ތިލަފުށީ ބަނދަރު މަޝްރޫއުގެ 100 މީޓަރުގެ ކީވޯލްގެ މަސައްކަތް ނިމިއްޖެ

ތިލަފުށީގައި ތަރައްގީކުރަމުން އަންނަ ބަނދަރު މަޝްރޫއުގެ ދަށުން އެމްޓީސީސީއާ ހަވާލުކޮށްފައިވާ 100 މީޓަރުގެ ކީވޯލްގެ މަސައްކަތް އެ ކުންފުނިން އެއްކޮށް ނިންމާލައިފިއެވެ. 

ސެޕްޓެމްބަރު މަހުގެ ނިޔަލަށް މި މަޝްރޫއުގެ އަދާހަމަ ހިއްސާކުރެއްވުމަށް އިގުތިސާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުހައްމަދު ސައީދު ޕޯސްޓުކުރެއްވި ވީޑިޔޯގައި ވަނީ، މިހާރު ކުރިއަށް ދަނީ ޔާޑުގެ ޕޭވިންގް މަސައްކަތްތައް ކަމަށާއި އެ މަސައްކަތް އޮކްޓޯބަރު މަހުގެ ކުރީކޮޅު ނިމޭނެ ކަމަށް ލަފާކުރެވޭ ކަމަށެވެ.

މި ސަރަހައްދަކީ ޑޮމެސްޓިކް އޮޕަރޭޝަންތަކަށް ހާއްސަކޮށްގެން ތަރައްގީކުރާ ސަރަހައްދެކެވެ. މަސައްކަތްތައް ފުރިހަމަވުމުން، މާލޭ ވިޔަފާރި ބަނދަރުގައި މިހާރު ކުރިއަށްދާ ދޯނިފަހަރުގެ ކާގޯ ކްލިއަރެންސްގެ މަސައްކަތްތައް ތިލަފުއްޓަށް ބަދަލުކުރެވިގެންދާނެއެވެ. ތިލަފުށީގައި މި ހިދުމަތް ފެށުމަށް ޓަކައި ގާއިމުކުރަންޖެހޭ ވަގުތީ ވޯކްޝޮޕް، ކެންޓީން، އޮފީސް، މަޖޫރީ ވެއިޓިން އޭރިއާ އަދި މިސްކިތް ހެދުމުގެ މަސައްކަތްތައް އެމްޕީއެލްއިން މިހާރު ދަނީ ބާރަށް ކުރިއަށްގެންދަމުންނެވެ.

މީގެއިތުރުން، ތިލަފުށީގައި ތަރައްގީކުރާ ބައިނަލްއަގުވާމީ ބަނދަރުގެ 375 މީޓަރުގެ ކީވޯލާއި، 2 ކިލޯމީޓަރުގެ ޑޮމެސްޓިކް ކީގެ ބައެއް މަސައްކަތްތައް ހަވާލުކޮށްފައިވާ ޗައިނާ ހާބަރ އިންޖިނިއަރިން ކޮމްޕެނީން ވެސް ދަނީ ބާރު ސްޕީޑެއްގައި އަމަލީ މަސައްކަތް ކުރަމުންނެވެ. އެގޮތުން 820 މީޓަރުގެ ޑޮމެސްޓިކް ކީއަށް ބޭނުންވާ ބިން ހިއްކުމުގެ މަސައްކަތުގެ 40 އިންސައްތަ މިހާރު ނިމިފައިވާއިރު، ކީވޯލްގެ ޕްރީކާސްޓް ޔުނިޓްތައް ހެދުމުގެ މަސައްކަތް އޮކްޓޯބަރު މަހު ފެށޭނެއެވެ.

ބަނދަރުގެ އޮޕަރޭޝަންތައް ހިންގުމަށް ބޭނުންވާ އިކުއިޕްމަންޓު ހޯދުމުގެ މަސައްކަތް ވެސް އެމްޕީއެލްއިން ވަނީ ފަށާފައެވެ. އެގޮތުން 2 ޝިޕް-ޓު-ޝޯ ކްރޭނާއި، 1 މޮބައިލް ހާބާ ކްރޭން ހޯދުމުގެ މަސައްކަތް ކުރިއަށްދާއިރު، އެމްޕީއެލްގެ އަމާޒަކީ 2027 ވަނަ އަހަރުގެ އޮކްޓޯބަރު 15 ގެ ކުރިން އެ ތަކެތި ރާއްޖެ ގެނައުމެވެ.

މި ބަނދަރުގެ އިތުރު އުމްރާނީ ވަސީލަތްތައް ގާއިމުކުރުމަށް ކޮންޓްރެކްޓަރުން ހޯދުމުގެ މަސައްކަތް ކުރިއަށްދާއިރު، ތާވަލުކުރެވިފައިވާ ގޮތުން ޑޮމެސްޓިކް ކީގެ މަސައްކަތްތައް 2026 ވަނަ އަހަރުގެ ނޮވެމްބަރުގެ ނިޔަލަށް އެއްކޮށް ނިންމާލެވޭނެއެވެ. އަދި އިންޓަނޭޝަނަލް ކީގެ މަސައްކަތް ފުރިހަމަކުރެވޭނީ 2027 ވަނަ އަހަރުގެ ޖުލައި މަހުގެ ތެރޭގައެވެ.

ތިލަފުށީގައި ޤާއިމުކުރެވޭ މި ޒަމާނީ ބައިނަލްއަޤްވާމީ ބަނދަރަކީ ވިޔަފާރި މުދާ އެތެރެކުރުމާއި ބޭރުކުރުމުގެ ކަންކަން މިހާރަށްވުރެ އަވަސް އަދި ހަރުދަނާ ނިޒާމަކުން ކުރިއަށް ގެންދިއުމަށްޓަކައި ސަރުކާރުން ހާއްސަ އިސްކަމެއް ދެއްވައިގެން ކުރިއަށްގެންދަވާ މުހިންމު މަޝްރޫއެކެވެ.