ޓްރެފިކް ގަވާއިދުތަކާ ތަކުރާރުކޮށް ހިލާފުވާނަމަ ހާއްސަ ފިޔަވަޅުތަކެއް އަޅަނީ

މާލޭގެ މަގުމަތީގެ ޓްރެފިކް އާންމު އުސޫލުތަކާއި އަދަބުތަކަށް ނުބަލާ ފަރާތްތަކުގެ ސަބަބުން ނުރައްކާތެރި ހާދިސާތައް ހިނގަމުންދާތީ، ޓްރެފިކް ގާނޫނާއި ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހާއްސަ ފިޔަވަޅުތަކެއް އެޅުމަށް ދިވެހި ފުލުހުންގެ ޚިދުމަތުން ނިންމައިފިއެވެ.

ކޮމިޝަނަރ އޮފް ޕޮލިސް އަޙްމަދު މުޙައްމަދުގެ މެސެޖެއްގައި ވިދާޅުވީ، މަގުމަތީގެ ޓްރެފިކް އާންމު އުސޫލުތަކާއި އަދަބުތަކަށް ނުބަލާ އުޅޭ މަދު ބައެއްގެ ސަބަބުން ގިނަ ބައެއްގެ ހައްގުތައް ގެއްލި، ނުރައްކާތެރި އެކިއެކި ހާދިސާތައް ތަކުރާރުކޮށް ދޭތެރެ ދޭތެރެއިން ހިނގަމުންދާ ކަމަށެވެ. އެހެންކަމުން، މިފަދަ ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހާއްސަ ފިޔަވަޅުތަކެއް އެޅުމަށް ހަމަޖެހިފައިވާ ކަމަށެވެ.

މި ފިޔަވަޅުތަކުގެ މައިގަނޑު މަގުސަދަކީ މަގުތަކަކީ އެންމެހާ ރައްޔިތުންނަށް ވެސް ރައްކާތެރި އަމާން ތަނެއްގެ ގޮތުގައި ބޭއްވުމާއި، މަދު ބައެއްގެ ސަބަބުން ތަކުރާރުކޮށް ހިނގަމުންދާ މިފަދަ ނުރައްކާތެރި ހާދިސާތައް ހުއްޓުވުމަށް އެޅެންހުރި އެންމެ ހަރުކަށި ފިޔަވަޅުތައް އެޅުން ކަމަށް ސީޕީ ފާހަގަކުރެއްވިއެވެ.

މީގެއިތުރުން، ކަމާގުޅުންހުރި އެންމެހާ މުއައްސަސާތަކާ ގުޅިގެން މި ފިޔަވަޅުތައް އެންމެ މަތީ ދަރަޖައެއްގައި އަޅަމުން ގެންދިއުމަށް ފުލުހުންގެ ކަމާބެހޭ އެންމެހާ ޔުނިޓްތަކަށް މިހާރު އަންގަވާފައިވާ ކަމަށްވެސް ވިދާޅުވިއެވެ. އަދި މި ފިޔަވަޅުތައް ގްރޭޓަރ މާލެ ސަރަހައްދުގެ އިތުރުން އަތޮޅުތެރޭގެ ރަށްރަށުގައިވެސް އަޅަމުން ގެންދާނެ ކަމަށް ވަނީ ހާމަކުރައްވާފައެވެ.

ކޮމިޝަނަރ އޮފް ޕޮލިސް ވަނީ މިކަމުގައި އެންމެހާ ފަރާތްތަކުގެ އެހީތެރިކަމާއި އެއްބާރުލުން ދިވެހި ފުލުހުންނަށް ދެއްވުމަށް އިލްތިމާސްކުރައްވާފައެވެ.

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހަރުކަށި ފިޔަވަޅު އެޅުމާ ގުޅޭގޮތުން ކޮމިޝަނަރ އޮފް ޕޮލިސް ދެއްވި މެސެޖު pic.twitter.com/mfFLxF7hxT

— Maldives Police (@PoliceMv) September 29, 2026