ނައިބޮލި ބިޒްނަސް އެކްސްޕޯ 2026ގައި ފިޝަރީޒް މިނިސްޓްރީން ބައިވެރިވެއްޖެ

ޅ. ނައިފަރުގައި ކުރިޔަށް ގެންދިޔަ "ނައިބޮލި ބިޒްނަސް އެކްސްޕޯ 2026"ގައި މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްއިން ބައިވެރިވެއްޖެއެވެ.

ނައިފަރު ކައުންސިލުން އިންތިޒާމުކޮށްގެން، އޮކްޓޯބަރު 2 އިން 3 އަށް އެ ރަށުގައި ކުރިއަށްގެންދިޔަ މި އެކްސްޕޯއަކީ އެ ރަށުގެ ވިޔަފާރިވެރިންނާއި، ކުދި ވިޔަފާރިތަކާއި، އުފެއްދުންތެރި ފަރާތްތަކަށް، އެ ފަރާތްތަކުގެ އުފެއްދުންތަކާއި ޚިދުމަތްތައް ޕްރޮމޯޓްކޮށް، މާކެޓްކޮށް، ވިއްކުމުގެ އިތުރުން ވިޔަފާރި ފުޅާކުރުމުގެ ފުރުޞަތުތައް ހޯދައިދިނުމަށް ކުރިއަށްގެންދިޔަ މުހިންމު ހަރަކާތެއް ކަމަށް ފިޝަރީޒް މިނިސްޓްރީން ވިދާޅުވެއެވެ.

"އެކްސްޕްލޯރ. ކަނެކްޓް. ގްރޯ" މި ޝިއާރުގެ ދަށުން ކުރިއަށްދިޔަ މި އެކްސްޕޯގައި މިނިސްޓްރީން ބައިވެރިވީ އާންމުންނާ ގުޅުންބަދަހިކޮށް، ދަނޑުވެރިކަމާއި މަސްވެރިކަމުގެ ސިނާއަތް ކުރިއެރުވުމަށް ކުރަމުންދާ މުހިންމު މަސައްކަތްތައް ދައްކާލުމަށްކަން ފިޝަރީޒް މިނިސްޓްރީން ފާހަގަކުރައްވައެވެ.

މިނިސްޓްރީގެ ސްޓޯލަށް ޒިޔާރަތްކުރި ފަރާތްތަކަށް މަޢުލޫމާތު ދެވިފައިވާ މައިގަނޑު ކަންކަން:

• ދަނޑުވެރި ނަފާ ލޯނު
• އާރް.އެސް.ޑަބްލިއު (RSW) ޕްރޮޖެކްޓް
• ގަހާއި ޖަނަވާރު އެތެރެކުރުމުގެ އުސޫލުތަކާއި ހުއްދަތައް
• ފިޝަރީޒް މާކެޓިންގ ކޯޕަރޭޝަންގެ މަސައްކަތްތައް

މުހިންމު ސިނާޢަތްތަކުގައި ވިޔަފާރި ފުޅާކުރުމަށް މިނިސްޓްރީގެ ޚިދުމަތްތަކުން ލިބެންހުރި ފުރުޞަތުތައް އޮޅުންފިލުވުމަށް، އެ މިނިސްޓްރީގެ ސްޓޯލަށް ޒިޔާރަތްކުރި ގިނަ ޢަދަދެއްގެ ވިޔަފާރިވެރިންނާ ބައްދަލުކޮށް މަޢުލޫމާތު ޙިއްޞާކޮށްފައިވާ ކަމަށް މިނިސްޓްރީން ވަނީ ބުނެފައެވެ.

The Ministry of Fisheries, Agriculture and Ocean Resources was proud to join the Naiboli Business Expo 2026 to showcase and share information about our key initiatives. Thank you to everyone who visited our stall! pic.twitter.com/9VYM3yCcKG

— Min of Fisheries, Agriculture and Ocean Resources (@MFAORmv) October 2, 2026

ރާއްޖޭގެ ދަނޑުވެރިކަމާއި މަސްވެރިކަމުގެ ސިނާޢަތް އިތުރަށް ފުޅާކޮށް، އެ ދާއިރާތަކުން ލިބޭ ނަފާ އިތުރުކުރުމަށް އަދުގެ ސަރުކާރުން ހަރުދަނާ މަސައްކަތްތަކެއްދަނީ ކުރަމުންނެވެ. މި ދާއިރާތަކަށް ބޭނުންވާ ޒަމާނީ ވަސީލަތްތަކާއި މާލީ އެހީތެރިކަން ފަހިކޮށްދީ، ދެމެހެއްޓެނިވި ގޮތެއްގައި މި ސިނާޢަތްތައް ކުރިއެރުވުމަށް އެކަށައަޅާފައިވާ ސިޔާސަތުތަކުގެ ސަބަބުން ވިޔަފާރިވެރިންނަށާއި އާންމު ރައްޔިތުންނަށް ބޮޑެތި ކުރިއެރުންތަކެއް ދަނީ ލިބެމުންނެވެ.