އޮގަސްޓް މަހު ރާއްޖޭގެ އިންފްލޭޝަން ދަށަށް ހިނގައްޖެ

ދުންފަތުގެ ބާވަތްތަކާއި، ކަރަންޓު އަދި ބައިނަލްއަޤްވާމީ ވައިގެ ދަތުރުފަތުރުގެ އަގުތަކަށް އައި ބަދަލުތަކާ ގުޅިގެން، ޖުލައި މަހާ އަޅާބަލާއިރު މިއަހަރުގެ އޮގަސްޓް މަހު ރާއްޖޭގެ އިންފްލޭޝަން ނުވަތަ ކޮންޒިއުމާ ޕްރައިސް އިންޑެކްސް (ސީޕީއައި) 1.15 އިންސައްތަ ދަށަށް ހިނގައްޖެއެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން 28 ސެޕްޓެމްބަރު 2026 ގައި ޢާންމުކުރި އެންމެ ފަހުގެ ހިސާބުތައް ދައްކާގޮތުން، ޖުލައި މަހު އިންފްލޭޝަން 0.24 އިންސައްތަ ދަށްވި ނަމަވެސް، އޮގަސްޓް މަހު އަގުތައް ދަށަށް ދިޔަ މިންވަރު ވަނީ ބޮޑުތަނުން އިތުރުވެފައެވެ.

މަހުން މަހަށް ބަލާއިރު އަގުތައް ދަށަށް ދިޔަ ނަމަވެސް، 2025 ވަނަ އަހަރުގެ އޮގަސްޓް މަހާ އަޅާބަލާއިރު 2026 ވަނަ އަހަރުގެ އޮގަސްޓް މަހު މުދަލާއި ޚިދުމަތުގެ އަގުތައް ވަނީ 0.76 އިންސައްތަ މައްޗަށް ގޮސްފައެވެ. ނަމަވެސް މިއީ އޭގެ ކުރީ މަހު އަހަރުން އަހަރަށް ބެލިއިރު ރެކޯޑުކުރެވުނު 2.31 އިންސައްތައިގެ ކުރިއެރުމާ އަޅާބަލާއިރު ދަށް އަދަދެކެވެ. މީގެއިތުރުން، މަހުގެ ބާވަތްތައް ނުހިމަނައި ބަލާއިރު، އޮގަސްޓް މަހު ސީޕީއައި ވަނީ 1.26 އިންސައްތަ ދަށްވެފައެވެ.

ދުންފަތުގެ އަގުތަކަށް ބޮޑު ބަދަލުތައް

އޮގަސްޓް މަހު އަގުތައް އެންމެ ބޮޑަށް ދަށަށް ގޮސްފައިވަނީ ދުންފަތާއި ސުޕާރީގެ ބައިންނެވެ. އެ ބައިން 22.63 އިންސައްތައިގެ ދަށްވުމެއް ރެކޯޑުކުރެވުނު އިރު، މީގެ މައިގަނޑު ސަބަބަކީ ސިގިރޭޓުގެ އަގު 31.64 އިންސައްތަ އަދި ކެފޭ/ރެސްޓޯރެންޓްތަކުން ވިއްކާ ސިގިރޭޓުގެ އަގު 17.76 އިންސައްތަ ދަށަށް ދިއުމެވެ.

އެމްބީއެސް އިން ހާމަކުރި ގޮތުގައި މި ބަދަލު އައިސްފައިވަނީ ޖުލައި 2026 ގައި ދުންފަތުގެ ބާވަތްތަކުގެ އިމްޕޯޓް ޑިއުޓީއަށް ގެނައި ބަދަލުތަކާ ގުޅިގެންނެވެ.

ކަރަންޓާއި ދަތުރުފަތުރުގެ ޚަރަދުތައް ކުޑަވުން

ބޯހިޔާވަހިކަމާއި، ފެނާއި، ކަރަންޓު އަދި ގޭހުގެ އަގުތައް ވަނީ 0.49 އިންސައްތަ ދަށަށް ގޮސްފައެވެ. މި ބައިން އެންމެ ބޮޑު ދައުރެއް އަދާކުރީ ކަރަންޓުގެ ޔުނިޓު އަގު 3.21 އިންސައްތަ ހެޔޮވުމެވެ. ނަމަވެސް ގޭހުގެ އަގު ވަނީ 0.82 އިންސައްތަ އުފުލިފައެވެ.

