ބޮޑުތަކުރުފާނުމަގުގައި ގަވާއިދާ ހިލާފަށް ޕާކުކޮށްފައިވާ އުޅަނދުތައް ޓޯކުރަން ފަށައިފި

މާލެ، ބޮޑުތަކުރުފާނުމަގުގައި ގަވާއިދާ ހިލާފަށް ޕާކުކޮށްފައިވާ އުޅަނދު ޓޯކުރަން ފަށާފައިވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުންގެ ޚިދުމަތިން ރޭ އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، މަސައްކަތުގެ ތެރެއިން، ބުރާސްފަތި ދުވަހުން ފެށިގެން މިހާތަނަށް ހަތަރު ފުރޮޅުލީ 9 އުޅަނދު ޓޯކޮށްފައިވާކަމަށެވެ.

ގަވާއިދާ ހިލާފަށް ޕާކުކޮށްފައިވާ އުޅަނދުތައް މަގުމަތިން ނެގުމަށް ފުލުހުން ކުރަމުންދާ މި މަސައްކަތް ރޭ ވެސް ވަނީ ކުރިއަށް ގެންގޮސްފައެވެ.

📸 މާލެ، ބޮޑުތަކުރުފާނުމަގުގައި ގަވާއިދާ ހިލާފަށް ޕާކުކޮށްފައިވާ އުޅަނދު ޓޯކުރުން - މި މަސައްކަތުގެ ތެރެއިން، ރެއިންފެށިގެން މިހާތަނަށް ހަތަރު ފުރޮޅުލީ 9 އުޅަނދު ވަނީ ޓޯކޮށްފައެވެ.

ގަވާއިދާ ހިލާފަށް ޕާކުކޮށްފައިވާ އުޅަނދުތައް މަގުމަތިން ނެގުމަށް ފުލުހުން ކުރަމުންދާ މި މަސައްކަތް… pic.twitter.com/jOqqFOi8rN

— Maldives Police (@PoliceMv) October 2, 2026

އެގޮތުން، މަގުމަތީގައި ގަވާއިދާ ހިލާފަށް އުޅަނދު ޕާކު ނުކުރުމަށާއި، އަދި އެގޮތަށް ޕާކުކޮށްފައިވާ އުޅަނދުތައް ނެގުމަށް އެންމެހައި ފަރާތްތަކަށް ދިވެހި ފުލުހުންގެ ޚިދުމަތުން ވަނީ އިލްތިމާސްކޮށްފައެވެ.

މި މަސައްކަތުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް، ފުލުހުން ވަނީ ޝުކުރު އަދާކޮށްފައެވެ.

މި ސަރުކާރުން ވަނީ ބޮޑުތަކުރުފާނުމަގު ތަރައްޤީ ކުރުމުގެ މަސައްކަތް ފަށައި ބޮޑު ސަރަޙައްދެއް ޒަމާނީ ފެންވަރަށް ތަރައްޤީކޮށްފައެވެ. މަގު ތަރައްޤީކޮށް، ޕާކިން ޒޯންތައް ވެސް ދަނީ އެ ސަރަހައްދުގައި ތަރައްޤީ ކުރަމުންނެވެ.

ޤަވާއިދާ ހިލާފަށް ޕާކުކުރުމުގެ މައްސަލަ ވަނީ މާލޭގައިި ވަރަށް ބޮޑު މައްސަލައަކަށް ވެފައެވެ. މިކަމުގެ ސަބަބުން މަގު ބޭނުންކުރާ މީހުންނަށް ބޮޑެތި ދަތިތަކާއި ކުރިމަތިލާން ޖެހިފައިވެއެވެ.