ހުޅުމާލޭގެ ދުވާރުތަކާއި މަގުތަކަށް ދަތިވާގޮތަށް ޕާކުކޮށްފައިވާ އުޅަނދުތައް ޓޯކުރަން ފަށައިފި

ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ޚާއްސަކޮށްފައިވާ ދުވާރުތަކުގައާއި، އާންމު ދަތުރުފަތުރަށް ދަތިވާގޮތަށް ޕާކުކޮށްފައިވާ އުޅަނދުތައް ޓޯވކުރުމުގެ މަސައްކަތް ދިވެހި ފުލުހުންގެ ޚިދުމަތުން ފަށައިފިއެވެ.

ފުލުހުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، މިގޮތަށް އުޅަނދު ޕާކުކުރުމަކީ ނުރައްކާތެރި އެކްސިޑެންޓްތައް ހިނގަން މެދުވެރިވާ ކަމަކަށް ވާތީ، އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުންނާއި މަގުމަތީގެ އަމާންކަން ދެމެހެއްޓުމަށް ޓަކައި، އެފަދަ ސަރަހައްދުތަކުގައި އުޅަނދު ޕާކުނުކުރުމަށް އެންމެހައި ފަރާތްތަކަށް އިލްތިމާސްކުރާ ކަމަށެވެ.

📸 ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ހާއްސަކޮށްފައިވާ ދުވާރުތަކުގައާއި، އާންމު ދަތުރުފަތުރަށް ދަތިވާގޮތަށް ޕާކުކޮށްފައިވާ އުޅަނދުތައް ޓޯވކުރުން.

މިގޮތަށް އުޅަނދު ޕާކުކުރުމަކީ ނުރައްކާތެރި އެކްސިޑެންޓްތައް ހިނގަން މެދުވެރިވާ ކަމަކަށް ވާތީ، އާންމު ރައްޔިތުންގެ… pic.twitter.com/TDfIgYXr19

— Maldives Police (@PoliceMv) October 3, 2026

ފުލުހުން ވަނީ މިދިޔަ ބުރާސްފަތި ދުވަހު މާލޭގެ ބޮޑުތަކުރުފާނުމަގުގައި ގަވާއިދާ ހިލާފަށް ޕާކުކޮށްފައިވާ އުޅަނދުތައް ޓޯކުރުންމުގެ މަސައްކަތް ފަށާފައެވެ. އަދި މަގުމަތީގައި ގަވާއިދާ ހިލާފަށް އުޅަނދު ޕާކުނުކުރުމަށާއި، އެގޮތަށް ޕާކުކޮށްފައިވާ އުޅަނދުތައް ނެގުމަށް ފުލުހުން ވަނީ އިލްތިމާސްކުރައްވާފައެވެ. 

މަގުމަތީގެ އުސޫލުތަކާއި ޓްރެފިކް ޤާނޫނާއި ޤަވާއިދުތަކަށް ތަކުރާރުކޮށް ޚިލާފުވާ ފަރާތްތަކާމެދު ޚާއްސަ ފިޔަވަޅުތަކެއް އަޅަމުންދާނެކަމަށް ފުލުހުން ވިދާޅުވެއެވެ. އަދި ޓްރެފިކްގެ އާންމު އުސޫލުތަކަށާއި، އަދަބުތަކަށް ބޯނުލަނބާ މަދު ބައެއްގެ ސަބަބުން ގިނަ ބައެއްގެ ހައްޤުތައް ގެއްލި، ނުރައްކާތެރި އެކި ހާދިސާތައް ހިނގަމުންދާ ކަމަށް ވެސް ދިވެހި ފުލުހުންގެ ޚިދުމަތުން ވަނީ ވިދާޅުވެފައެވެ.

މާލެ ސަރަހައްދަށް ދިމާވެފައިވާ ޓްރެފިކް ބާރުބޮޑުވުމުގެ މައްސަލައަށް ދާއިމީ ހައްލެއް ހޯދުމަށް އަދުގެ ސަރުކާރުން އަންނަނީ މުހިންމު ފިޔަވަޅުތަކެއް އަޅަމުންނެވެ. އެގޮތުން މަގުތަކުގެ ތޮއްޖެހުން ކުޑަކުރުމަށްޓަކައި ޕާކިންގ ޒޯންތައް ގާއިމުކުރުމުގެ މަޝްރޫއުތައް ރޭވި، އާންމު ދަތުރުފަތުރުގެ ނިޒާމު އިތުރަށް ހަރުދަނާކޮށް ފުޅާކުރުމުގެ މަސައްކަތްތައް ދަނީ ކުރެވެމުންނެވެ. 

 މީގެ އިތުރުން ގަވާއިދާ ހިލާފަށް ޕާކުކުރުން ހުއްޓުވުމަށް ފިޔަވަޅު އެޅުމާއި، މާލެއާއި ހުޅުމާލެ ގުޅުވައިދޭ މަގުތަކުގެ ޓްރެފިކް ފްލޯ ރަނގަޅުކުރުމަށް ޓްރެފިކް ބެލެހެއްޓުމުގެ އުސޫލުތަކަށް ޒަމާނީ ބަދަލުތައް ގެނައުމަކީ މި މައްސަލަ ހައްލުކުރުމަށް ކުރެވެމުންދާ މައިގަނޑު މަސައްކަތްތަކެކެވެ.