ދަތުރުފަތުރުގެ ޚަރަދުތަކަށް ބަލާއިރު، ޖުމްލަ ގޮތެއްގައި 0.73 އިންސައްތައިގެ ދަށްވުމެއް ފާހަގަކުރެވުނު އިރު، އެންމެ ބޮޑު ބަދަލެއް އައީ ބައިނަލްއަޤްވާމީ ވައިގެ ދަތުރުފަތުރުގެ ޓިކެޓް އަގުތައް 8.41 އިންސައްތަ ހެޔޮވުމުންނެވެ.

ކާބޯތަކެއްޗާއި އެހެނިހެން ޚިދުމަތްތަކުގެ އަގު އުފުލުން

އެހެން ދާއިރާތަކުގެ އަގުތައް ދަށަށް ދިޔަ ނަމަވެސް، މަހުގެ ބާވަތްތައް ހިމެނޭހެން ކާބޯތަކެތީގެ އަގު ވަނީ 0.96 އިންސައްތަ މައްޗަށް ގޮސްފައެވެ. މީގެ ތެރޭގައި:

ކަނޑުމަސް: 5.65 އިންސައްތަ
ކުކުޅުބިސް: 6.58 އިންސައްތަ
ގިތެޔޮ މިރުސް: 11.53 އިންސައްތަ
ކެރެޓް: 16.75 އިންސައްތަ
އޮރެންޖު: 11.62 އިންސައްތަ
ކިއުކަމްބާ: 7.94 އިންސައްތަ
ވިޔަނު (ގްރޭޕްސް): 7.42 އިންސައްތަ
ކަރާ: 9.58 އިންސައްތަ
މީގެ އިތުރުން ފަޅޯ، ޓޮމާޓޯ، ކައްޓަލަ، ކޮޕީފަތް އަދި ތޮޅީގެ އަގުތައްވެސް ވަނީ އުފުލިފައެވެ. ނަމަވެސް ފިޔާގެ އަގު 15.50 އިންސައްތަ، ލުނބޯ 7.37 އިންސައްތަ އަދި ފަރުމަހުގެ އަގު 1.62 އިންސައްތަ ވަނީ ދަށަށް ގޮސްފައެވެ.

އަދި ހަމައެއާއެކު، މޮބައިލް މުވާސަލާތީ ޚިދުމަތްތަކުގެ އަގު 2.23 އިންސައްތަ އުފުލުމާ ގުޅިގެން އިންފޮމޭޝަން އެންޑް ކޮމިއުނިކޭޝަން ދާއިރާގެ އަގުތައް 0.81 އިންސައްތަ މައްޗަށް ގޮސްފައިވެއެވެ. އަދި ހެދުން އެޅުމާއި ފައިވާނުގެ އަގުތައް 0.87 އިންސައްތަ، އަދި ރެސްޓޯރެންޓާއި ހޮޓާ ފަދަ ތަންތަނުގެ އަގުތައް 0.77 އިންސައްތަ ވަނީ މައްޗަށް ގޮސްފައެވެ.

އަހަރުން އަހަރަށް ބަލާއިރު އެންމެ ބޮޑު އިންފްލޭޝަނެއް ރެކޯޑުކުރެވިފައިވަނީ ދަތުރުފަތުރުގެ ދާއިރާއިން (8.06 އިންސައްތަ) އަދި ކާބޯތަކެތީގެ ބައިން (5.69 އިންސައްތަ) އެވެ. އެންމެ ބޮޑަށް ދަށަށް ގޮސްފައިވަނީ ދުންފަތާއި ސުޕާރީގެ ބައިން (26.17 އިންސައްތަ) ކަމަށް އެމްބީއެސްގެ ހިސާބުތަކުން ދައްކައެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްގެ ސީޕީއައި ބޭސް ޕީރިއަޑެއްގެ ގޮތުގައި ބަލަނީ ނޮވެމްބަރު 2022 އެވެ.