މިއަހަރުގެ ފަހު ކުއާޓަރުގައި ތިލަފުށީ ބަނދަރުގަައި ޑޮމެސްޓިކް އޮޕަރޭޝަންތައް ފެށޭނެ

މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ ބިޔަ މަޝްރޫޢުގެ މަސައްކަތްތައް ބާރު ސްޕީޑެއްގައި ކުރިއަށްދާކަމަށާއި، 2027 ވަނަ އަހަރުގެ ނޮވެމްބަރުމަހު އައު ބަނދަރު ރަސްމީކޮށް ހުޅުވައި ޚިދުމަތްދޭން ފަށާނެ ކަމަށް މި މަޝްރޫޢުގެ ތަފާސްހިސާބުތަކުން ދައްކައިފިއެވެ. 

މި މަޝްރޫޢުގެ އަމަލީ މަސައްކަތްތަކުގެ ތެރެއިން މައިގަނޑު މަސައްކަތްތައް ޖުލައި 2026 ގައި ފަށާފައިވާއިރު، ސެޕްޓެމްބަރު 2026 ގެ ނިޔަލަށް ފުރަތަމަ 100 މީޓަރުގެ ޑޮމެސްޓިކް މުދާ އަރުވާ ބާލާ ފާލަމުގެ ވަށާ ފާރުގެ މަސައްކަތް ވަނީ މުޅިން ނިންމާލާފައެވެ. 

އަދި ބަނދަރު ސަރަހައްދުގެ މަގުތައް ހެދުމުގެ މަސައްކަތް މިހާރު ކުރިއަށްދާއިރު، ބިން ހިއްކުމުގެ މަސައްކަތުގެ 40 އިންސައްތަ ވަނީ ނިމިފައެވެ.

މަޝްރޫޢުގެ ތާވަލްގައިވާ ގޮތުން، 2026 ގެ ފަހު ކުއާޓަރުގައި ޑޮމެސްޓިކް ފާލަމުގެ ފުރަތަމަ ބައި ބޭނުންކުރަން ފެށޭނެއެވެ. އަދި 2027 ވަނަ އަހަރުގެ ތެރޭގައި ބަނދަރުގެ ހުރިހާ މަސައްކަތްތަކެއް ނިންމާ، ނޮވެމްބަރު 2027 ގައި މާލޭ ބަނދަރުގެ ހުރިހާ އޮޕަރޭޝަނެއް ތިލަފުއްޓަށް ބަދަލުކުރެވިގެންދާނެކަމަށް ސަރުކާރުން ވިދާޅުވެއެވެ.

ތިލަފުށީގައި ޖުމްލަ 60 ހެކްޓަރުގެ ބޮޑު ސަރަހައްދެއްގައި ތަރައްޤީކުރާ މި އައު ބަނދަރަކީ ރާއްޖޭގެ ވިޔަފާރިއާއި ލޮޖިސްޓިކްސް ދާއިރާއަށް އިންގިލާބީ ބަދަލެއް ގެނުވާނެ މަޝްރޫޢެކެވެ.

މިހާރު ބޭނުންކުރަމުންދާ މާލޭ ވިޔަފާރި ބަނދަރަކީ އެންމެ 5 ހެކްޓަރުގެ ކުޑަ ޖާގައެއްގައި، އަހަރަކު 80،000 ޓީ.އީ.ޔޫގެ މުދާ ބަރުކުރުމަށް ފަރުމާކޮށްފައިވާ ތަނެކެވެ. 

