ބޭރުގެ އޮޕަރޭޓަރުންގެ އަތުން ޓީޖީއެސްޓީ ނެގުން 2027 އަށް ފަސްކުރަން ނިންމައިފި

ރާއްޖޭގައި ރަޖިސްޓްރީނުކޮށް ހިންގާ ބޭރުގެ ޓްރެވަލް އެޖެންސީތަކާއި، ޓުއާ އޮޕަރޭޓަރުން އަދި އޮންލައިން ބުކިންގް ޕްލެޓްފޯމްތަކުން 17 އިންސައްތައިގެ ޓޫރިޒަމް ގޫޑްސް އެންޑް ސާވިސަސް ޓެކްސް (ޓީޖީއެސްޓީ) ނަގަން ފެށުން 1 އޭޕްރީލް 2027 އާ ހަމައަށް ފަސްކުރުމަށް ސަރުކާރުން ނިންމައިފިއެވެ.

މިކަން ހާމަކުރެއްވީ ބާސެލޯ ނަސަންދުރާގައި ބޭއްވި 2026 ވަނަ އަހަރުގެ ޤައުމީ ފަތުރުވެރިކަމުގެ ދުވަހުގެ ރަސްމީ ޙަފްލާގައި ވާހަކަފުޅު ދައްކަވަމުން ޓޫރިޒަމް މިނިސްޓަރު މުޙައްމަދު އަމީނެވެ. މި ޙަފްލާގައި ސަރުކާރުގެ އިސްވެރިންނާއި ފަތުރުވެރިކަމުގެ ސިނާއަތުގެ ގިނަ އަދަދެއްގެ އިސް ބޭފުޅުން ބައިވެރިވެވަޑައިގެންނެވިއެވެ.

މިނިސްޓަރު އަމީން ވިދާޅުވީ، މި ހިނގާ މަހުން ފެށިގެން މި ޓެކްސް ނަގަން ޖެހޭ ގޮތަށް ގާނޫނު އިސްލާހުކުރުމާ ގުޅިގެން، ބޭރުގެ ޓުއާ އޮޕަރޭޓަރުންނާއި ދާއިރާގެ އިސް ފަރާތްތަކުން ކަންބޮޑުވުންތަކެއް ފާޅުކޮށްފައިވާ ކަމަށެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ އަބަދުވެސް ވިޔަފާރިތަކުގެ އަޑުއައްސަވައި، ދުރުވިސްނޭ ފުރިހަމަ ޕްލޭންތަކާއެކު ކަންކަން ނިންމަވާ ވެރިއަކަށް ވާތީ، މި ނިންމެވުން ނިންމެވީ އިންޑަސްޓްރީއަށް އެންމެ ފައިދާހުރި ގޮތަށް ބައްލަވާފައެވެ.

"މިކަމާގުޅިގެން އިންޑަސްޓްރީގެ އިސް ފަރާތްތަކުންނާއި ޓްރެވަލް އެޖެންޓުންގެ ވަރަށް ގިނަ ފަރާތްތަކުން ރައީސް ޑރ. މުހައްމަދު މުއިއްޒުގެ އަރިހަށް ވަރަށް ގިނަ ރިކުއެސްޓުތަކެއް ފޮނުއްވާފައި. މިވަގުތު ރައީސް ނިންމަވާފައިވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީގެ ގާނޫނަށް ވަރަށް އަވަހަށް ބަދަލުތަކެއް ގެނައުމަށް. އެހެންވީމާ މިވާހަކަ ތިޔަ ބޭފުޅުންގެ މައުލޫމާތަށްޓަކައި އަޅުގަނޑު ހަމަ މި ދަންނަވާލީ،"

 މިނިސްޓަރު ވިދާޅުވިއެވެ.

