އެމްޑީޕީގެ ރައީސްގެ މަގާމު އުވާލައި އެންމެ އިސް ފަރާތަކީ ޗެއާޕާސަން ކަމަށް ކަނޑައަޅައިފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރައީސާއި ނައިބު ރައީސްގެ މަގާމު އުވާލައި، ޕާޓީގެ އެންމެ އިސް މަގާމަކީ ޗެއާޕާސަންގެ މަގާމު ކަމުގައި ހަމަޖެއްސުމަށް އެ ޕާޓީގެ އަސާސީ ގަވާއިދަށް މުހިންމު އިސްލާހުތަކެއް ގެނެސްފިއެވެ.

މި ބަދަލުތައް ފާސްކޮށްފައިވަނީ މާލޭ ސިޓީ ކައުންސިލުގެ ހޯލުގައި މިހާރު ކުރިއަށްދާ އެމްޑީޕީގެ ހާއްސަ ކޮންގްރެސްގައެވެ.

މި އިސްލާހުތައް ކޮންގްރެސްއަށް ހުށަހެޅުއްވީ އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލެވެ. ފައްޔާޒް ހުށަހެޅުއްވި އިސްލާހުތަކުގެ ތެރޭގައި ޕާޓީގެ ލީޑާޝިޕަށް ބޮޑެތި ބަދަލުތަކެއް ގެނައުން ހިމެނެއެވެ. އެގޮތުން ޕާޓީގެ ރައީސާއި ނައިބު ރައީސްގެ މަގާމު އުވާލައި، އެންމެ އިސް މަގާމަކީ ޗެއާޕާސަން ކަމަށް ހަމަޖެއްސުމުގެ އިތުރުން، ޗެއާޕާސަނަށް އެހެން އެއްވެސް މަގާމެއް އަދާނުކުރެވޭ ގޮތަށް ވަނީ ކަނޑައަޅައިފައެވެ. އަދި މިހާރު އޮންނަ އިދާރީ އަދި މާލީ ނައިބު ޗެއާޕާސަންގެ އިތުރުން "ޗެއާޕާސަންގެ ނައިބު (ސިޔާސީ)" ގެ ނަމުގައި އައު މަގާމެއް އުފެއްދުމަށް ވެސް ވަނީ ފާސްކޮށްފައެވެ. މި އިސްލާހުތައް ފާސްވީ ކޮންގްރެސްގެ 546 މެންބަރުންގެ ވޯޓުންނެވެ.

މީގެ އިތުރުން، އެމްޑީޕީގެ ޓިކެޓުގައި ވާދަކުރާ ރިޔާސީ ކެންޑިޑޭޓަކު އަމަލުކުރަންޖެހޭ އުސޫލުތަކެއް ވެސް އަސާސީ ގަވާއިދަށް ވަނީ އިތުރުކޮށްފައެވެ. އެގޮތުން ރިޔާސީ ޕްރައިމަރީ ކާމިޔާބުކުރާ ފަރާތަށް ރިޔާސީ އިންތިހާބު ކާމިޔާބުވެއްޖެނަމަ، ސަރުކާރު އެކުލަވާލުމުގައާއި މުހިންމު ސިޔާސަތުތައް ތަންފީޒުކުރުމުގައި ގައުމީ މަޖިލީހުގެ ލަފައާއި މަޝްވަރާ ހޯދުމަށް އެއްބަސްވާ އެއްބަސްވުމެއްގައި ޕާޓީއާއެކު ސޮއިކުރުން ވަނީ ލާޒިމުކޮށްފައެވެ. އަދި ވެރިކަމުގައި ހުންނަވާ ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން އައްޔަންކުރުމާއި، ސަރުކާރުގެ ސިޔާސަތުތައް އެކުލަވާލުމުގައި ޕާޓީއާ މަޝްވަރާކުރުން ވެސް ހިމެނެއެވެ.

މީގެ ކުރިން ރައީސް މުހައްމަދު ނަޝީދުގެ ވެރިކަމުގައި، ވެރިކަމުގައި ހުންނަވާ ބޭފުޅަކަށް ޕްރައިމަރީއަކާ ނުލައި ރިޔާސީ ޓިކެޓު ލިބޭ ގޮތަށް އޮތް ނަމަވެސް، ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ދެވަނަ ދައުރަކަށް ކުރިމަތިލައްވަން ޖެހިވަޑައިގަތީ ޕްރައިމަރީއެއް ބާއްވައިގެންނެވެ.

ކޮންގްރެސްގައި ޕާލިމަންޓަރީ ގްރޫޕުގެ ލީޑަރު އިބްރާހިމް ނާޒިލް ވެސް ވަނީ މުހިންމު އިސްލާހެއް ހުށަހަޅުއްވައިފައެވެ. އެއީ އިންތިހާބުތަކަށް އިއުލާންކުރާނީ އިންތިހާބު ބާއްވާ ދުވަހުގެ ހަތަރު މަސް ކުރިން ކަމަށާއި، ވޯޓުލެވޭނީ ވޯޓުލާ ދުވަހުގެ ތިން މަސް ދުވަސް ކުރިން ޕާޓީގެ ދަފްތަރުގައި ރަޖިސްޓަރީވެފައިވާ މެންބަރުންނަށް ކަމަށް ކަނޑައެޅުމަށެވެ. މި އިސްލާހު ވެސް މެންބަރުންގެ އަގުލަބިއްޔަތުން ވަނީ ފާސްކޮށްފައެވެ.

މީގެ އިތުރުން ކުޑަހުވަދޫ ދާއިރާގެ ރައީސް ޝާތިރު އަބްދުއްރަހުމާން ހުށަހެޅުއްވި އިސްލާހުތަކުގެ ތެރެއިން، ކޮންގްރެސްގެ ބައިވެރިންގެ ނަންތައް ދިހަ ދުވަސް ކުރިން އިއުލާންކުރުމާއި، އިންތިހާބަކާ ނުލައި ގައުމީ މަޖިލީހަށް އައްޔަންކުރާ މެންބަރުންނަށް އިތުބާރު ނެތްކަމުގެ މައްސަލަތަކުގައި ވޯޓު ނުދެވޭ ގޮތް ހެދުމުގެ އިތުރުން، ގައުމީ މަޖިލީހަށް ކޮންމެ ރަށަކުން ވެސް އެއް މެންބަރަކު އިންތިހާބުކުރާ ގޮތަށް އޮތް އުސޫލު ދެމެހެއްޓުމަށް ހުށަހެޅި އިސްލާހުތައް ވަނީ ފާސްވެފައެވެ.