ސޯލާ ޕީވީ ހަރުކުރާނެ ތަންތަން ދެނެގަތުމުގެ ސާވޭއެއް ފަށައިފި

ދިވެހިރާއްޖޭގެ ހަކަތައިގެ 33 އިންސައްތައަކީ އިއާދަކުރަނިވި ހަކަތައަށް ހެދުމަށް އަދުގެ ސަރުކާރުން ކަނޑައަޅުއްވާފައިވާ ލަނޑުދަނޑި ހާސިލުކުރުމުގެ ގޮތުން، ސޯލާ ޕީވީ ހަރުކުރުމަށް އެކަށީގެންވާ ތަންތަން ދެނެގަތުމަށް ޚާއްޞަ ސާވޭއެއް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ފަށައިފިއެވެ.

ހަކަތައާ ބެހޭ ވުޒާރާއިން ވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ހަކަތައިގެ 33 އިންސައްތައަކީ އިރުގެ އަލިންނާއި އެހެނިހެން ގުދުރަތީ ވަސީލަތްތަކުން އުފައްދާ ތިމާވެއްޓާ ރައްޓެހި ހަކަތައަށް ހެދުމަށް އަމާޒު ހިފާފައިކަން ފާހަގަކުރައްވާފައެވެ.

އަދި މި އަމާޒަށް ވާސިލުވުމުގެ މަސައްކަތް އަވަސްކުރުމުގެ ގޮތުން މިހާރު ވަނީ ސޯލާ ޕީވީ ނިޒާމުތައް ގާއިމުކުރެވިދާނެ ތަންތަން ދެނެގަތުމަށް ބޭނުންވާ ފުރަތަމަ މަރުހަލާގެ ސައިޓް ސާވޭތައް ކުރިއަށް ގެންގޮސްފައި ކަމަށް އެ ވުޒާރާއިން ހާމަކުރެއްވިއެވެ. 

މި ސާވޭގެ މައިގަނޑު ބޭނުމަކީ ރާއްޖޭގެ އެކި ސަރަޙައްދުތަކުގައި ސޯލާ ޕީވީ ހަރުކުރުމަށް އެންމެ އެކަށީގެންވާ ބިންތަކާއި، އިމާރާތްތަކުގެ ފުރާޅުތައް ފަދަ ތަންތަން ދެނެގަނެ، އެ ތަންތަނުގައި މަޝްރޫއުތައް ހިންގުމަށް ބޭނުންވާ ފަންނީ މައުލޫމާތު އެއްކުރުން ކަމަށް ވުޒާރާއިން ވިދާޅުވެއެވެ.

އަދި މިކަމުގެ ސަބަބުން އިއާދަކުރަނިވި ހަކަތަ ފުޅާދާއިރާއެއްގައި ތަރައްގީކުރުމަށް ކުރެވޭ މަސައްކަތްތަކަށް އިތުރު ހަލުވިކަމެއް ލިބިގެންދާނެކަން ވުޒާރާއިން ފާހަގަކުރައްވައެވެ.

An initial site survey was conducted to identify potential locations for solar PV development, supporting efforts to accelerate renewable energy deployment and achieve the Maldives’ target of 33% renewable energy by 2028. https://t.co/I7RCYnrt03

— Min. of Climate Change, Environment and Energy, MV (@MoEnvmv) October 3, 2026

ތެލަށް ބަރޯސާވާ މިންވަރު ކުޑަކޮށް، ދެމެހެއްޓެނިވި އަދި ތިމާވެއްޓާއި ރައްޓެހި ގޮތަކަށް ހަކަތަ އުފެއްދުމަކީ ރާއްޖޭގެ އިޤްތިޞާދަށާއި ތިމާވެއްޓަށް ބޮޑެތި ފައިދާތަކެއް ލިބިގެންދާނެ ކަމެއް ކަމަށާއި، ސަރުކާރުން ދަނީ މި ލަނދުދަނޑިތައް ހާސިލުކުރުމަށް ޓަކައި ކަމާގުޅުންހުރި އިދާރާތަކާ ގުޅިގެން މުހިންމު ފިޔަވަޅުތަކެއް އަޅަމުންކަން ވެސް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ފާހަގަކުރެއްވިއެވެ.