ވަޠަނީ ޚިދުމަތުގެ ތަމްރީނު ނިންމި ޒުވާނުންގެ ތެރެއިން 400 އެއްހާ ކުދިންނަށް ވަޒީފާ ހަމަޖެހިއްޖެ

ސަރުކާރުން އިސްނަގައިގެން ކުރިއަށްގެންދާ ދިވެހި ވަޠަނީ ޚިދުމަތުގެ ޕްރޮގްރާމް ކާމިޔާބުކަމާއެކު ނިންމި ބައިވެރިންގެ ތެރެއިން 400 އެއްހާ ޒުވާނުންނަށް ވަޒީފާގެ ފުރުޞަތު ފަހިކޮށްދެވިފައިވާ ކަމަށް މިނިސްޓްރީ އޮފް ޑިފެންސް އެންޑް ނޭޝަނަލް ސަރވިސްއިން ހާމަކޮށްފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން މިދިޔަ އަހަރުގެ އޮކްޓޫބަރު މަހުގެ 1 ވަނަ ދުވަހު ފެށި މި ޕްރޮގްރާމާ ގުޅޭގޮތުން، ދަޢުލަތުގެ މީޑިއާ ޕީއެސްއެމްގެ "ހެނދުނު ހެނދުނާ" ޕްރޮގްރާމުގައި ވާހަކަދައްކަވަމުން ޑިފެންސް މިނިސްޓްރީގެ ޑެޕިއުޓީ މިނިސްޓަރ ފާޠިމަތު މިޒުނާ ވިދާޅުވީ، ތަމްރީނު ފުރިހަމަކުރި ކުދިންގެ ތެރެއިން 543 ކުއްޖަކު ވަޒީފާއަށް އެދި ހުށަހަޅާފައިވާ ކަމަށެވެ.  އަދި އޭގެ ތެރެއިން 400 އެއްހާ ޒުވާނުންނަށް މިހާރު ވަޒީފާ ހަމަޖެހިފައިވާއިރު، ބާކީ ތިބި ކުދިންނަށް ވެސް އެކުދިން އެދޭ ދާއިރާތަކުން ކެރިއަރ ގައިޑެންސް ދީގެން ވަޒީފާގެ ފުރުޞަތުތައް ފަހިކޮށްދިނުމުގެ މަސައްކަތް ބާރަށް ކުރިއަށްދާ ކަމަށް އޭނާ ފާހަގަކުރެއްވިއެވެ.

"ގުޅިގެން މަސައްކަތް ކުރަން އެނގޭ، ދީނީ ވާޖިބުތައް އަސާކުރަން އިސްކަންދޭ، ނަފްސާނީގޮތުން ދުޅަހެޔޮ، ކަންކަމުގައި އިސްނަގައި އަމިއްލަ ކަންކަން މެނޭޖްކޮށްގެން އުޅެވޭނެފަދަ ކުދިންނަށް އެބަހަދާލެވޭ. ވަޒީފާގެ މާހައުލަށް ނުކުންނަށް ބޭނުންވާ ފަންނީ ހުނަރުތައް ދަސްކޮށްދެވޭ."

މިޒުނާ ވިދާޅުވިއެވެ.

މިޒުނާ ވިދާޅުވި ގޮތުގައި މި ޕްރޮގްރާމުގެ މައިގަނޑު މަޤްޞަދަކީ ދީނާއި ޤައުމަށް ލޯބިކުރާ، އަދި އަމިއްލަ ނަފްސަށް އިތުބާރު އޮތް ޒިންމާދާރު ޖީލެއް ބިނާކުރުމެވެ. މިއީ ރާއްޖޭގައި މިހާ ފުޅާ ދާއިރާއެއްގައި ޒުވާނުން ތަރުބިއްޔަތު ކުރުމަށް ހިންގޭ ފުރަތަމަ މިފަދަ ޕްރޮގްރާމްކަން ފާހަގަކުރައްވަމުން، މި ތަމްރީނުގެ ސަބަބުން ކުދިންގެ ކިބައިގައި އިސްލާމީ ރިވެތި އަޚްލާޤާއި ދީނީ ވާޖިބުތަކަށް ދޭ އަހައްމިއްޔަތުކަން އިތުރުވެ، ނަފްސާނީ ގޮތުންނާއި ޖިސްމާނީ ގޮތުން ބޮޑެތި ހެޔޮ ބަދަލުތަކެއް އައިސްފައިވާ ކަމަށް ވިދާޅުވިއެވެ. އަދި މަސައްކަތުގެ މާހައުލަށް ބޭނުންވާ ފަންނީ ހުނަރުތަކާއި، ގުޅިގެން މަސައްކަތް ކުރުމުގެ ޤާބިލުކަން ވެސް އެކުދިންނަށް ދަސްކޮށްދެވިފައިވާ ކަމަށް ވިދާޅުވިއެވެ.

"ޤައުމާ ހަވާލުވާންތިބި ޒުވާނުންނަށް ދީނީ ކަންކަމަށް އަހުލުވެރިކުރުވުމަށް ވަރަށް ބޮޑު އިސްކަމެއް ދެވޭ. ޤައުމީ ކަންކަމުގައިވެސް ހޭލުންތެރިކަން އިތުރުކޮށް، މިއީ މިހާ ފުޅާކޮށް ޒުވާނުން ބިނާކުރުމަށް ކުރިއަށްގެންދެވޭ ފުރަތަމަ ޕްރޮގްރާމް."

މިޒުނާ ވިދާޅުވިއެވެ.

ދިވެހި ވަޠަނީ ޚިދުމަތުގެ ޕްރޮގްރާމް އިތުރަށް ފުޅާކުރުމަށް ސަރުކާރުން ރާވާފައިވާ ކަންކަމަށް އަލިއަޅުއްވާލައްވަމުން މިނިސްޓްރީން ވިދާޅުވީ، ތަމްރީނު ނިންމާ 18 އަހަރު ނުފުރޭ ކުދިންނަށް އަމާޒުކޮށްގެން ޚާއްޞަ އިންޓާންޝިޕް ފުރުޞަތުތަކެއް ތަޢާރަފުކުރުމަށް ތައްޔާރުވަމުންދާ ކަމަށެވެ. މީގެއިތުރުން، މި ޚިދުމަތް ހަރުދަނާ ކުރުމުގެ ގޮތުން އެމްއެންޑީއެފްގެ ތަމްރީނު މަރުކަޒު، ކ. ގިރިފުށީގެ ފެސިލިޓީތައް އިތުރަށް ތަރައްޤީކޮށް، އެރަށުގައި ޒަމާނީ ފެންވަރުގެ "ނޭޝަނަލް ސަރވިސް ސެންޓަރެއް" ޤާއިމުކުރުމުގެ މަސައްކަތް ވެސް ކުރިއަށްދާ ކަމަށް އެ ވުޒާރާއިން ވަނީ ހާމަކޮށްފައެވެ.