ރައީސް ޔާމީން މަސައްކަތް ކުރަނީ ރައީސް މުޢިއްޒަށް އޮތް ހަސަދައެއްގެ ސަބަބުން ތަރައްޤީ ހުއްޓުވަން: ފަލާޙް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޤައުމަށް ގެންނަވަމުންދާ ތަރައްޤީއާއި އިންވެސްޓްމެންޓްތައް ހުއްޓުވުމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ކުރައްވާ މަސައްކަތްތަކުން ހާމަވަނީ،  ރައީސް ޔާމީންގެ ހިތުގައި ރައީސް ޑރ. މުޢިއްޒުގެ މައްޗަށް އޮތް ހަސަދަވެރިކަން ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާޙް ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ފަލާޙް ވިދާޅުވީ ރައީސް ޔާމީނުގެ ވެރިކަމުގައި ޤާނޫނުއަސާސީއަށް އިސްލާހު ގެނެސްގެން ބޭރުގެ ފަރާތްތަކަށް ރާއްޖޭގެ ބިން މިލްކުކުރެވޭ ގޮތް ހެއްދެވި ކަމަށެވެ. އަދި އެ އިސްލާހު ތަސްދީގު ކުރެއްވުމަށްފަހު ފުންނޭވާއެއް ލައްވައި، ރައީސް ޔާމީން އެކަމާ އުފާފާޅުކުރެއްވި ނަމަވެސް، އެއިރުގެ އިދިކޮޅު އެމްޑީޕީއާއި ކުރީގެ ނައިބު ރައީސް ޑރ. މުޙައްމަދު ޖަމީލް އަޙްމަދު ހިމެނޭހެން ގިނަ ފަރާތްތަކަކުން އެކަމަށް ފާޑުކިޔަމުން ދިޔަކަން ފަލާޙް ފާހަގަކުރެއްވިއެވެ.

ފަލާޙް ވިދާޅުވީ، މިއަދު ރައީސް ޑރ. މުޢިއްޒު ރާއްޖޭގެ ތާރީޚުގައި ގެނެވޭ އެންމެ ބޮޑު އިންވެސްޓްމެންޓް ކަމުގައިވާ 'ރަސްމާލެ' މަޝްރޫޢު ކުރިއަށް ގެންދަވަނީ ބޭރުގެ ފަރާތްތަކަށް ބިން މިލްކުވާ ގޮތަށް ނޫން ކަމަށެވެ. އަދި ދިވެހި ބިމުގެ މިލްކުވެރިންނަކީ ދިވެހިން ކަމަށް ރައީސް ޑރ. މުޢިއްޒު ޤަބޫލުފުޅު ކުރައްވައިގެން، ޤައުމުގެ އިސްތިޤުލާލަށާއި ދަޢުލަތަށް ކުޑަވެސް ގެއްލުމެއް ނުވާނޭހެން ކަންކަން ކުރައްވަމުން ގެންދަވާ ކަމަށް އޭނާ ވިދާޅުވިއެވެ.

ނަމަވެސް، މި ޤާނޫނުތަކުގެ ތެރެއިން މިއަދު ރައީސް ޑރ. މުޢިއްޒު ގެންނަވާ ތަރައްޤީއަށް ރައީސް ޔާމީން ހުރަސްއަޅުއްވަން އުޅުއްވުމަކީ އެމަނިކުފާނުގެ ހިތުގައި ޤައުމާމެދު އެއްވެސް ރަހުމެއް ނެތްކަން ދައްކުވައިދޭ ކަމެއް ކަމަށް ފަލާޙް ތުހުމަތު ކުރެއްވިއެވެ. މީގެއިތުރުން، ރައީސް ޔާމީނަށް ނުކުރެވުނު ކަންކަން ރައްޔިތުންނަށް ފައިދާވާނެހެން ރައީސް މުޢިއްޒު ކުރައްވަމުން ގެންދަވާތީ އެކަމާ ހަސަދަވެރިވަނީތޯވެސް ފަލާޙް ވަނީ ސުވާލު އުފައްދަވާފައެވެ.

ފަލާޙްގެ ޕޯސްޓް ނިންމަވާލައްވަމުން ވަނީ، މި ޤައުމަށް ހެޔޮއެދޭ ކޮންމެ ރައްޔިތަކުވެސް ރައީސް ޔާމީނަށާއި، މިފަދައިން ޤައުމަށް ނިކަމެތިކަން ދޭން މަސައްކަތްކުރާ ހުރިހާ ފަރާތްތަކަށް "ނޫނެކޭ" ބުނަންޖެހޭ ކަމަށް ވިދާޅުވެފައެވެ.