ދިވެހި ވަޠަނީ ޚިދުމަތް ރައީސް ފެއްޓެވީ ވަރަށް މާތް މަގުސަދެއްގައި: މިޒްނާ

ދިވެހި ވަޠަނީ ޚިދުމަތުގެ ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް މާތް މަގުސަދެއްގައި ފެއްޓެވި މުހިންމު ޕްރޮގްރާމެއް ކަމަށް، ދިފާޢީ އަދި ވަޠަނީ ޚިދުމަތާ ބެހޭ ވުޒާރާގެ ޑެޕިއުޓީ މިނިސްޓަރ ފާތިމަތު މިޒްނާ ޢަލީ ވިދާޅުވެއްޖެއެވެ.

ޓީވީއެމްގެ ހެނދުނު ހެނދުނާ ޕްރޮގްރާމުގައި ވާހަކަދައްކަވަމުން، ޑެޕިއުޓީ މިނިސްޓަރ ވަނީ، މުޖުތަމައުގައި ވަރަށް ގިނަ އަދަދެއްގެ ކުދިން ދާނެ ވަކި މަގެއް ނޭނގި ބިކަވެފައި ތިބިކަން ފާހަގަކުރައްވާފައެވެ.

އެގޮތުން، ތަފާސްހިސާބުތަކުން ދައްކާ ގޮތުގައި ކޮންމެ އަހަރަކު އުމުރުން 16 އަހަރުގައި އޯލެވެލް ނިންމާ ކުދިންގެ ތެރެއިން ގާތްގަނޑަކަށް 1000 އެއްހާ ކުދިން ވަޒީފާއެއް ނުލިބި އަދި އިތުރަށް ތައުލީމު ހާސިލުކުރަން ނުގޮސް ތިބޭ ކަމަށް ޑެޕިއުޓީ މިނިސްޓަރ ވިދާޅުވިއެވެ.

މިފަދަ ކުދިން މުޖުތަމައުގައި ހުންނަ ނޭދެވޭ ކަންކަމަށް ހުށަހެޅުމުގެ ފުރުސަތު ބޮޑު ކަމަށާއި، އެ ކުދިންނަށް ފަހި ފުރުސަތުތަކެއް ހޯދައިދޭން ޖެހޭ ކަމަށް މިޒްނާ ވިދާޅުވިއެވެ. އަދި ކުރިއާ އަޅާބަލާއިރު، ވަގުތަށް ކަމޭހިތުމާއި، މުޖުތަމައުގައި އެހެން މީހުންނާ ގުޅިގެން އުޅުމުގައި މިހާރުގެ ބައެއް ކުދިންނަށް އުނިދަގޫކަން ވެސް  ޑެޕިއުޓީ މިނިސްޓަރ ފާހަގަކުރެއްވިއެވެ.

"މި ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ގާތުން ބައްލަވާއި، ވަރަށް މާތް މަގުސަދެއްގަ އިނީޝީއޭޓް ކުރެއްވި ޕްރޮގްރާމެއް."

ޑެޕިއުޓީ މިނިސްޓަރ ފާތިމަތު މިޒްނާ ޢަލީ ވިދާޅުވިއެވެ.

މި ޕްރޮގްރާމުގެ މައިގަނޑު މަގުސަދަކީ މުޖުތަމައަށް ބޭނުންތެރި، ރަނގަޅު ޖީލެއް ބިނާކުރުން ކަމަށް ޑެޕިއުޓީ މިނިސްޓަރ ވިދާޅުވިއެވެ. އޭގެ ތެރޭގައި ގައުމާއި ދީން ދެކެ ލޯބިވާ، އަމިއްލަ ނަފްސަށް އިތުބާރުކުރާ އަދި އަމިއްލަ ނަފުސު ދެކެ ލޯބިވާ، އަނެކުންނަށް އިހުތިރާމުކުރާ، ހުރިހާ ގޮތަކުންވެސް ފުރިހަމަ ޖީލެއް އުފެއްދުން ހިމެނެއެވެ.

"ދިވެހި ވަތަނީ ޚިދުމަތް" ރަސްމީކޮށް ފެށިގެން ދިޔައީ 1 އޮކްޓޫބަރު 2025 ގައެވެ. މި ޚިދުމަތް އިފްތިތާހު ކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު، ޅ. މާފިލާފުށީގައި ހުންނަ އެމްއެންޑީއެފް ކޮމްޕޮސިޓް ޓްރޭނިން ސެންޓަރުގައި ބޭއްވުނު ޚާއްސަ ރަސްމިއްޔާތެއްގައެވެ.

މި ޕްރޮގްރާމްގެ ތިން ބެޗުން ޖުމްލަ 1,028 ޒުވާނުން ވަނީ ވަތަނީ ޚިދުމަތުގެ އަސާސީ ތަމްރީނު ފުރިހަމަކޮށް، ޤައުމީ ޚިދުމަތަށް ތައްޔާރުވެފައިވާ ބައެއްގެ ގޮތުގައި މުޖުތަމައަށް ނުކުމެފައެވެ.