އިންވެސްޓަރުން 'ފިލައިފި'، ކޮންގްރެސް 'ގޮވައިފި': ދެ ބުޅަލުގެ ކޯޅުން. އެނިމަލް ފާމް އަލުން ސްކްރީނަށް!

ސިޔާސީ ޕާޓީއެއްގެ ގައުމީ ކޮންގްރެސްއަކީ ޕާޓީގެ ކުރިމަގުގެ ސިޔާސަތުތައް ބައްޓަންކޮށް، ގައުމަށް ފައިދާހުރި ތަރައްގީގެ މަގުޗާޓެއް އެކުލަވާލައި، އައު ޖޯޝަކާއެކު އާންމު މެންބަރުންނަށް އުންމީދުތަކެއް ގެނެސްދޭން ބާއްވާ ވަރަށް މާތް އަދި ސީރިއަސް ހަރަކާތެކެވެ. ނަމަވެސް، ދާދިފަހުން ނިމިގެންދިޔަ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސްއިން ފެނިގެންދިޔައީ މި ދެންނެވި އަސާސްތަކާ މުޅިން ޚިލާފު، އަގުހެޔޮ ޑްރާމާއާއި ފިލްމީ މަންޒަރުތަކެއް ފަދަ ހެއްވާ މަޖާ ބޮޑު ހާޖާނެކެވެ. ސުވާލަކީ މިއީ ހަގީގަތުގައިވެސް ސިޔާސީ ކޮންގްރެސްއެއް ހެއްޔެވެ؟ ނުވަތަ ރައްޔިތުންނަށް ދެއްކި ފެންވަރު ދަށް ކޮމެޑީ ޝޯއެއް ހެއްޔެވެ؟

ކޮންގްރެސްގެ ފެށުންވެސް ދިޔައީ ބަލާ މީހުން ހައިރާންވާ ފަދަ މަޖާ ގޮތަކަށެވެ. ސިޔާސީ ބަހުސްތަކަކަށް ތައްޔާރުވުމުގެ ބަދަލުގައި، ފެށުމުގެ ގޮތުން ފެނިގެންދިޔައީ އަންހެނުންގެ ބޮޑު ގްރޫޕެއް ގެނެސް ބޮޑުބެރު ޖަހައި، ލަވަކިޔައި ނެށުމުގެ ފޯރިގަދަ ހަރަކާތްތަކެކެވެ. މުޅި މާހައުލު ސިފަވެގެން ދިޔައީ ގައުމީ ކަންކަމާ މެދު ވިސްނާ ބައެއްގެ ބައްދަލުވުމެއްގެ ގޮތުގައެއް ނޫނެވެ؛ އޭގެ ބަދަލުގައި ހީވީ ދައްކާނެ ވާހަކައެއް އަދި ރައްޔިތުންނަށް ވިއްކާނެ މާނަހުރި ޕްލޭނެއް ނެތިގެން ވަގުތު ބޭކާރުކޮށްލަން މުނިފޫހިފިލުވި ހަފުލާއެއް ހެންނެވެ. މި މަޖާގަނޑަށްފަހު، ހަމަޖެހުމާއި ތަރުތީބުގެ ބަދަލުގައި މުޅި ހޯލު ބަދަލުވީ މުޒާހަރާއެއްގެ މައިދާނަށެވެ. ވެރިކަމުގެ ދަހިވެތިކަމުގައި ފެންބޮވައިގެންފައި ތިބި ބަޔަކު، ހަދާނެ ނަހަދާނެ ގޮތެއް ނޭނގި، ވެރިކަމުގައި ހުންނެވި ބޭފުޅާ އިސްތިއުފާއަށް ގޮވަމުންދިޔައިރު، ޑިމޮކްރަސީގެ ރިވެތި އުސޫލުތައް އެއްލައިލީ ކުނިވަށިގަނޑަށެވެ.

މި ކޮންގްރެސްގެ އެންމެ ބޮޑު އެއް ޖޯކަކަށް ވެގެންދިޔައީ އެމްޑީޕީގެ ޗެއާޕާސަން ދެއްކެވި "އިންވެސްޓަރުން" ގެ ވާހަކައެވެ. ރަށްރަށަށް ތަރައްގީ ގެނެސްދޭނެ ބޭރުގެ ބޮޑެތި އިންވެސްޓަރުން ކޮންގްރެސް ހޯލުގައި ތިބޭނެ ކަމަށް ބުނެ ސަޕޯޓަރުން ގެނައި ނަމަވެސް، އެތަނުން ފެނުނު ހަމައެކަނި "އިންވެސްޓަރަކީ" ފަޅަށް ހުރި ހުސް ގޮނޑިތަކެވެ. އެންމެ ފަހުން މި ދޮގު ފަޅާއަރައި ވާނުވާ ނޭނގުމުން، 2028 ގައި އިންވެސްޓަރުން ލިބޭނެ ކަމަށް ބުނެ ދެއްކީ ކުޑަކުދިން ނިންދަވަން ކިޔައިދޭ ކަހަލަ ފެއަރީޓޭލް ވާހަކައެކެވެ. މިއީ ސިޔާސީ ގޮތުން މީހުން ހެއްވުމަށް ދެއްކި، ވާހަކައެކެވެ. އަނެއްކާވެސް " ރައްޔިތުން ގުބޯ ހައްދާ، "ތެޔޮ ލައްވާލީއެވެ".

