ޢިމާރާތްކުރާއިރު ކަރަންޓު ވިއުގައަށް ގެއްލުން ނުވާނެހެން މަސައްކަތް ކުރުމަށް އެދިއްޖެ

ޢިމާރާތްކުރުމާއި މަގުކޮނުމުގެ މަސައްކަތްތައް ކުރިއަށްގެންދާއިރު، ކަރަންޓު ވިއުގައަށް ގެއްލުން ނުވާނެހެން މަސައްކަތް ކުރުމަށް  ސްޓެލްކޯއިން އެދިއްޖެއެވެ.

ސްޓެލްކޯއިން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، އިއްޔެ ހުޅުމާލޭގެ ފުރަތަމަ ފިޔަވަހިން ކަރަންޓުގެ ޚިދުމަތް މެދުކެނޑެން މެދުވެރިވީ، ކުރެދިމާ ހިނގުމުގައި އަމިއްލަ ފަރާތަކުން ކުރިއަށްގެންދިޔަ ޢިމާރާތްކުރުމުގެ މަސައްކަތެއްގެ ތެރެއިން ބިންކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވުމާ ގުޅިގެން ކަމަށެވެ.

މީގެ އިތުރުން، މިދިޔަ ބުރާސްފަތި ދުވަހު ވެސް މިފަދަ ހާދިސާއެއް ހިނގާފައިވާ ކަމަށާއި، އޭގެ ސަބަބުން ވެސް ހުޅުމާލެ ފުރަތަމަ ފިޔަވަހީގެ ބައެއް ސަރަޙައްދުތަކުން ވަނީ ކަރަންޓު ކެނޑިފައި ކަމަށް ސްޓެލްކޯއިން ވިދާޅުވެއެވެ. 

ބުރާސްފަތި ދުވަހު ހުޅުމާލެ ފުރަތަމަ ފިޔަވަހީގެ ބައެއް ސަރަޙައްދުތަކުން ކަރަންޓު ކެނޑުމަށް މެދުވެރިވީ ބަނަފްސާ ހިނގުން ސަރަޙައްދުގައި ކުރިއަށްދިޔަ ޢިމާރާތްކުރުމުގެ މަސައްކަތެއްގެ ތެރެއިން ބިންކޮނުމުގައި ހައިވޯލްޓޭޖް ކޭބަލަކަށް ގެއްލުން ލިބުމާ ގުޅިގެނެވެ. 

މިފަދަ ހާދިސާތައް ތަކުރާރުވުމަކީ ކަރަންޓުގެ ވިއުގައަށް ގެއްލުންވެ ޚިދުމަތް މެދުކެނޑިގެންދާ ކަމެއް ކަމަށާއި، އެކަމުގެ ސަބަބުން ޢާންމު ރައްޔިތުންނަށް އިންތިހާއަށް ދަތިތަކާ ކުރިމަތިލާންޖެހޭކަން ސްޓެލްކޯއިން ފާހަގަކުރެއްވިއެވެ. 

އެހެންކަމުން، ޢިމާރާތްކުރުމާއި މަގުކޮނުމުގެ މަސައްކަތްތައް ކުރިއަށްގެންދަވާ ހުރިހާ ފަރާތްތަކުން ވެސް މިހާރަށްވުރެ ބޮޑަށް ޒިންމާދާރުވެ، ބިމުގެ އަޑީގައިވާ ކަރަންޓު ވިއުގައަށް އެއްވެސް ގެއްލުމެއް ނުވާނޭހެން މަސައްކަތްތައް ރާވައިގެން ކުރިއަށް ގެންދިއުމަށް އެ ކުންފުނިން ވަނީ އިލްތިމާސްކޮށްފައެވެ.

މިއަދު ހުޅުމާލޭގެ ފުރަތަމަ ފިޔަވަހިން ކަރަންޓުގެ ޚިދުމަތް މެދުކެނޑެން މެދުވެރިވީ، ކުރެދިމާ ހިނގުމުގައި އަމިއްލަ ފަރާތަކުން ކުރިއަށްގެންދިޔަ ޢިމާރާތްކުރުމުގެ މަސައްކަތެއްގެ ތެރެއިން ބިންކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވުމާ ގުޅިގެން. މީގެ އިތުރުން، މިދިޔަ… pic.twitter.com/fm5wbgMhgA

— STELCO (@STELCOMALDIVES) September 28, 2026