ދުނިޔޭގެ ކުރިއަރާފައިވާ އެހެން ގައުމުތަކުގައި ވެސް އަލަށް ތައާރަފުކުރާ ޓެކްސްތަކަށް ވިޔަފާރިތައް އަހުލުވެރިވެ ތައްޔާރުވުމަށް އެކަށީގެންވާ މުއްދަތެއް ދެއެވެ. ސަރުކާރުގެ މި ނިންމުމަކީ ޓެކްސް ދައްކާ ފަރާތްތަކަށް ކުރިމަތިވެދާނެ ދަތިތަކާއި ހުރަސްތައް ނައްތާލައި، ފަތުރުވެރިކަމުގެ ވިޔަފާރިތަކަށް ފަހި މާހައުލެއް ގާއިމުކޮށްދިނުމުގެ ގޮތުން ނިންމެވި ވިސްނުންތޫނު ނިންމެވުމެކެވެ.

ޓީޖީއެސްޓީ ނުވަތަ ޓޫރިޒަމް ގުޑްސް އެންޑް ސާވިސަސް ޓެކްސް އަކީ ރާއްޖޭގެ ފަތުރުވެރިކަމުގެ ދާއިރާގައި ހިމެނޭ ރިސޯޓުތަކާއި، ހޮޓާތަކާއި، ގެސްޓްހައުސްތަކާއި، ސަފާރީތަކުގެ އިތުރުން ފަތުރުވެރިންނަށް ދޭ އެކި ކަހަލަ ޚިދުމަތްތަކުން ނަގާ ޚާއްޞަ ޓެކްސެކެވެ. މި ޓެކްސް ރާއްޖޭގައި އެންމެ ފުރަތަމަ ނަގަން ފެށީ 2011 ވަނަ އަހަރުގެ ޖެނުއަރީ 1 ގައި، ކުރީގެ ރައީސް މުޙައްމަދު ނަޝީދުގެ ވެރިކަމުގައެވެ. އެއިރު މި ޓެކްސް ނަގަން ފެށީ 3.5 އިންސައްތައިގެ ރޭޓުން ކަމަށް ވިޔަސް، 2011 އޮކްޓޫބަރު 2 ގައި މުދަލާއި ޚިދުމަތުގެ ޓެކްސްގެ ޤާނޫނު (10/2011) ވުޖޫދަށް އައިސް، އެކި ދުވަސްވަރު ގެނެވުނު އިސްލާހުތަކާއެކު މިހާރު މި ޓެކްސްގެ ރޭޓު ވަނީ 17 އިންސައްތައަށް ބޮޑުކުރެވިފައެވެ.

މި އިސްލާހާއެކު، ރާއްޖޭގައި ދާއިމީ އޮފީހެއް ނުވަތަ ވިޔަފާރިއެއް ގާއިމުކޮށްފައި ނުވާ ބޭރުގެ ކުންފުނިތަކުން ވިއްކާ އެކޮމޮޑޭޝަން، ކާބޯތަކެތި، ދަތުރުފަތުރު އަދި ފަތުރުވެރިކަމާ ގުޅޭ އެހެނިހެން ޚިދުމަތްތަކުން 17 އިންސައްތައިގެ ޓީޖީއެސްޓީ ނެގުން ތަންފީޒުކުރަން ފަށާނީ 2027 ވަނަ އަހަރުގެ އޭޕްރީލް މަހުގެ އެއްވަނަ ދުވަހުން ފެށިގެންނެވެ. މީގެ ތެރޭގައި ބޭރުގެ ޓުއަރ އޮޕަރޭޓަރުންނާއި، ޓްރެވަލް އެޖެންޓުންގެ އިތުރުން އޮފްޝޯ ބުކިންގް ޕްލެޓްފޯމްތައް ހިމެނެއެވެ.

މި ބަދަލު ގެނައުމަށްޓަކައި ގާނޫނަށް ގެންނަންޖެހޭ އިސްލާހުތައް ވަރަށް އަވަހަށް ރައްޔިތުންގެ މަޖިލީހަށް ހުށަހަޅައިގެން ކުރިއަށް ގެންދާނެ ކަމަށް ޓޫރިޒަމް މިނިސްޓްރީން ވަނީ ހާމަކޮށްފައެވެ.