ޢިލްމީ ތެދުވެރިކަމާއި ނަފްސުގެ އަޚްލާޤު އިސްކުރާ ބަޔަކަށްވުމަށް ވަޒީރު ހީނާ ގޮވައިލައްވައިފި

ވިލާ ކޮލެޖުން މިއަހަރު ދަސްވެނިވި ދަރިވަރުންނަކީ ހަމައެކަނި މަޢުލޫމާތުން މުއްސަނދި ބަޔަކަށްވުމުގެ ބަދަލުގައި، ޢިލްމީ ތެދުވެރިކަމާއި ނަފްސުގެ އަޚްލާޤު އިސްކުރާ ނަމޫނާބަޔަކަށްވުމަށް ފަންނާއި ސަގާފަތާއި ތަރިކައާ ބެހޭ ވަޒީރު ހީނާ  ވަލީދު  ގޮވައިލައްވައިފިއެވެ.

ވަޒީރު މިކަމަށް ގޮވާލެއްވީ ވިލާ ކޮލެޖްގެ މިއަހަރުގެ ދަސްވެނިވުމުގެ ޖަލްސާގެ ފުރަތަމަ ދަންފަޅީގައި ހިންގުމުގެ ދާއިރާ، އުނގަންނައިދިނުމާއި ކިޔަވައިދިނުމުގެ ދާއިރާއިން ސަނަދު ޙާޞިލްކުރި ދަރިވަރުންގެ ދަސްވެނިވުން ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

ވަޒީރުގެ ވާހަކަފުޅުގައި ވަނީ ފިކުރީ ވިސްނުންތަކާ ޢިލްމީ ސިކުނޑިތަކެއް އުފަންކޮށްގެން ނުފުދޭނެކަން ފާހަގަކުރައްވާ، ޤައުމަކަށް ބޭނުންވާނީ ހަރުދަނާ އަޚްލާޤީ ޤިޔަމްތަކެއްގެ މަތީގައި ތިބޭ ބަޔެއްކަމަށް ވިދާޅުވެފައެވެ. މިގޮތުން ބޭނުންވަނީ އިންސާނީ ކަރާމާތަށް ޙުރުމަތްތެރިކޮށް ހިތާ، އެކަކު އަނެކަކުގެ ޚިޔާލަށް އިޙްތިރާމްކުރުމާއި، ކޮންމެ ކަމެއްގެވެސް ޙަޤީޤަތް ބެލުމާއި، ތިމާފަދަ އަނެކުންނަށްވެސް އިޙްތިރާމް ކުރުމުގެ ތަހުޒީބީ ސިފަތައް އަށަގަނެފައިވާ ބައެއްކަމަށް ވަޒީރު ވިދާޅުވިއެވެ.

އަދި ޢިލްމު ޙާޞިލްކުރާ ފަރާތްތައް މިފަދަ ސިފަތަކުގެ ނަމޫނާއަށް ވާންޖެހޭކަމަށް ވަޒީރު ހީނާ ވިދާޅުވިއެވެ. ޤައުމެއްގައި ޢިލްމީ ރޫޙެއް ބިނާކޮށް ފިކުރީ ވިސްނުންތަކެއް އާލާކުރެވެނީ އެ ޤައުމެއްގެ ތަރުބަވީ ނިޒާމާ ތަޢުލީމީ ނިޒާމުގެ ތެރެއިންކަމުގައިވާއިރު، ޢިލްމީ ރޫޙެއް އުފައްދާ އީޖާދީ އަދި ފިކުރީ ވިސްނުންތަކެއްގެ މަތީގައި ޤައުމެއް ދެމެހެއްޓުމުގެ އެންމެ ބޮޑު އެއް މަސްއޫލިއްޔަތެއް އެޅިފައި ވަނީ ތަރުބިއްޔަތު ކުރުމާ އުނގަންނައިދިނުމުގެ ދާއިރާގެ ބޭފުޅުންގެ އިސްތަށިފުޅުގައި ކަމަށް ވަޒީރު ވިދާޅުވިއެވެ.

އެހެންކަމުން ޤައުމު އެއް ޖީލުން އަނެއް ޖީލަށް ނަގަހައްޓައިދޭ އެއް ބަޔަކީ އެ ޤައުމެއްގައި އުނގަންނައިދިނުމުގެ ދާއިރާގެ ބޭފުޅުންކަން ވަޒީރު ފާހަގަކުރެއްވިއެވެ.

އަދި ޢިލްމީ މީހުންގެ ގޮތުގައި މުޖުތަމަޢުގެ ތެރެޔަށް ނުކުންނައިރު، މަޢުލޫމާތުގެ މުއްސަނދިކަމާއި އެއްވަރަށް ޢިލްމީ ތެދުވެރިކަމާއި ނަފުސުގެ އަޚްލާޤުގެ މުހިންމުކަން ވަޒީރު ހީނާ ފާހަގަކުރެއްވިއެވެ. އަދި ޙާޞިލުކުރާ ސަނަދަކީ ހަމައެކަނި ލިޔުމެއް ނޫންކަމާއި، އެ މަސްއޫލިއްޔަތު އަދާކުރުމަށް ލިބިފައިވާ ހުނަރުގެ ބޭނުންކޮށް ޤައުމަށް ޚިދުމަތްކުރެއްވުމަށް ވެސް ވަޒީރު ވަނީ  ގޮވާލައްވާފައެވެ.

ވަޒީރުގެ ވާހަކަފުޅުގައި ޤައުމުގެ އިޖްތިމާޢީ ފޭރާމާއި އަޚްލާޤީ މިންގަނޑާމެދު ފުންކޮށް ވިސްނާ ފިކުރުކޮށް، މިކަންކަން ހަމަ މަގަށް އަޅުވާ މި ޙާލަތު ބަދަލު ކުރުމަށް އިސްނަގާ މޭސްތިރިންނަށް ވެވަޑައިގެންނެވުމަށް ވަނީ އިލްތިމާސްކުރައްވަވާފައެވެ.

ވިލާ ކޮލެޖްގެ މިއަހަރުގެ ދަސްވެނިވުމުގެ ފުރަތަމަ ދަންފަޅީގައި 201 ދަރިވަރުން ވަނީ ދަސްވެނިވެފައެވެ.