ނިއަމް ރެސިޑެންސްގެ ޔުނިޓުތައް ވިއްކުމަށް ޢާންމުކޮށް ހުޅުވާލާނެ: ޙައްޖު ކޯޕަރޭޝަން

ހުޅުމާލޭގައި މޯލްޑިވްސް ޙައްޖު ކޯޕަރޭޝަން ލިމިޓެޑްގެ ފަރާތުން ތަރައްގީކުރުމަށް ހަމަޖެހިފައިވާ "ނިއަމް ރެސިޑެންސް"ގެ ޔުނިޓުތައް ވިއްކުމަށް އާންމުކޮށް ހުޅުވާލާނެ ކަމަށް ޙައްޖު ކޯޕަރޭޝަނުން ވިދާޅުވެއްޖެއެވެ.

ހައްޖު ކޯޕަރޭޝަނުން މިކަން ހާމަކޮށްފައި ވަނީ"ނިއަމް ރެސިޑެންސް" ގެ އެޕާޓްމަންޓު ޔުނިޓުތަކާ ގުޅޭ ނެރުނު ނޫސްބަޔާނެއްގައެވެ.

މި ނޫސް ބަޔާނުގައި ވަނީ، "ނިއަމް ރެސިޑެންސް"އަކީ މޯލްޑިވްސް ޙައްޖު ކޯޕަރޭޝަންގެ މާލީ ހާލަތު ރަނގަޅުކޮށް ކުންފުންޏަށް މާލީ ފައިދާ ހޯދުމަށް ކުރެވެމުންދާ މަސައްކަތްތަކުގެ ތެރެއިން ތަރައްގީކުރުމަށް ހަމަޖެހިފައިވާ ލަގްޒަރީ ހައުސިން އިމާރާތެއްކަމަށެވެ.

މަޝްރޫއުގެ ދަށުން ތަރައްގީކުރެވޭ ކޮންމެ އެޕާޓްމަންޓު ޔުނިޓަކުން، ކުންފުންޏަށް އެންމެ ބޮޑު ފައިދާ ލިބޭނެހެން ޕްރޮޖެކްޓު ކުރިޔަށްގެންދިޔުމަށް ޓަކައި، ޔުނިޓުތަކުގެ އަގުތައް ކަނޑައެޅުމުގެ މަސައްކަތާއި، ޔުނިޓުތައް ވިއްކުމަށް އާންމުކޮށް ހުޅުވާލުމަށް ކުރަންޖެހޭ މަސައްކަތްތައް ހިނގަމުންދާކަން ޙައްޖު ކޯޕަރޭޝަނުމް ފާހަގަކުރެއްވިއެވެ.

އަދި މިކަންކަން ފުރިހަމަކުރުމަށް ފަހު، "ނިއަމް ރެސިޑެންސް"ގެ ޔުނިޓުތައް ވިއްކުމަށް އާންމުކޮށް ހުޅުވާލެވޭނެ ކަމަށާއި، މި މަސައްކަތްތަކުގެ ތެރެއިން، މުވައްޒަފުންނަށް އެޕާރޓްމަންޓުތައް ވިއްކުމަށް މިހާތަނަށް ކޮށްފައިވާ އެންމެހާ މުއާމަލާތްތައް ބާޠިލުކުރުމަށް ނިންމާފައިވާކަމަށް މޯލްޑިވްސް ޙައްޖު ކޯޕަރޭޝަނުން ވިދާޅުވެއެވެ.

މޯލްޑިވްސް ޙައްޖު ކޯޕަރޭޝަނުން ހުޅުމާލެ ފޭސް 2 ގައި ކުރިއަށްގެންދާ "ނިއަމް ރެސިޑެންސް" ހައުސިން މަޝްރޫއުގެ މައިގަނޑު މަޤްޞަދަކީ ކޯޕަރޭޝަންގެ އާމްދަނީ އިތުރުކޮށް، މާލީގޮތުން ބާރުވެރިވުންކަމަށް އެކުންފުނިން ވަނީ ވިދާޅުވެފައެވެ.