އަމީނީ މަގުގެ ސެގްމަންޓް 1 އަދި 2 އާންމުންނަށް ހުޅުވާލައިފި

މާލޭގެ މަގުތައް ހެދުމުގެ މަޝްރޫޢުގެ ދަށުން، އަމީނީ މަގުގެ ސެގްމަންޓް 1 އަދި 2 ގެ މަސައްކަތް ނިންމައި މޯލްޑިވްސް ޓަރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީއިން އެ ސަރަހައްދު އާންމުންނަށް އައްޔެ ހުޅުވާލައިފިއެވެ.

އެމްޓީސީސީއިން ނެރުއްވި ޕްރެސް ރިލީޒެއްގައި ވިދާޅުވީ، ސެގްމަންޓް 1 ގެ ދަށުން ކުރި މަސައްކަތްތަކުގެ ތެރޭގައި ކުރިން އަޅާފައިވާ އެގްރިގޭޓް ބޭސް ކޯސް (އޭބީސީ) އަދި ތާރު ނެގުމަށްފަހު، 2,794.062 އަކަމީޓަރުގެ ސަރަހައްދެއްގައި ސަބްގްރޭޑް، ސަބްބޭސް، އޭބީސީ އަދި ތާރުއެޅުމުގެ މަސައްކަތް ހިމެނޭ ކަމަށެވެ. މީގެ އިތުރުން، އެ ސެގްމަންޓްގެ ދަށުން މަގުމަތީގެ ނިޝާންތައް ކުރެހުމުގެ މަސައްކަތް ވެސް ވަނީ ނިންމާލާފައި ކަމަށް އެ ކުންފުނިން ވިދާޅުވެއެވެ.

ސެގްމަންޓް 2 ގެ ދަށުން ކުރި މަސައްކަތްތަކުގެ ތެރޭގައި 133.64 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު، އަލުން އެ ސަރަހައްދުގައި އޭބީސީ އެޅުމާއި ތާރުއެޅުމުގެ މަސައްކަތް ހިމެނާ ކަމަށާއި،  ސެގްމަންޓް 1 އަދި 2 ގެ މަސައްކަތް ނިމުމާއެކު، މި މަޝްރޫޢުގެ ދަށުން ދެން ކުރުމަށް ހަމަޖެހިފައިވާ ބައިތަކުގެ މަސައްކަތްތައް ކުރިއަށްދާނެކަން އެމްޓީސީސީން ހާމަކުރެއްވިއެވެ.

މީގެ އިތުރުން އެމްޓީސީސީން ވިދާޅުވީ، އަމީނީމަގުގެ މި ދެ ސެގްމެންޓުގެ މަސައްކަތް ނިމި އެ ސަރަހައްދު ހުޅުވާލުމާއެކު، މި މަގު ބޭނުންކުރުމުގައި ކުރިން ހުރި ދަތިތައް ހައްލުވެ، މަގު ބޭނުންކުރާ ހުރިހާ ފަރާތްތަކަށްވެސް ވަރަށް ބޮޑު ލުއިފަސޭހަތަކެއް  ލިބިގެންދާނެކަމަށް އެ ކުންފުނިން ދެކޭ ކަމަށެވެ.

Segments 1 and 2 of Ameenee Magu are now officially open to the public following the completion of repair works. The road was thoroughly cleaned and cleared of all debris before opening, ensuring a safe and accessible route for road users while enhancing connectivity, accessibility, and the urban landscape of Malé. #TeamMTCC #MTCCProjects #AmeeneeMagu #RayyithungeKunfuni #GaumuBinaaKurumugaiMTCC #NationBuilding

— MTCC Plc (@MTCCPlc) October 3, 2026

މި މަޝްރޫއުގެ ދަށުން ދެން ކުރިއަށްދާނީ އިއްޒުއްދީން ހިނގުމުން ފެށިގެން ކޯރުކެނޑި ހިނގުމާއި ހަމަޔަށް ހިމެނޭ ސެގްމަންޓް 3 ގެ މަސައްކަތްތަކެވެ. މި މަސައްކަތުގެ ތެރޭގައި 1,924.77 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު އަލުން އޭބީސީއާއި ތާރު އެޅުމާއި އަދި މަގުމަތީގެ ނިޝާންތައް ކުރެހުމުގެ މަސައްކަތް ހިމެނެއެވެ.

މަޝްރޫއުގެ ސެގްމެންޓް 4ގައި ހިމެނެނީ ކޯރުކެނޑި ހިނގުމުން ފެށިގެން ޣިޔާޘުއްދީން އިންޓަނޭޝަނަލް ސުކޫލާއި ހަމަޔަށް ހިމެނޭ ސަރަހައްދެވެ. ސެގްމަންޓް 4 ގެ މަސައްކަތުގެ ތެރޭގައި، 1,148.91 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު އަލުން އޭބީސީއާއި ތާރު އެޅުމާއި އަދި މަގުމަތީގެ ނިޝާންތައް ކުރެހުމުގެ މަސައްކަތް ހިމެނެއެވެ.

އެމްޓީސީސީން ވަނީ ވޭތުވެދިޔަ 45 އަހަރުގެ ތެރޭގައި ރާއްޖޭގެ އެކި ކަންކޮޅުތަކުގައި އުމްރާނީ ތަރައްގީގެ ގިނަ މަޝްރޫއުތަކެއް ހިންގައި ކާމިޔާބުކަމާއެކު ނިންމާލާފައެވެ. އެ ކުންފުންޏަކީ، ރާއްޖޭގެ އުމްރާނީ ތަރައްގީގައި މުހިންމު ދައުރެއް އަދާކުރާ ކުންފުންޏެކެވެ.