އަމީނީ މަގުގެ ސެގްމަންޓް 2 ގައި ތާރުއަޅައި ނިންމާލައިފި

އަމީނީ މަގުގެ ސެގްމަންޓް 2 ގައި ތާރުއެޅުމުގެ މަސައްކަތް ނިންމާލާފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އިން ވިދާޅުވެއްޖެއެވެ.

ސެގްމަންޓް 2 ގައި ތާރުއެޅުމުގެ މަސައްކަތް ނިމިފައިވާކަން ހާމަކުރައްވާ އެކްސްގައި ހިއްސާކުރައްވާ އެމްޓީސީސީން ވިދާޅުވީ، މަގުތަކުގެ ފެންވަރު ރަނގަޅުކުރުމަށް ކުރެވޭ މިފަދަ މަސައްކަތްތަކުގެ ސަބަބުން މާލޭގެ ރައްޔިތުންނަށް ދަތުރުފަތުރު ކުރުމުގައި ލުއިފަސޭހަކަން ލިބިގެންދާނެ ކަމަށެވެ.

އަދި މިއީ އެއްތަނުން އަނެއްތަނަށް ފަސޭހަކަމާއެކު ދަތުރުފަތުރު ކުރެވޭނެ އިންތިޒާމުތައް ހަމަޖެހި، ފަސޭހައިން ވާސިލުވެވޭނެ ސިޓީއަކަށް މާލެ ހެދުމަށް އެޅިގެންދާ މުހިންމު ފިޔަވަޅެއްކަން އެ ކުންފުނިން ވަނީ ފާހަގަކުރައްވާފައެވެ. 

We have completed the asphalt works of the segment 2 of Ameenee Magu.

The development of improved road infrastructure will help provide smoother and more convenient travel for the residents of Malé City, while contributing to a better-connected and more accessible city.… pic.twitter.com/zTe4AZqN8e

— MTCC Plc (@MTCCPlc) September 28, 2026

އެމްޓީސީސީއާ މި މަޝްރޫއު ރަސްމީކޮށް ހަވާލުކޮށްފައިވަނީ މިއަހަރުގެ ޖޫން މަހުގެ 15 ވަނަ ދުވަހުއެވެ. އަމީނީ މަގުގެ ސެގްމަންޓް 1، 2 އަދި 3 ހިމެނޭ ސަރަޙައްދަކީ ދަރުމަވަންތަ ހޮސްޕިޓަލާއި ހާބަރު ފުޑް ކޯޓާ ދިމާލުން ކުރިން ތާރު ހަލާކުވެ، އަޑިގުޑަންތައް އުފެދިފައިވާ ސަރަޙައްދެކެވެ.

މި މަޝްރޫޢުގެ ދަށުން 2,511 އަކަމީޓަރުގެ ސަރަޙައްދެއްގައި ސަބްގްރޭޑް ކޮނުމާއި، އޭބީސީ ފަށަލަ އަޅައި ކޮމްޕެކްޓް ކުރުމުގެ އިތުރުން ޕްރައިމް ކޯޓް ޖަހައި ފައިނަލް ތާރު އެޅުމުގެ މަސައްކަތް ކުރިއަށްދާނެއެވެ. ސެގްމަންޓް 1 ގެ އިތުރުން ސެގްމަންޓް 2 އަދި 3 ގެ މަސައްކަތްތައް ވެސް އެއްފަހަރާ ކުރިއަށް ގެންދިއުމަށް ވަނީ ރޭވިފައެވެ. އަދި ބަސް ހުއްޓާ ސަރަޙައްދުތަކުގެ ޕޭވްމަންޓްތަކަށް ބަދަލު ގެނެސް، ބަރު އުޅަނދުތަކަށް ކެތްކުރެވޭނެ ގޮތަށް ޑިޒައިން ކުރުމުގެ މަސައްކަތްވެސް ރޭވިފައިވެއެވެ.

މި މަސައްކަތްތައް އަންނަ ނޮވެންބަރު މަހު ނިންމާލުމަށް ހަމަޖެހިފައިވާއިރު، އަމީނީ މަގު އަލުން މަރާމާތު ކުރުމުގެ އިތުރުން ބޮޑުތަކުރުފާނު މަގުގައި ކުރިން ތާރުއަޅާފައިވާ ސަރަޙައްދުތަކުގައި ހަލާކުވެފައި ހުރި ތަންތަން މަރާމާތު ކުރުމަށް ވެސް ވަނީ ހަމަޖެހިފައެވެ.

އަމީނީ މަގު ތަރައްޤީކުރުމުގެ މަޝްރޫޢުގެ ދަށުން 1.79 ކިލޯމީޓަރުގެ މަގު ތަރައްޤީކޮށް ނިންމާފައިވަނީ 2024 ވަނަ އަހަރުގެ ޖަނަވަރީ މަހުގައެވެ. މި މަސައްކަތަށް މިދިޔަ ސަރުކާރުގައި 84.4 މިލިޔަން ރުފިޔާ ޚަރަދުކޮށްފައިވެއެވެ.