ނަމަވެސް، 2025 ވަނަ އަހަރު އެ ބަނދަރުން 136،711 ޓީ.އީ.ޔޫގެ މުދާ ޚިދުމަތް ހޯދާފައިވުމުގެ ސަބަބުން ޖާގައިގެ ބޮޑެތި ދަތިތަކާ ވަނީ ކުރިމަތިލާންޖެހިފައެވެ. މިހާރު ކޮންޓެއިނަރު އުޅަނދުފަހަރު ބަނދަރާ ކައިރިނުކުރެވި، ބޭރުގައި ބާއްވައިގެން ބާޖުތަކަށް މުދާ ހުސްކުރަން ޖެހުމުގެ ސަބަބުން، މުދާ ހުސްކުރުމަށް 7 ދުވަހާއި 14 ދުވަހާ ދެމެދުގެ މުއްދަތެއް ހޭދަވެއެވެ. ނަމަވެސް، ތިލަފުށީ ބަނދަރު ހުޅުވުމާއެކު މި މުއްދަތު 2 ދުވަހަށްވުރެކުރު މުއްދަތަކަށްކުޑަކުރެވިގެންދާނެއެވެ.

ތިލަފުށީ ބަނދަރު ހުޅުވާއިރު އަހަރަކު 390،000 ޓީ.އީ.ޔޫ ގެ މުދާ ހޭންޑްލްކުރުމުގެ ޤާބިލުކަން ހުންނާނެއެވެ. އަދި މަޝްރޫޢު އެއްކޮށް ނިމި ފުލް ބިލްޑް-އައުޓްއަށް ދާއިރު މިއަދަދު 1.28 މިލިއަން ޓީ.އީ.ޔޫ އަށް އިތުރުވެގެންދާނެއެވެ. ބަނދަރު ހުޅުވާއިރު ބައިނަލްއަޤްވާމީ ކޮންޓެއިނަރު ބޯޓުފަހަރަށް ޚާއްސަ 375 މީޓަރުގެ ކުއޭ ވޯލެއް ތަރައްޤީކުރުމަށް ވަނީ ހަމަޖެހިފައެވެ. ކުއޭ ވޯލް ތަރައްޤީކުރެވިގެންދާނީ ކުރިއަށްއޮތްތާގައި  1.4 ކިލޯމީޓަރަށް ބޮޑުކުރެވޭ ގޮތަށެވެ. 

މީގެ އިތުރުން، އަތޮޅުތެރެއަށް މުދާ އުފުލާ އުޅަނދުފަހަރަށް ޚާއްސަކޮށް 2 ކިލޯމީޓަރުގެ ޑޮމެސްޓިކް ކުއޭއެއް ހުންނާނެއެވެ. މީގެ ސަބަބުން، ރާއްޖެއިން ބޭރުން އަންނަ މުދާ، މާލެއަށް ނުގެނެސް ސީދާ ތިލަފުށިން ޑޮމެސްޓިކް އުޅަނދުފަހަރަށް ބަދަލުކޮށްގެން އަތޮޅުތަކަށް ފޮނުވުމުގެ މަގު ފަހިވެގެންދާނެއެވެ.

މި އައު ބަނދަރު ބެހިގެންވަނީ މައިގަނޑު ތިން ޓަރމިނަލެއްގެ މައްޗަށެވެ. އެއީ ބައިނަލްއަޤްވާމީ ކޮންޓެއިނަރ ޓަރމިނަލް، އާންމު މުދަލާއި އަވަހަށް ހަލާކުވާ ޒާތުގެ މުދަލަށް ޚާއްސަ މަލްޓި-ޕާޕަސް ކާގޯ ޓަރމިނަލް، އަދި ޑޮމެސްޓިކް ކާގޯ ޓަރމިނަލްއެވެ. މީގެ އިތުރުން، މުދާ ރައްކާކުރުމަށްޓަކައި 2.5 މިލިއަންއަކަފޫޓުގެ ވެއާހައުސިންގް ސަރަހައްދެއް ޤާއިމުކުރެވޭނެއެވެ. މީގެ ތެރޭގައި 7 ފަންގިފިލާގެ ބޮންޑެޑް ވެއާހައުސްއަކާއި 5 ފަންގިފިލާގެ ކޮންޓެއިނަރ ފްރެއިޓް ސްޓޭޝަނެއް ހިމެނެއެވެ.