މަޖިލީހުގެ އެންމެ މެންބަރަކު ފިޔަވައި އެހެން ހުރިހާ މެންބަރުން މާލީ ބަޔާންތައް އާންމުކޮށްފި

ރައްޔިތުންގެ މަޖިލީހުގެ އެންމެ މެންބަރަކު ފިޔަވައި އެހެން ހުރިހާ މެންބަރުން މާލީ ބަޔާންތައް އާއްމުކޮށްފިއެވެ. 

 މަޖިލީސް މެންބަރުންގެ މާލީ ބަޔާންތައް ހުށަހަޅަންޖެހެނީ އެ މެންބަރަކު ހުވާ ކުރާ ތާރީޚުން ފެށިގެން އަހަރު ދުވަސް ހަމަވުމުން ކަމަށްވާއިރު، މިހާރު ތިއްބެވި 20 ވަނަ މަޖިލީހުގެ މެންބަރުން މާލީ ބަޔާންތައް ހުށަހަޅަންޖެހެނީ ކޮންމެ އަހަރެއްގެވެސް އޯގަސްޓް މަހުގެ 31 ވަނަ  ދުވަހާ ހަމައަށެވެ.

މި މުއްދަތުގައި 93  މެންބަރުންގެ ތެރެއިން 91 މެންބަރުން ވަނީ ބަޔާންތައް ހުށަހަޅުއްވާފައެވެ. ބަޔާން ހުށަނާޅުއްވަނީ މައްޗަންގޮޅި އުތުރު ދާއިރާގެ މެންބަރު އިބްރާހީމް މުޙައްމަދެވެ.

މެންބަރުންގެ މާލީ ބަޔާންތައް  މަޖިލީހުގެ ވެބްސައިޓުގައި މިހާރު އާއްމުކޮށްފައިވާއިރު، މިއީ 20 ވަނަ މަޖިލީހުގެ މެންބަރުން ހުށަހަޅުއްވާ ދެވަނަ މާލީ ބަޔާންތަކެވެ.

ރައްޔިތުންގެ މަޖިލީހުގައި ހިތަދޫ އުތުރު ދާއިރާ ތަމްސީލުކުރެއްވި ކުރީގެ މެމްބަރު މުޙައްމަދު ސިނާން ވެސް ދެވަނަ މާލީ ބަޔާން މަޖިލީހުގެ އިދާރާއަށް ފޮނުއްވާފައިވެއެވެ. މިއަހަރުގެ އޭޕްރީލް މަހުގެ ތެރޭގައި ސިނާންގެ ގޮނޑި ގެއްލުނު ކަމުގައި ވިޔަސް، އެ ތާރީޚާ ހަމައަށް މަޖިލީސް މެންބަރެއްގެ ޒިންމާ އަދާކުރައްވާފައިވާތީ މާލީ ބަޔާން ހުށަހެޅުމަކީ ލާޒިމު ކަމެކެވެ.

މަޖިލީހުގެ މިހާރުގެ މެންބަރުންގެ ތެރެއިން މާލީ ބަޔާން ހުށަހެޅުމުގެ ޒިންމާއިން އިސްތިސްނާވަނީ ހިތަދޫ އުތުރު ދާއިރާއަށް އަލަށް އިންތިޚާބުވެވަޑައިގެންނެވި ޢަބްދުﷲ ޞާދިޤު އެކަންޏެވެ. ސަބަބަކީ އޭނާ މެންބަރުކަމުގެ ހުވާކުރައްވާފައިވަނީ މިއަހަރުގެ ޖޫން މަހުގެ 15 ވަނަ ދުވަހު ކަމަށްވާތީ، މި ދައުރަށް މާލީ ބަޔާން ހުށަހަޅަންޖެހޭ މުއްދަތުގެ ތެރޭގައި އޭނާ ނުހިމެނޭތީއެވެ.