ކާބޯތަކެތީގެ ރައްކާތެރިކަން ކަށަވަރުކުރުމަށް ޚާއްޞަ ތަމްރީނު ޕްރޮގްރާމްތަކެއް ކުރިއަށް ގެންގޮސްފި

ފެލިވަރު ފިޝަރީޒް ކޮމްޕްލެކްސްގައި ކާބޯތަކެތީގެ ރައްކާތެރިކަމާއި ފެންވަރު ދެމެހެއްޓުމަށް، ޚާއްޞަ ތަމްރީނު ޕްރޮގްރާމްތަކެއް ކާމިޔާބުކަމާއެކު ކުރިއަށް ގެންގޮސްފިއެވެ.

މިފްކޯއިން ވިދާޅުވީ، މި ޕްރޮގްރާމްތަކުގެ ތެރޭގައި އެޗް.އޭ.ސީ.ސީ.ޕީ (HACCP)، ޓީ.އޭ.ސީ.ސީ.ޕީ (TACCP)، ވީ.އޭ.ސީ.ސީ.ޕީ (VACCP) އަދި އިންޓާނަލް އޮޑިޓަރ ޓްރެއިނިންގ ހިމެނޭ ކަމަށެވެ.

މިއީ ކާބޯތަކެތީގެ ރައްކާތެރިކަމާއި، ފެންވަރު ކަށަވަރުކުރުމުގެ އެންމެ މަތީ މިންގަނޑުތައް ހިފެހެއްޓުމުގެ މަޤްޞަދުގައި ކުރިއަށް ގެންދެވުނު ސެޝަންތަކެއްކަން މިފްކޯއިން ވަނީ ހާމަކޮށްފައެވެ.

މި ތަމްރީނުތަކުގެ ސަބަބުން އުފެއްދުންތެރިކަމުގެ ހުރިހާ މަރުޙަލާއެއް ފުރިހަމަކަމާއެކު ކުރިއަށްގެންދިއުމަށާއި، ނުރައްކާތައް މެނޭޖްކުރުމާއި، މިންގަނޑުތަކަށް ޢަމަލުކުރުމާއި، ހަރުދަނާ އޮޑިޓިންގ އުސޫލުތަކަށް އަހުލުވެރިވުމުގެ ޤާބިލުކަން މުވައްޒަފުންގެ ކިބައިގައި ވަނީ އިތުރުވެގެން ގޮސްފައި ކަމަށް މިފްކޯއިން ވިދާޅުވިއެވެ.

ދުނިޔޭގެ ޞިނާޢީ މިންގަނޑުތަކާއި ފެންވަރު ރަނގަޅު މަސްވެރިކަމުގެ އުސޫލުތައް ދެމެހެއްޓުމަށް ޓަކައި މި ޕްރޮގްރާމްގެ ބައިވެރިންނާއި ޓްރެއިނަރުން ދެއްވި އަހައްމިއްޔަތުކަމަށް ޓަކައި އެ ފަރާތްތަކަށް މިފްކޯއިން ވަނީ ޝުކުރު އަދާކޮށްފައެވެ.

Felivaru Fisheries Complex successfully conducts HACCP, TACCP, VACCP, and Internal Auditor training! This program equips our team to maintain the highest global standards in food safety, product defense, and quality assurance across all operations. #MIFCO #FelivaruFisheries https://t.co/RvyXuVP026

— MIFCO (@mifcomv) October 4, 2026

ފެލިވަރު ވެފައިވަނީ ދިވެހި މަސްވެރިން ބާނާ ކަނޑުމަސް ގަނެ، ޕްރޮސެސްކޮށް ބައިނަލްއަޤްވާމީ ބާޒާރަށާއި ރާއްޖޭގެ އެތެރޭގެ ބާޒާރަށް ނެރޭ މައިގަނޑު މަރުކަޒަށެވެ. މިފްކޯގެ ބެލުމުގެ ދަށުން ފެލިވަރު ހިންގަމުން އަންނައިރު އެއީ، މަސް ގަނެ ފިނިކޮށް ރައްކާކުރުމާއި މަސްދަޅު އުފެއްދުމުގެ އިތުރުން، ގިނަ އަދަދެއްގެ ދިވެހިންނަށް ވަޒީފާގެ ފުރުޞަތު ފަހިކޮށްދީފައިވާ ރާއްޖޭގެ މަސްވެރިކަމު ސިނާއަތުގެ މުހިންމު ބައިވެރިއެކެވެ.