ފަތުރުވެރިކަމުން އެތައް ޖީލަކަށް ފުރުސަތުތައް ފަހިކޮށްދީފި: ވަޒީރު ސަޢީދު

ފަތުރުވެރިކަމުގެ ސިނާއަތުން އެތައް ޖީލަކަށް ފުރުސަތުތައް ފަހިކޮށްދީފައިވާ ކަމަށް އިގުތިސާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ދިވެހިރާއްޖޭގެ ފަތުރުވެރިކަމުގެ ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައި ވަޒީރު ވަނީ،  މިއަދު މި ފާހަގަކުރެވެނީ އެންމެ ބޮޑު އެއް ޤައުމީ ކާމިޔާބީއަށް 54 އަހަރު ފުރުނު ތާރީހީ މުނާސަބަތު ކަމަށް ވިދަޅުވެފައެވެ.

އެގޮތުން، އާދައިގެ ގޮތަކަށް ފެށިގެން އައިސް، ދުނިޔޭގެ މަޤްބޫލުކަން ހޯދާފައިވާ ފަތުރުވެރިކަމުގެ ޞިނާޢަތެއް ރާއްޖެއިން ބިނާކޮށްފައިވާކަން ވަޒީރު ފާހަގަކުރެއްވިއެވެ.

އަދި ވަޒީރު ވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި، މި ޞިނާޢަތުގެ ބިންގާ އަޅުއްވައިދެއްވި ފަރާތްތަކަށާއި، ފަތުރުވެރިކަމުގެ ދާއިރާގެ މުވައްޒަފުންނަށާއި، އިންވެސްޓަރުންނަށާއި، ރިޒޯޓް އޮޕަރޭޓަރުންނަށާއި، ވިޔަފާރިވެރިންނަށާއި، ކުންފުނިތަކުގެ އިތުރުން، މި ޞިނާޢަތުގެ ކާމިޔާބީ ދެމެހެއްޓުމަށް ބުރަ މަސައްކަތްތަކެއް ކުރައްވަމުން ގެންދަވާ އެންމެހާ ފަރާތްތަކަށް ދުވަހުގެ ހެޔޮއެދުންތައް އަރިސްކުރައްވާފައެވެ.

ހަމައެހެންމެ ވަޒީރު ވިދާޅުވީ، ފަތުރުވެރިކަމަކީ ރާއްޖޭގެ އިޤްތިޞާދަށް އިންޤިލާބީ ބަދަލެއް ގެނެސްދީ، ދިވެހިންގެ އެތައް ޖީލަކަށް ފުރުޞަތުތައް ފަހިކޮށްދިން ސިނާއަތެއް ކަމަށެވެ. އަދި މި ސިނާއަތުގެ ސަބަބުން، ރަށްތައް ދުނިޔެއާ ގުޅުވާލަދީ، ދުނިޔޭގެ ޗާޓުގައި ދިވެހިރާއްޖެއަށް ފަޚުރުވެރި ޖާގައެއް ހޯދައިދީފައިވާކަން ވަޒީރު ފާހަގަކުރެއްވިއެވެ.

މިއަދު މި ފާހަގަކުރެވެނީ މި ތާރީޚީ ދަތުރުގެ ބައިވެރިއަކަށްވި ކޮންމެ ފަރުދެއްގެ ޚިދުމަތް ކަމަށާއި، މި ޞިނާޢަތުގެ ކުރިމަގަށް ފުރިހަމަ އިތުބާރާއި ޔަޤީންކަން އޮތް ކަމަށް ވަޒީރު ވިދާޅުވިއެވެ.

On National Tourism Day, we celebrate 54 years of one of the Maldives’ greatest national achievements, building a world-renowned tourism industry from humble beginnings and transforming our island nation into a globally recognised destination.

Warmest wishes to President Dr.… pic.twitter.com/4bqnXLSq5E

— Mohamed Saeed (@em_saeed) October 3, 2026

ދިވެހިރާއްޖޭގެ ފަތުރުވެރިކަމުގެ ދުވަސް ފާހަގަކުރަނީ ކޮންމެ އަހަރެއްގެ ވެސް 3 އޮކްޓޫބަރު ގައެވެ. މި ދުވަސް ހާއްސަކުރެވިފައި ވަނީ 3 އޮކްޓޫބަރު 1972 ގައި ރާއްޖޭގެ ފުރަތަމަ ރިސޯޓު ކަމަށްވާ ކުރުނބާ ވިލެޖް (ކުރުނބާ މޯލްޑިވްސް) ހުޅުވި، ރާއްޖޭގެ ފަތުރުވެރިކަމުގެ ބިންގާ އެޅުނު ތާރީހީ މުނާސަބަތާ ގުޅުވައިގެންނެވެ.