ވެރިކަމަށް ފެން ބޮވައިގަންނާނީ މިވަރަކަށް: ނަޝީދު ހުރީ މި ސިކުންތުގައިވެސް ވެރިކަމާއި ހަވާލުވާ ތައްޔާރަށް

ވެރިކަމުގެ ދަހިވެތިކަމާއި އަމިއްލަ އެދުމުގައި ހައްދުފަހަނައަޅައި ގޮސްފައިވާ މިންވަރު ހާމަކުރައްވަމުން، މި ސިކުންތުގައި ވެސް ދައުލަތާ ހަވާލުވާން ތައްޔާރަށް ހުންނެވި ކަމަށް އިދިކޮޅު އެމްޑީޕީގެ ޗެއާޕާސަން މުހައްމަދު ނަޝީދު އެ ޕާޓީގެ ކޮންގްރެސްގެ ތެރޭގައި ވިދާޅުވެއްޖެއެވެ.

މިހާރު ކުރިއަށްދާ އެމްޑީޕީގެ ކޮންގްރެސްގެ ރިޔާސަތުގައި އިންނަވައިގެން ނަޝީދު މިހެން ވިދާޅުވީ، އެ ޕާޓީގެ ގައުމީ މަޖިލިސް މެންބަރު އަހުމަދު ސަލީމް ދެއްކެވި ވާހަކައަކަށް ރައްދު ދެއްވަމުންނެވެ. ސަލީމްގެ ވާހަކައާ ގުޅިގެން ނަޝީދު ވިދާޅުވީ "މި ސިކުންތުގައި ވެސް ދައުލަތާ ހަވާލުވުމަށް އަޅުގަނޑު މި ހުރީ ތައްޔާރަށް" ކަމަށެވެ. މިއީ މީގެ ކުރިން ދުވަހަކުވެސް ދެން ވެރިކަން ބޭނުން ނޫން ކަމަށް ވިދާޅުވެ އޮޅުވާލަމުން ދިޔަ ވާހަކަތަކުގެ ހަގީގަތް ފަޅާއަރައި، ވެރިކަމުގެ ބާރަށް އެމަނިކުފާނު ފެންބޮވައިގެންފައިވާ މިންވަރު ސާފުވެގެންދިޔަ ކަމެކެވެ.

މީގެ އިތުރުން، މީގެ ކުރިން ފައްޔާޒު އިސްމާއީލަށް ތާއީދުކުރައްވާ ކަމަށާއި ޕާޓީގެ ރިޔާސީ ކެންޑިޑޭޓަކީ ފައްޔާޒު ކަމަށް ވިދާޅުވެފައި ވަނިކޮށް، މިއަދު އަމިއްލައަށް ވެރިކަމާ ހަވާލުވާން ތައްޔާރަށް ހުންނެވި ކަމަށް ވިދާޅުވުމުން ނަޝީދުގެ ދެފުށްކެހެރިކަމާއި، ދެފަހަރު ދެގޮތަށް ވާހަކަދެއްކެވުމުގެ ނާތަހުޒީބު އާދަ ވަނީ އަނެއްކާވެސް ހާމަވެފައެވެ.

"މި ސިކުންތުގައި ވެސް ދައުލަތާ ހަވާލުވުމަށް އަޅުގަނޑު މި ހުރީ ތައްޔާރަށް،"

ނަޝީދު ވިދާޅުވި އެވެ.

މި ކޮންގްރެސްގެ ތެރެއިން އެންމެ ބޮޑަށް ފާހަގަވެގެން ދިޔައީ ކުރީގެ ރައީސް އިބްރާހިމް މުހައްމަދު ސޯލިހާއި ނަޝީދާ ދެމެދު އޮތް ހަސަދަވެރިކަމެވެ. އެގޮތުން ކޮންގްރެސްގެ ޕޯޑިއަމްގައި އެކަކު އަނެކަކަށް ހޫނު ބަހުގެ ހަމަލާތަކާއި ރައްދުތައް ދެމުންދިޔަ މަންޒަރު ފެނި، ޕާޓީގެ އެތެރޭގެ ބައިބައިވުން ވަނީ އިންތިހާއަށް ފެންމަތިވެފައެވެ.

މާޒީގައި ވެސް އަމިއްލަ އެދުން އިސްކުރައްވައި، ބޭނުންފުޅުވި ގޮތަށް ކަންކަން ނުވުމުން އެމްޑީޕީ ރޫޅާލައި ބޮޑު ހަލާކެއްގެ ތެރެއަށް ވައްޓާލި ފަދައިން، ނަޝީދަކީ ހަމައެކަނި އަމިއްލަ މަސްލަހަތާއި ވެރިކަމުގެ ދަހިވެތިކަމުގައި ހުސްވެފައިވާ ބޭފުޅެއްކަން މިއަދުގެ ކޮންގްރެސްގައި އެމަނިކުފާނު ދެއްކެވި ވާހަކަތަކުން ވަނީ ސާބިތުވެފައެވެ.