ފިނި ތަރުހީބަކާއި އެކު އެމްޑީޕީގެ ކޮންގްރެސް ފަށައިފި

އިދިކޮޅު މައި ޕާޓީ، އެމްޑީޕީގެ ގައުމީ ކޮންގްރެސް އާންމުންނާއި އެ ޕާޓީގެ މެންބަރުންގެ ވަރަށް ފިނި ތަރުހީބަކާ އެކު މިރޭ މާލޭގައި ފަށައިފިއެވެ.

ގިނަ ބައެއްގެ އުއްމީދުތަކާ ޚިލާފަށް މި ކޮންގްރެސްގެ ފެށުން ފެނިގެންދިޔައީ އިންތިހާއަށް ފަޅު އަދި ބައިވެރިވުން ކުޑަ ހަރަކާތެއްގެ ގޮތުގައެވެ.

މާލޭ ސިޓީ ކައުންސިލުގެ ގޯތި ތެރޭގައި މިރޭ ކުރިއަށްދިޔަ މި ހަރަކާތަށް މީހުން ހާޒިރުވެފައިވަނީ ވަރަށް މަދުންނެވެ. ކޮންގްރެސް ކުރިއަށް ގެންދިއުމަށް ބޭނުންވާ އަދަދަށް މީހުން ހަމަނުވުމުގެ ސަބަބުން، ޕާޓީގެ ލީޑަޝިޕަށް ވަނީ މެންބަރުން ރަޖިސްޓަރީ ކުރުމުގެ މުއްދަތު ކުއްލި ގޮތަކަށް އިތުރުކުރަން މަޖުބޫރުވެފައެވެ. އެގޮތުން، ކޮންގްރެސްގައި ބައިވެރިވުމަށްޓަކައި އަލުން ރަޖިސްޓަރީ ވުމުގެ ފުރުސަތު އަންނަ ނޮވެމްބަރު މަހުގެ 3 ވަނަ ދުވަހުގެ ނިޔަލަށް މިހާރު ވަނީ ހުޅުވާލާފައެވެ.

ކޮންގްރެސްގައި ބައިވެރިވުމަށް 1،000 އަށްވުރެ ގިނަ މީހުން ރަޖިސްޓަރީ ކޮށްފައިވާ ކަމަށް އެމްޑީޕީން ބުނި ނަމަވެސް، މިރޭ އެ ސަރަޙައްދަށް ހާޒިރުވި މީހުންގެ އަދަދު 500 އަށް ވެސް ނާރާނެ ކަމަށް މަންޒަރު ދުށް ފަރާތްތަކުން ބުނެއެވެ. ޖަލްސާ ކުރިއަށްދިޔަ ވަގުތު ގިނަ އަދަދެއްގެ ގޮނޑިތައް ހުސްކޮށް ހުރިއިރު، މިއީ އެ ޕާޓީގެ ތާރީޚުގައި ވެސް މިފަދަ ބޮޑު ހަރަކާތަކަށް މިހާ ފިނި ތަރުހީބެއް ލިބުނު ފުރަތަމަ ފަހަރެވެ.

މިރޭގެ ޖަލްސާގައި ޕާޓީގެ އިސް ސަފުގައި ހަރަކާތްތެރިވާ ތިން ބޭފުޅަކު ވާހަކަދެއްކެވުމަށްފަހު، މުޅި މާހައުލު ބަދަލުވެގެންދިޔައީ ސިޔާސީ ހަރަކާތަކަށްވުރެ ބޮޑަށް އަޚުލާގީ މިންގަނޑުން ބޭރުވެފައިވާ މުނިފޫހިފިލުވުމުގެ ޝޯއަކަށެވެ. އެގޮތުން، އަންހެން ބޮޑުބެރު ގްރޫޕެއް ގެނެސްގެން ބާރު އަޑުން މިއުޒިކް ކުޅެ، ޕާޓީ ކުރަމުން ގޮސްފައިވެއެވެ.

އިދިކޮޅު ޕާޓީގެ ހައިސިއްޔަތުން ސަރުކާރު ޒިންމާދާރުކުރުވުމުގެ މުހިންމު ސިޔާސަތުތަކެއް އެކަށައެޅުމުގެ ބަދަލުގައި، އެމްޑީޕީގެ ކޮންގްރެސްގެ ފުރަތަމަ ރޭ ނިމިގެންދިޔައީ އެއްވެސް އަސާސެއް ނެތް ސަކަރާތްގަނޑެއްގެ ތެރެއިން، އާންމުންގެ އިތުބާރު އިތުރަށް ގެއްލިގެންދިޔަ ހަރަކާތެއްގެ ގޮތުގައެވެ.