"މޯލްޑިވްސް އެކްސްޕޯ 2026" ރަސްމީކޮށް ލޯންޗުކޮށްފި

ދިވެހިރާއްޖޭގެ އިޤްތިޞާދު ސިންދަފާތުކޮށް، ދިވެހި އުފެއްދުންތެރިންނާއި ވިޔަފާރިތައް ކުރިއެރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ހަރުދަނާ ސިޔާސަތުގެ ދަށުން، މިދިޔަ އަހަރަށްވުރެ މާ ފުޅާ ދާއިރާއެއްގައި ބޭއްވުމަށް ހަމަޖެހިފައިވާ "މޯލްޑިވްސް އެކްސްޕޯ 2026" ނުވަތަ "ދިވެހީންގެ އުފެއްދުންތެރިކަމުގެ މައުރަޒު 2026" ރޭ ރަސްމީކޮށް ލޯންޗުކޮށްފިއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން އިންތިޒާމުކޮށް، ބިޒްނަސް ސެންޓަރ ކޯޕަރޭޝަން (ބީސީސީ) އިން އިމްޕްލިމެންޓްކުރާ މި މައުރަޒު ލޯންޗުކުރުމުގެ ޚާއްޞަ ހަފްލާ ރޭގައި ބާއްވާފައިވާއިރު، މި އިވެންޓާ ގުޅުވައިގެން ގިނަ ހަރަކާތްތަކެއް ވަނީ ކުރިއަށް ގެންގޮސްފައެވެ. އެގޮތުން އިއްޔެ ހަވީރު 4:00 އިން ފެށިގެން ރޭގަނޑު 11:00 އާ ހަމައަށް ހުޅުމާލެ ފޭސް 1 ގެ ބީޗް ސަރަޙައްދުގައި ކުޑަކުދިންނަށް ޚާއްޞަ ތަފާތު ކުޅިވަރުތަކާއި، މުނިފޫހިފިލުވުމުގެ ހަރަކާތްތަކުގެ އިތުރުން ކުދި ވިޔަފާރިތަކުގެ ކާބޯތަކެތި ވިއްކުން ކުރިއށް ގެންގޮސްފައިވެއެވެ.

މިދިޔަ އަހަރު ބޭއްވުނު "މޯލްޑިވްސް އެކްސްޕޯ 2025" ވެގެންދިޔައީ ރާއްޖޭގެ ތާރީޚުގައިވެސް އެންމެ ގިނަ އަދަދެއްގެ ދިވެހި ހުނަރުވެރިންނާއި ވިޔަފާރިތައް އެއް ފުރާޅެއްގެ ދަށުން ފެނިގެންދިޔަ އެންމެ ކާމިޔާބު އެއް މަންސައަށެވެ. އެ ކާމިޔާބީގެ މައްޗަށް ބިނާކޮށް، ރައީސް ޑރ. މުޢިއްޒުގެ ޒަޢާމަތުގައި މި އަހަރުގެ މައުރަޒު ބާއްވަން ނިންމާފައިވަނީ މާ ފުރިހަމަކޮށް އަދި އައު ބަދަލުތަކަކާ އެކުގައެވެ.

އެގޮތުން 2025 ވަނަ އަހަރުގެ އެކްސްޕޯ 5 ޑިސްޓްރިކްޓަކަށް ބަހާލައިގެން ކުރިއަށް ގެންދިޔަ ނަމަވެސް، މި ފަހަރުގެ އެކްސްޕޯ ޖުމްލަ 7 ޑިސްޓްރިކްޓަކަށް ވަނީ ފުޅާކޮށްފައެވެ. މީގެއިތުރުން، މި މައުރަޒުގައި މައިގަނޑު 6 ދާއިރާއެއް ހިމަނާފައިވެއެވެ. އޭގެ ތެރޭގައި ކްރިއޭޓިވް އިކޮނޮމީ، ޑިޖިޓަލް އެންޑް އިނޮވޭޝަން، އެންޓަޓެއިންމަންޓް، މާކެޓްޕްލޭސް، ވިޒިޓަރ އިކޮނޮމީ އަދި ބައިނަލްއަޤްވާމީ ފަރާތްތަކަށް ޚާއްޞަ އިންޓަރނޭޝަނަލް އެގްޒިބިޓާސް ހިމެނެއެވެ.

ހަމައެއާއެކު، ދީނީ ހޭލުންތެރިކަން އިތުރުކުރުމުގެ ކޮންޓެންޓް އުފައްދާ ފަރާތްތަކަށް ހިތްވަރު ދިނުމުގެ ގޮތުން ސަރުކާރުގެ އިސްނެންގެވުމަށް މިފަހަރު ވަނީ މުޅިން އައު ކެޓަގަރީއެއް ތަޢާރަފުކޮށްފައެވެ. އަދި ލާމަރުކަޒީ ނިޒާމު ހަރުދަނާކޮށް ރަށްރަށުގެ އުފެއްދުންތެރިކަން ދައްކާލުމަށް ރަށު ކައުންސިލްތަކަށް ވާދަކުރެވޭނެ ޚާއްޞަ ފުރުޞަތުތަކެއްވެސް ވަނީ ފަހިކޮށްދީފައެވެ.

ބީސީސީން މަޢުލޫމާތު ދެއްވާ ގޮތުގައި، މިދިޔަ އަހަރާ އަޅާބަލާއިރު މި އަހަރު މައުރަޒުގައި ބައިވެރިވާ ފަރާތްތަކުގެ އަދަދު ވަރަށް ބޮޑަށް އިތުރުވެފައިވެއެވެ. އަދި ހުރިހާ ޑިސްޓްރިކްޓްތަކެއް އެކުލެވޭހެން 1،000 އަށް ވުރެ ގިނަ ބާވަތުގެ އުފެއްދުންތެރިކަމާއި ފަންނުވެރިކަން އެއްތަނަކުން ފެނިގެންދާނެއެވެ.

ރާއްޖޭގެ އެކި ކަންކޮޅުތަކުގައި ތިބި އުފެއްދުންތެރިންނާއި ކުދި އަދި މެދުފަންތީގެ ވިޔަފާރިތަކަށް އިޤްތިޞާދީ ގޮތުން ބޮޑެތި ފުރުޞަތުތަކެއް ފަހިކޮށްދޭ މި ޤައުމީ ބޮޑު މައުރަޒު ބޭއްވުމަށް ހަމަޖެހިފައިވަނީ މިއަހަރުގެ އޮކްޓޫބަރު މަހުގެ 25 އިން ނޮވެމްބަރު މަހުގެ 2 ވަނަ ދުވަހުގެ ނިޔަލަށް، ހުޅުމާލޭ ސެންޓްރަލް ޕާކުގައެވެ. މިހާރު މި މައުރަޒަށް ތަކެތި ބަލައިގަތުމާއި އިންސާފުކުރުމުގެ މަރުޙަލާތައް ފެށިގެން ކުރިއަށްދާ ކަމަށްވެސް އެ ކޯޕަރޭޝަނުން ވިދާޅުވެއެވެ.