ވަޠަނީ ޚިދުމަތުގެ ފަންނީ ތަމްރީނު އިތުރު 73 ދަރިވަރަކު ފުރިހަމަކޮށްފި

އަމިއްލަ ނަފުސަށް އިތުބާރުކުރާ، ޒިންމާދާރު ޒުވާން ޖީލެއް ބިނާކުރުމަށް ސަރުކާރުން ކުރިއަށްގެންދާ، ދިވެހި ވަޠަނީ ޚިދުމަތުގެ ފަންނީ ތަމްރީނުގެ 2 ވަނަ ބެޗު 73 ދަރިވަރަކު ފުރިހަކޮށްފިއެވެ. 

މި ޕްރޮގްރާމަކީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ، ޑޮކްޓަރ މުޙައްމަދު މުޢިއްޒު އިސްނަންގަވައިގެން، ދިވެހި ޤައުމިއްޔަތަށް ލޯބިކުރާ، އަގީދާ ވަރުގަދަ، ރޫޙާނީ އާއި ޖިސްމާނީ ގޮތުން ދުޅަހެޔޮ ޒުވާނުންތަކެއް އުފެއްދުމުގެ މަގްސަދުގައި ފައްޓަވާފައިވާ މުހިންމު މަޝްރޫއެކެވެ.

 މި ތަމްރީންތަކުގެ ދެވަނަ ބުރު 16 ހަފްތާއަށް ކުރިއަށް ގެންގޮސްފައިވާއިރު، ރާއްޖޭގެ 17 އަތޮޅުތަކުން ޖުމްލަ 75 ދަރިވަރުން ވަނީ ބައިވެރިވެފައެވެ. އޭގެ ތެރެއިން 73 ދަރިވަރުން ތަމްރީނުތައް ފުރިހަމަކޮށްފައިވާއިރު، މީގެ ތެރޭގައި ހިމެނެނީ 60 ފިރިހެން ކުދިންނާއި، 13 އަންހެން ކުދިންނެވެ.

މި ޕްރޮގްރާމުގެ ދަށުން ދަރިވަރުންނަށް އޮޓޯ މޯބައިލް އިންޖިނިއަރިން، މެރިން އިންޖިނިއަރިން، އިލެކްޓްރީޝަން، ރެފްރިޖެރޭޝަން، ވެލްޑިންގ އަދި މެޓަލް ފެބްރިކޭޝަންގެ އިތުރުން އޮފީސް މެނޭޖުމަންޓް ފަދަ ސިނާއީ ދާއިރާތަކުގެ ފަންނީ ހުނަރުތައް އުނގަންނައިދިނުމަށް ވަނީ ހަމަޖެހިފައެވެ. މި ތަމްރީނުތައް ފުރިހަމަކުރާ ދަރިވަރުންނަށް މޯލްޑިވްސް ކޮލިފިކޭޝަން އޮތޯރިޓީން ޤަބޫލުކުރާ ލެވެލް 3 ގެ ސެޓިފިކެޓެއް ލިބޭނެއެވެ.

ދަރިވަރުންނަށް ކިޔަވައިދެއްވީ އެކި ފަންނީ ދާއިރާތަކުގައި ގިނަ ދުވަހު އަމަލީ މަސައްކަތް ކުރައްވައި ތަޖުރިބާ ހޯއްދަވާފައިވާ ސިފައިންގެ ތަޖުރިބާކާރު އިންސްޓްރަކްޓަރުންނެވެ.

މި ތަމްރީން ޕްރޮގްރާމްގެ 3 ވަނަ ބެޗްގެ ތަމްރީންތައްތައް މިމަހުގެ 12 ވަނަ ދުވަހު ފެށުމަށް ވަނީ ހަމަޖެހިފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ދިވެހި ވަޠަނީ ޚިދުމަތުގެ ޕްރޮގްރާމުގެ ތެރެއަށް ފަންނީ އިތުރު ދާއިރާތައް ތަޢާރަފްކޮށް، ނޭޝަނަލް ސަރވިސްގެ އިންޓަރންޝިޕް ޕްރޮގްރާމްތައް ވެސް ތަޢާރަފްކުރެވޭނެ ކަމަށް ވިދާޅުވެފައެވެ.