މަޢުލޫމާތު ހޯދައި ލިބިގަތުމުގައި ރާއްޖެ އޮތީ ގިނަ ގައުމުތަކަށްވުރެ ކުރީގައި: އައިކޮމް

މައުލޫމާތު ހޯދައި ލިބިގަތުމުގެ މައިދާނުގައި ރާއްޖެ އޮތީ އެހެން ގިނަ ގައުމުތަކަށްވުރެ ކުރީގައި ކަމަށް އިންފޮމޭޝަން ކޮމިޝަނަރުގެ އޮފީސް (އައިކޮމް)އިން ވިދާޅުވެއްޖެއެވެ.

އެ އިދާރާއިން މިކަން ހާމަކުރައްވާފައި ވަނީ، މައުލޫމާތު ހޯދައި ލިބިގަތުމުގެ ހައްގުގެ ބައިނަލްއަގްވާމީ ދުވަހުގެ މުނާސަބަތުގައި ނެރުއްވި ހާއްސަ ނޫސްބަޔާނުގައެވެ. އައިކޮމްއިން ވަނީ، މި ދުވަހުގެ މުނާސަބަތުގައި ދިވެހިރާއްޖޭގެ ލޮބުވެތި އެންމެހައި ރައްޔިތުންނަށާއި ދައުލަތުގެ ތިން ބާރުގެ ވެރީންނަށާއި، ދައުލަތުގެ އެންމެހައި އިދާރާތަކުގެ ވެރީންނާއި، އިންފޮމޭޝަން އޮފިސަރުންނަށާއި މުވައްޒަފުންނަށް ތަހުނިޔާއާއި ހެޔޮއެދުންތައް އަރިސްކުރައްވާފައެވެ. 

އަދި މައުލޫމާތު ހޯދައި ލިބިގަތުމުގެ ހައްގަކީ، ސާފު އަދި ޒިންމާދާރު، ޢަދުލުވެރި، ނަޒާހަތްތެރި، ވެރިކަމެއް ދެމެހެއްޓުމަށާއި، ދީމުޤްރާޠީ ނިޒާމު ހަރުދަނާކުރުމަށް ޓަކައި އޮތް އެންމެ މުހިންމު އެއް ވަސީލަތްކަން ފާހަގަކުރައްވާ އައިކޮމްއިން ވިދާޅުވީ، ދައުލަތުގެ އިދާރާތަކުން ކުރާ މަސައްކަތްތަކާއި ނިންމާ ނިންމުންތަކުގެ މައުލޫމާތު އެންމެންނަށް އެނގުމަކީ، ދައުލަތުގެ ނަޒާހަތްތެރިކަން ރައްޔިތުންނަށް އެންމެ ބޮޑަށް ގަބޫލުކުރެވޭނެ އެއް އަސާސު ކަމަށެވެ.

މައުލޫމާތު ހޯދައި ލިބިގަތުމުގެ ހައްގުގެ ޤާނޫނުގެ ދަށުން އުފެއްދި އިންފޮމޭޝަން ކޮމިޝަނަރުގެ އޮފީހަކީ މި ހައްގު ހިމާޔަތްކޮށް، ދައުލަތުގެ އިދާރާތައް ޖަވާބުދާރީކުރުވުމުގައި އެންމެ އިސް ދައުރެއް އަދާކުރާ މުއައްސަސާ ކަމަށާއި، ވޭތުވެދިޔަ 12 ވަރަކަށް އަހަރުގެ ތެރޭގައި، މައުލޫމާތު ހޯދައި ލިބިގަތުމުގެ ހައްގު ކަށަވަރުކުރުމުގައި ދިވެހިރާއްޖެއިން ވަނީ ބޮޑެތި ކުރިއެރުންތަކެއް ހާސިލުކޮށްފައި ކަމަށް އައިކޮމްއިން ވިދާޅުވިއެވެ. 

އަދި މައުލޫމާތު ހޯދައި ލިބިގަތުމުގެ ހައްގާއި ބެހޭ ގޮތުން ރާއްޖޭގެ ހުރިހައި އަތޮޅެއް ހިމެނޭހެން މުޅި ރާއްޖޭގައި ވަނީ ހޭލުންތެރިކަމުގެ ޕްރޮގްރާމުތައް ހިންގާފައި ކަމަށާއި، އޮންލައިންކޮށް ރައްޔިތުންނަށް ފަސޭހަކަމާ އެކު މައުލޫމާތަށް އެދެވޭނެ "މަހޯލި" ޕޯޓަލް ވެސް ވަނީ ޤާއިމުކޮށްފައި ކަމަށް އައިކޮމްއިން ފާހަގަކުރެއްވިއެވެ.

"މަހޯލި" ޕޯޓަލްގެ ސަބަބުން އާންމު ރައްޔިތުންނާއި ނޫސްވެރީންނާއި، މަދަނީ ޖަމްޢިއްޔާތަކުން ދައުލަތުގެ ކަންކަން ސާފުކުރުމަށް ޓަކައި މައުލޫމާތަށް އެދޭ މިންވަރު އަހަރަކަށް ވުރެ އަހަރެއް އިތުރުވާ ކަމަށާއި، މި ހައްގު ހޯދަން އެދޭ ރައްޔިތުންނާއި މުއައްސަސާތަކުގެ އަދަދު ވެސް އިތުރުވަމުންދާކަން ފާހަގަކުރެއްވިއެވެ. 

އެގޮތުން އަހަރުގެ މިހާތަނަށް 745 މައްސަލައެއް ހުށައެޅިފައިވާ ކަމަށާއި، 260 އަށްވުރެ ގިނަ މައްސަލަ ވަނީ ނިންމާފައި ކަމަށް އައިކޮމްއިން ވިދާޅުވިއެވެ. 

ކޮންމެ އަހަރަކު އޮންނަ "އިންފޮމޭޝަން ކޮމިޝަނަރުންގެ ބައިނަލްއަގުވާމީ ކޮންފަރެންސް"ގައި 2022 ވަނަ އަހަރުން ފެށިގެން ދިވެހިރާއްޖެއިން ބައިވެރިވަމުންދާ ކަމަށާއި، މި ކޮންފަރެންސްގައި ދިވެހިރާއްޖޭގެ ކާމިޔާބީތަކުގެ މައްޗަށް ވާހަކަދެކެވޭކަން އައިކޮމްއިން ފާހަގަކުރެއްވިއެވެ. 

ކޮންމެ އަހަރެއްގެ ސެޕްޓެމްބަރު 28ވަނަ ދުވަހަކީ ބައިނަލްއަޤްވާމީ ގޮތުން ފާހަގަކުރާ "މަޢުލޫމާތު ހޯދައި ލިބިގަތުމުގެ ޙައްޤުގެ ދުވަހެވެ." ދިވެހިރާއްޖޭގައި ވެސް މި ދުވަސް ޚާއްޞަ ދުވަހެއްގެ ގޮތުގައި ރަސްމީ ކަލަންޑަރުގައި ހިމަނައިގެން ފާހަގަކުރުމަށް އެންމެ ބޮޑު މަސައްކަތެއް ކޮށްފައިވަނީ އައިކޮމްއިންނެވެ.