ބަހުސަށް ފުރުސަތު ނުލިބިގެން އަޑުގަދަކޮށް، އެމްޑީޕީގެ ކޮންގްރެސް ހޫނުވެއްޖެ

އެމްޑީޕީގެ ފަސްވަނަ ކޮންގްރެސްގެ ތެރެއިން ބަހުސްގައި ބައިވެރިވުމަށް އެދުނު ބައެއް މަންދޫބުންނަށް ފުރުސަތު ނުލިބުމާ ގުޅިގެން، ހިތްހަމަނުޖެހުން ފާޅުކޮށް އަޑުގަދަކުރުމުގެ ސަބަބުން ކޮންގްރެސްގެ މާހައުލު ވަރަށް ބޮޑަށް ހޫނުވެއްޖެއެވެ.

މާލޭ ސިޓީ ކައުންސިލްގެ އިދާރާގައި މިއަދު ކުރިއަށްދިޔަ މި ކޮންގްރެސްގެ ހެނދުނުގެ ދަންފަޅި ހާއްސަކުރެވުނީ ޕާޓީގެ އަސާސީ ގަވާއިދަށް ހުށަހެޅިފައިވާ އިސްލާހުތައް ހުށަހެޅުމަށާއި އެ ކަންކަމަށް ބަހުސްކުރުމަށެވެ. އަދި މެންދުރުފަހުގެ ސެޝަނުގައި ކުރިއަށްގެންދިޔައީ ސިޔާސަތުތަކާ ގުޅޭ ކަރުދާސްތައް ހުށަހެޅުމާއި، އެއަށް ބަހުސްކުރުމުގެ މަރުހަލާއެވެ.

މައްސަލަ ހޫނުވާން ދިމާވީ، ކަރުދާސްތަކަށް ވޯޓަށް އެހުމުގެ ވަގުތު ކައިރިވުމުން، އިސްލާހުތައް ހުށަހެޅުއްވި މެންބަރުންނަށް ރިޔާސަތުން ފަހު ފުރުސަތު ދެއްވި ހިސާބުންނެވެ. އެގޮތުން، އިންތިހާބުތަކުގައި އަންހެނުންނަށް ހާއްސަ ކޯޓާއެއް ނެތިވެސް ފިރިހެނުންނާ ވާދަކުރެވޭނެ ކަމަށް ވިދާޅުވެ މަނަދޫ ދާއިރާގެ ރައީސް މުހައްމަދު ތޯރިގު ދެއްކެވި ވާހަކަތަކަށް، އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ވަނީ ވަރުގަދަ ރައްދެއް ދެއްވާފައެވެ. ފައްޔާޒް ވިދާޅުވީ، އެމްޑީޕީގެ އެއްވެސް މެންބަރަކު ނެތް ރަށްރަށުގެ މީހުންނަށް ވެސް ގައުމީ މަޖިލީހުގެ މެންބަރުކަން ދޭން ހަމަހަމަކަމުގެ ނަމުގައި ވަކާލާތުކުރާ ބޭފުޅުންނަށް، އަންހެނުންނަށް ކުޑަ އިންސައްތައެއް ދޭން އެއްބަސްނުވެވުމަކީ ބަލައިގަނެވޭނެ ކަމެއް ނޫން ކަމަށެވެ.

ފައްޔާޒްގެ ވާހަކަފުޅަށްފަހު، އިތުރު ބަހުސަކަށް ފުރުސަތު ނުދެއްވައި ސީދާ ވޯޓަށް ދާން ރިޔާސަތުގައި އިންނެވި ކުރީގެ ރައީސް މުހައްމަދު ނަޝީދު ނިންމެވުމުން، ހޯލުގައި ތިއްބެވި ގިނަ އަދަދެއްގެ މެންބަރުން ވަނީ ތެދުވެ އަޑުގަދަކުރަން ފަށާފައެވެ. އަދި އެ ހުރިހާ ފަރާތްތަކަށް ވާހަކަދެއްކުމުގެ ފުރުސަތު ނުދީ ކޮންގްރެސް ނިންމައިނުލެވޭނެ ކަމަށް ބުނެ އަޑުއުފުލުމުން، މަސްރަހު ނުތަނަވަސްވެ ކޮންގްރެސް ކުރިއަށްގެންދިއުމަށް ބޮޑެތި ހުރަސްތަކެއް އެޅުނެވެ.

މެންބަރުންގެ ޝަކުވާތަކާ ގުޅިގެން ރިޔާސަތުން ރައީސް ނަޝީދު ވިދާޅުވީ، ކޮންގްރެސް ކުރިއަށް ގެންދަވަނީ ކަނޑައެޅިފައިވާ ގަވާއިދުތަކާ އެއްގޮތްވާ ގޮތުގެ މަތިން ކަމަށެވެ. އަދި ވާހަކަދެއްކުމުގެ ފުރުސަތު ދެނީ ވަކި ބަޔަކަށް ބެލުމެއް ނެތި، ނަން ނަގާ ގުރުއަތު (ކަރުދާސްކޮޅު ނަގައިގެން) އުސޫލުން ކަމަށްވެސް އެމަނިކުފާނު ފާހަގަކުރެއްވިއެވެ. މީގެއިތުރުން، އެދޭ ހުރިހާ މެންބަރުންނަށް ފުރުސަތު ނުލިބުނު ނަމަވެސް، ކަނޑައެޅިފައިވާ ވަގުތަށް ޖަލްސާ ނިންމަންޖެހޭނެ ކަމަށް ވިދާޅުވެ، ރައީސް ނަޝީދު ވަނީ އަސާސީ ގަވާއިދަށް ހުށަހެޅުނު އިސްލާހުތަކަށާއި ސިޔާސަތު ކަރުދާސްތަކަށް ވޯޓަށް އަހައިފައެވެ.