ދިވެހި ޖީޕީޓީން "ސީރަތު އަޑު" ނެގުމަށް ނިންމައިފި

ދިވެހި ޖީޕީޓީގެ ޓެކްސްޓް-ޓު-ސްޕީޗް ޚިދުމަތަށް ދާދިފަހުން ތަޢާރަފުކުރި "ސީރަތު އަޑު" (މަރުޙޫމް ހާޖަރާގޭ މުޙައްމަދު ތައުފީޤު ކީރިތި ރަސޫލާގެ ސީރަތު ޕްރޮގްރާމު ހުށަހަޅައިދިން އަޑު އަސްލަކަށް ބަލައިގެން ތައްޔާރުކުރެވުނު އަޑު) އެ ޕްލެޓްފޯމުން ނެގުމަށް ނިންމާފައިވާކަމަށް ޖަވާބު ޕްރައިވެޓް ލިމިޓެޑުން ވިދާޅުވެއްޖެއެވެ.

ޖަވާބު ޕްރައިވެޓް ލިމިޓެޑުން ވިދާޅުވީ، މިއަޑު ނެގުމަށް ނިންމީ، މި އަޑު ދިވެހި ޖީޕީޓީއަށް ގެނައުމަށްޓަކައި ހަމަޖައްސަންޖެހޭ ރަސްމީ ލައިސަންސްތައް ހޯދައި، އަޑު ނަހަމަ ގޮތުގައި ބޭނުންކުރުން ހުއްޓުވުމަށް ހަރުދަނާ ސަލާމަތީ ފިޔަވަޅުތަކެއް އަޅާފައިވީކަމުގައި ވިޔަސް، މި ޚިދުމަތާ ގުޅިގެން މަރުޙޫމްގެ ޢާއިލާގެ ކަންބޮޑުވުންތަކެއް ހުރިކަން ފާހަގަކުރެވިފައިވާތީ ކަމަށެވެ.

We removed the recently added “Seerath Voice” from DhivehiGPT following concerns from the late Mohamed Thaufeeq’s family. While the voice was officially licensed & safeguards were in place, we sincerely apologize for any distress caused. Ethical use of AI remains our priority. https://t.co/T3Mp3QxjGu

— DhivehiGPT (@DhivehiGPT) October 3, 2026

އޭ.އައި އަދި ވޮއިސް ކްލޯނިންގއާ ގުޅުންހުރި ކޮޕީރައިޓް މައްސަލަތަކަކީ ރާއްޖެއަށް އަދި މުޅި ދުނިޔެއަށް ވެސް މުޅިން އައު ޤާނޫނީ ސުވާލުތަކެއް އުފެދޭ މައްސަލަތަކަކަށް ވީއިރު، ޖަވާބު ޕްރައިވެޓް ލިމިޓެޑުން އަބަދުވެސް އިސްކަންދެނީ ޤާނޫނުގެ އިތުރަށް އެތިކަލީ ވެސް އެންމެ މަތީ މިންގަނޑުތައް ހިފެހެއްޓުމަށަ ކަމަށް އެ ކުންފުނިން ވަނީ ވިދާޅުވެފައެވެ.

މިކަމުގެ ސަބަބުން މަރުޙޫމްގެ ޢާއިލާއަށް ލިބުނު އެންމެހައި ހިތްނުތަނަވަސްކަމަށް ޓަކައި  ޖަވާބު ޕްރައިވެޓް ލިމިޓެޑުން ވަނީ މަޢާފަށް އެދިފައެވެ. ޢާއިލާގެ އިޙުސާސްތަކަށް ފުރިހަމައަށް އިޙުތިރާމްކުރުމުގެ ގޮތުން މި އަޑު މިހާރު ވާނީ ދިވެހިޖީޕީޓީން އުނިކުރެވިފައެވެ.

މިކަމުގައި އެންމެހައި ފަރާތްތަކުން ދެއްވާ އެއްބާރުލުމަށް ޖަވާބު ޕްރައިވެޓް ލިމިޓެޑުން ވަނީ ޝުކުރު ދަންނަވާފައެވެ.