އެމްޑީޕީގެ ކޮންގްރެސް ބައެއް މީޑިއާތަކަށް ފުރުސަތު ނުދީ ފަށައިފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސް މިރޭ ފެށިގެން ކުރިޔަށްދާއިރު، ކޮންގްރެސްގެ ކަންކަން ކަވަރުކުރުމަށް ރާއްޖޭގެ ބައެއް މިނިވަން މީޑިއާތަކަށް އެއްވެސް ފުރުސަތެއް ނުދީ، ބައެއް މީޑިއާތައް ބާކީކޮށްފިއެވެ.

މި ކޮންގްރެސް ފެށުމުގެ ކުރިން އެމްޑީޕީގެ ރަސްމީ މީޑިއާ ގްރޫޕުން ފުރަތަމަ ކުރި މެސެޖުގައި ބުނެފައިވަނީ، ކޮންގްރެސް ކަވަރުކުރަން ރަޖިސްޓްރީވާން ބޭނުންވާ މީޑިއާތަކުން ނަން ފޮނުވުމަށެވެ. ނަމަވެސް، ނޫސްތަކުން ނަންތައް ފޮނުވައި ނިމުމުން، އެ ގްރޫޕަށް ފުރަތަމަ މީޑިއާތަކުގެ ލިސްޓެއް ލުމަށްފަހު ވަގުތުން ވަނީ އެ ލިސްޓު ޑިލީޓްކޮށްލާފައެވެ. އޭގެ ފަހުން އަލުން މެސެޖެއް ކޮށް އެ ޕާޓީން ބުނީ ތަނުގެ ޖާގަ ކުޑަކަމުން އިސްކަންދޭނީ ހަމައެކަނި ލައިވްކުރާ މީޑިއާތަކަށް ކަމަށެވެ. އަދި އެހެން މީޑިއާތަކަށްވެސް ފުރުސަތު ދޭނެ ކަމަށް ބުނި ނަމަވެސް، އެކަމުގެ ތަފްސީލު ހޯދުމަށް މީޑިއާތަކުން ވަކިވަކިން އެ ބޭފުޅުންނަށް ގުޅައި މެސެޖު ކުރުމުންވެސް އެއްވެސް ޖަވާބެއް ދީފައެއް ނުވެއެވެ.

ނޫސްވެރިންގެ ހައްގުތަކުގެ ނަމުގައާއި، "އަދަދު" ނޫހުގެ ދެ ނޫސްވެރިން ޖަލަށްލުމާ ގުޅިގެން ޚިޔާލުފާޅުކުރުމުގެ މިނިވަންކަމުގެ ދިފާއުގައި ކަމަށް ބުނެ އެމްޑީޕީން މީގެ ކުރިން ވަނީ މަގުމައްޗަށް ނިކުމެ އަޑުއުފުލާފައެވެ. ނަމަވެސް، އަމިއްލަ ޕާޓީގެ އެތެރޭގެ ކަންކަމުގައި މީޑިއާތަކަށް ފުރުސަތު ނުދީ، މީޑިއާތަކުން ކުރާ މެސެޖުތަކަށް ޖަވާބުވެސް ނުދީ ފިލައި ތިބުމަކީ އެ ޕާޓީގެ ލީޑަޝިޕާއި ކުރީގެ ރައީސް މުހައްމަދު ނަޝީދުގެ ބަހާއި އަމަލާ ދިމާނުވާ ކަމުގެ ވަރަށް ބޮޑު ހެއްކެކެވެ.

ފާޑުކިޔާ ފަރާތްތަކުން ފާހަގަކުރާ ގޮތުގައި، މީޑިއާތަކުގެ މިނިވަންކަމާއި އަސާސީ ހައްގުތައް ނިގުޅައިގަންނަ ކަމަށް ބުނެ އެމްޑީޕީން މަގުމައްޗަށް ނިކުމެ ދައްކަނީ އެއްވެސް އަސާސެއް ނެތް ބުހުތާނު ދޮގު ވާހަކަތަކެކެވެ. އަދި އަމިއްލަ ޕާޓީގެ ހަރަކާތްތަކުން ވަކި މީޑިއާތަކެއް ބާކީކޮށް، މައުލޫމާތު ހޯދަން ކުރާ މެސެޖުތަކަށް އިޖާބަ ނުދިނުމަކީ އެމްޑީޕީގެ ދެފުށްކެހެރި ސިޔާސަތު ވަރަށް ބޮޑަށް ހާމަވެގެންދާ ކަމެއް ކަމަށްވެސް ގިނަ ނޫސްވެރިން ދެކެއެވެ.