މީރާއިން "މޯލްޑިވްސް ގެސްޓް އިންފޮމޭޝަން ސިސްޓަމް" ތަޢާރަފުކޮށްފި

ޓެކްސް ދައްކާ ފަރާތްތަކަށް ލުއިފަސޭހަ ހިދުމަތްތަކެއް ފޯރުކޮށްދިނުމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ކުރަމުންދާ މަސައްކަތްތަކުގެ ތެރެއިން، "މޯލްޑިވްސް ގެސްޓް އިންފޮމޭޝަން ސިސްޓަމް" (އެމްޖީއައިއެސް) ރަސްމީކޮށް އިފްތިތާހުކޮށްފިއެވެ.

 މި ސިސްޓަމް އިފުތިތާހުކޮށްދެއްވީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައެވެ. އެގޮތުން، މި ސިސްޓަމް އިފްތިތާހްކޮށްދެއްވީ ފިނޭންސް މިނިސްޓަރު ހަސަން ޒަރީރެވެ.

މި ސިސްޓަމް ތައާރަފްކުރުމުން، ގްރީން ޓެކުހަށް ރަޖިސްޓަރީކޮށްފައިވާ ހުރިހާ ފަރާތްތަކަށް ވެސް ޓޫރިސްޓް އެސްޓެބްލިޝްމަންޓްތަކަށް އަންނަ ފަތުރުވެރިންގެ މައުލޫމާތު ސިސްޓަމް މެދުވެރިކޮށް ހުށަހެޅޭނެ ކަމަށް މީރާއިން ވިދާޅުވެއެވެ. އަދި މި ސިސްޓަމުން މަޢުލޫމާތު ހުށަހެޅުމުން، ޓޫރިޒަމް މިނިސްޓްރީއަށް ހުށަހަޅަންޖެހެ މައުލޫމާތު އެ މިނިސްޓްރީއަށް ވެސް ހުށަހެޅުނީ ކަމުގައި ބެލެވޭނެއެވެ.

މީރާއިން ވިދާޅުވާ ގޮތުގައި، މި އައު އިންތިޒާމުގެ ސަބަބުން ޓޫރިސްޓް އެސްޓެބްލިޝްމަންޓްތަކުން މައުލޫމާތު ހުށަހެޅުމުގެ އިލްތިޒާމު ފުރިހަމަކުރުމަށް ވަރަށް ބޮޑު ލުއިފަސޭހަކަމެއް ލިބިގެންދާނެއެވެ. އަދި މި ސިސްޓަމް ޓޫރިސްޓް އެސްޓެބްލިޝްމަންޓްތަކުގެ ސިސްޓަމާ އިންޓަގްރޭޓްކުރުމުން، މައުލޫމާތު ހުށަހެޅުމަށް މެނުއަލްކޮށް ކުރަންޖެހޭ މަސައްކަތް ނިމުމަކަށް އަންނާނެއެވެ.

މި ސިސްޓަމަކީ ހުރިހާ ފަރާތްތަކަށް ހުޅުވާލެވިފައިވާ ސިސްޓަމެއް ކަމުގައިވީނަމަވެސް، ޓެކްސްދައްކާ ފަރާތްތައް އޮންބޯޑް ކުރުމުގައި މީރާއިން އިސްކަންދޭނީ ޓެކްސް ދައްކާ ފަރާތްތައް ދެބަޔަކަށް ބަހާލައިގެން ކަމަށް މިީރާއިން ވިދާޅުވެއެވެ. އެގޮތުން ރިސޯޓްތަކާއި، ހޮޓާތަކާއި، އަދި 50 އެނދަށްވުރެ މަތީގެ ގެސްޓްހައުސްތަކުން، 1 ނޮވެމްބަރ 2026 އިން ފެށިގެން މި ސިސްޓަމް މެދުވެރިކޮށް ރިޕޯޓް ކުރަން ފަށަން ޖެހޭއިރު، ގްރީން ޓެކުހަށް ރަޖިސްޓަރީކޮށްފައިވާ އެހެނިހެން ފަރާތްތަކުން، 1 ޖެނުއަރީ 2027 އިން ފެށިގެން މަޢުލޫމާތު މި ސިސްޓަމް މެދުވެރިކޮށް ރިޕޯޓްކުރަން ޖެހޭނެ ކަމަށް މީރާއިން ވިދާޅުވެއެވެ.

މި އައު ސިސްޓަމް ތަޢާރަފުކުރި ނަމަވެސް، ގްރީން ޓެކްސް ބަޔާން ހުށަހެޅުމަށާއި ފައިސާ ދެއްކުމަށް ކަނޑައެޅިފައިވާ ސުންގަޑިތަކަށް އެއްވެސް ބަދަލެއް ނާންނާނެ ކަމަށް މީރާއިން ވިދާޅުވެއެވެ. އަދި ކުރިއެކޭ އެއްފަދައިން ގްރީން ޓެކްސް ރިޓާން ހުށަހެޅުމާއި ފައިސާ ދެއްކުން ކުރިއަށް ދާނީ "މީރާކަނެކްޓް" މެދުވެރިކޮށެވެ.

މި ސިސްޓަމަށް މަޢުލޫމާތު ރިޕޯޓް ކުރުމުން، އެ މުއްދަތުގެ ގްރީން ޓެކްސް ބަޔާނާއެކު އިތުރު އިންފޮމޭޝަން ޝީޓެއް އަޕްލޯޑްކުރާކަށް ނުޖެހޭނެ ކަމަށާއި އޭގެ ބަދަލުގައި ބަޔާން ހުށަހަޅާއިރު އެ މައުލޫމާތު ގްރީން ޓެކްސް ބަޔާނަށް ޕްރީފިލް ކޮށްދޭނެ ކަމަށްވެސް މީރާއިން ވިދާޅުވެއެވެ.