރެކް، ޕީޔޫ (ޕޮލިއުރެތޭން) ޓްރެކަކަށް ބަދަލުކުރުމުގެ މަސައްކަތް އަންނަ އޮކްޓޫބަރު 1ގައި ފަށާނެ ކަމަށް ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.

ވުޒާރާތަކުން ކުރަމުން އަންނަ މަސައްކަތްތަކުގެ އަދާހަމަ ހިއްސާކުރުމަށާއި، ވަޒީރުންނާއި ރައްޔިތުން ކުރަން ބޭނުންވާ ސުވާލުތަކަށް ޖަވާބުދެއްވުމަށް ބާއްވާ ވަޒީރުންގެ "އަހާ" ފޯރަމްގައި ވާހަކަފުޅުދައްކަވަމުން ވަޒީރު ރާފިއު ވަނީ، ހުޅުމާލޭގައި މިހާރު އޮތް ސިންތެޓިކް ޓްރެކަކީ ބައިނަލްއަގްވާމީ މިންގަނޑުތަކަށް ފެތޭ ޓްރެކެއް ނޫންކަން ފާހަގަކުރައްވާފައެވެ.

އެކަމުގެ ސަބަބުން އެތުލީޓުން ރެކޯޑެއް ހެދިކަމުގައިވިޔަސް އެކަން ގަބޫލުނުކުރާ ކަމަށާއި، ވޯލްޑް އެތުލެޓިކްސްގެ އުސޫލު އޮންނަ ގޮތުން ރެކޯޑް ގުނަނީ ހަމައެކަނި ވޯލްޑް އެތުލެޓިކްސް އެސޯސިއޭޝަނުން ގަބޫލުކުރާ ފެންވަރުގެ ޓްރެކްގައި ހަދާ ރެކޯޑްތައް އެކަނިކަން ވަޒީރު ފާހަގަކުރެއްވިއެވެ.

ވަޒީރު ވަނީ މާލެ ސަރަހައްދުގައި އޮތް ޓްރެކްތަކަށް އަޅިއަޅުއްވާލައްވަމުން، މިވަގުތު މާލެ ސަރަހައްދުގައި އޮތް ދެ ޓްރެކަކީ ދެ ވައްތަރުގެ، ދެ ތަން ކަމަށް ވިދާޅުވެފައެވެ. އެގޮތުން، މާފަންނު ސްޓޭޑިއަމްގައި އޮތީ "ސްޕްރޭ ފޯމް" ޓްރެކެއް ކަމަށާއި، ހުޅުމާލޭގައި މިހާރު އަޅާފައިވާ އޮތް ޓްރެކަކީ "ސޭންޑްވިޗް" ވައްތަރުގެ ޓްރެކެއް ކަމަށް ވަޒީރު ވިދާޅުވިއެވެ.

ރާއްޖޭގެ އެތުލީޓުން ނެރޭ ނަތީޖާތައް ބައިނަލްއަޤްވާމީ ފެންވަރުގައި ބަލައިގަނެވޭނީ ވޯލްޑް އެތުލެޓިކްސްގެ މިންގަނޑުތަކަށް ފެތޭ ޓްރެކެއް އޮވެގެން ކަމަށްވާތީ، އެ ފެންވަރަށް ޓްރެކް ތަރައްޤީކުރުމަކީ ކޮންމެހެން ކުރަންޖެހޭ ކަމެއް ކަމަށް ވަޒީރު ވިދާޅުވިއެވެ. މިގޮތުން، މިހާރު އޮތް ސިންތެޓިކް މެޓީރިއަލް އެއްކޮށް ބަދަލުކޮށް، މުޅި ޓްރެކުގެ ބޭސް ނަގައިގެން މުޅިން އައު ޓްރެކެއް އެޅުމުގެ މަސައްކަތް ކުރުމަށް ވަނީ ނިންމާފައި ކަމަށް އެމަނިކުފާނު ވިދާޅުވިއެވެ.

" އަދި އެ މަސައްކަތް އަންނަ މަހުގެ 1 ވަނަ ދުވަހު ފެށިގެން ދާނެ. އުންމީދަކީ އަންނަ އަހަރުގެ ޖެނުވަރީ މަހުގެ ނިޔަލަށް އެ މަސައްކަތް މުޅިން ނިންމާލުން." 

ވަޒީރު ވިދާޅުވިއެވެ.

މީގެ އިތުރުން ވަޒީރު ވިދާޅުވީ، ހުޅުމާލޭ ސިންތެޓިކް ޓްރެކް ބަދަލުކުރުމަށް ބޭނުންވާ ތަކެތި މިހާރު އޯޑަރު ކޮށްފައިވާ ކަމަށާއި، އެ ތަނުގެ ހުރިހާ ތަފުސީލީ ކުރެހުންތަކެއްގެ މަސައްކަތް ވެސް ވަނީ ނިމިފައި ކަމަށެވެ.