އެއްވެސް ސާފު ޕްލޭނެއް އަދި ގައުމީ މަގުޗާޓެއް ނެތި ކުރިއަށްދިޔަ މި ހަރަކާތް ބަދަލުވެގެން ދިޔައީ ދެ ލީޑަރެއްގެ ޒާތީ އަރާރުމާއި މަސްލަހަތަށްޓަކައި ޕާޓީގެ ގަވާއިދުތައް ގުރުބާންކުރި މައިދާނަކަށެވެ. ޕާޓީގެ އެންމެހައި ބާރުތައް އެކެއްގެ މުށުތެރެއަށް ލައި، މުޅި ޕާޓީ އަންބޮނޑިއަށް ޖަހަން ކުރި މަސައްކަތް ވަރަށް ސާފުކޮށް ފެނިގެންދިޔައިރު، ވާހަކަދެއްކުމުގެ ފުރުސަތު ދިނީ ވެރިން ރުހޭ މަދު ބަޔަކަށެވެ. މި މަންޒަރުން ހަނދާނަށް އަންނަނީ ޖޯޖް އޯވެލްގެ މަޝްހޫރު "އެނިމަލް ފާމް" އެވެ. އެނިމަލް ފާމްގައިވެސް ބުނެއެވެ. "ހުރިހާ އެންމެންނަކީ ހަމަހަމަ ބައެކެވެ، ނަމަވެސް ބައެއް މީހުން މާ ބޮޑަށް ހަމަހަމައެވެ." މި އުސޫލުން އެމްޑީޕީގެ ލީޑާޝިޕުން އަމިއްލަ ނަފްސަކީ މާ މާތް ބައެއްގެ ގޮތުގައި ދައްކައި، އާންމު މެންބަރުންނަކީ ނިކަމެތި، ހަމައެކަނި އަތްޖަހަން ތިބި ބައެއްގެ ގޮތުގައި ހަދައިލިއެވެ.

މީގެ އިތުރުން، ލީޑަރުންގެ ފުށުއަރާ ވާހަކަތަކުން މުޅި މަސްރަހު އިތުރަށް ހަޑިވެގެން ދިޔައެވެ. މީގެ ކުރިން ދުވަހަކުވެސް ވެރިކަން ބޭނުންފުޅު ނޫން ކަމަށް ވިދާޅުވި ރައީސް މުހައްމަދު ނަޝީދު، އެންމެ ފަހު ވަގުތު ވިދާޅުވީ މިހާރުވެސް ވެރިކަމާ ހަވާލުވާން ތައްޔާރު ކަމަށެވެ. ދިވެހި ރައްޔިތުން ތަބަކަށް ލާފައި ވެރިކަން ދިނުމުންވެސް އެކަން ކުރަން ނޭނގުނު ބޭފުޅަކު އަނެއްކާވެސް ވެރިކަމަށް ދަހިވެތިވުމަކީ މަޖާ ކަމެކެވެ. ކޮންގްރެސްގެ ތެރެއިން ފެނުނީ ރައީސް ނަޝީދާއި ރައީސް އިބްރާހިމް މުހައްމަދު ސޯލިހު އެކަކު އަނެކަކަށް ހޫނު ރައްދުތައް ދެއްވައި، ގޮނޑިތަކަށް ތަޅާފޮޅި ހަޑިމުޑުދާރު މަންޒަރެވެ. ހަމައެއާއެކު ޕާޓީގެ ރިޔާސީ ކްނޑިިޑޭޓް ކަމަށް ބުނާ ފައްޔާޒު ދިޔައީ އާންމު މެމްބަރުންނަށް ވަރަށް ހަދި ކޮށް ރައްދު ދެއްވަމުންނެވެ. އަދި 1000 މަންދޫބުން ބައިވެރިވި ކަމަށް ބުނެ ހެދި ދޮގު ފަޅާއެރީ ވޯޓު ގަޑީގައި 600 މީހުންވެސް ހަމަނުވުމުންނެވެ.

އުފެދޭ އެންމެ ބޮޑު ސުވާލަކީ މިއެވެ؛ އެތެރޭގެ ކޮންގްރެސްއަކަށް ހާޒިރުވި 600 އެއްހާ މީހުން ކޮންޓްރޯލް ނުކުރެވި، އަމިއްލަ ޕާޓީގެ ކޮންގްރެސް ކުރިއަށް ދިޔަ ހޯލު ތެރޭގައި ތަޅާފޮޅުމާއި އަރާރުން އުފެއްދި ލީޑަޝިޕަކަށް، 4 ލައްކައަށް ވުރެ ބޮޑު އާބާދީއެއް އޮތް މި ދިވެހި ގައުމު ހިންގޭނީ ކިހިނަކުން ހެއްޔެވެ؟ ހަގީގަތުގައި މި ކޮންގްރެސް ވެގެންދިޔައީ އިންވެސްޓަރުން 'ފިލައި'، ޕާޓީގެ އަސާސްތައް އަތަށް 'ގޮވައި'، އަދި ދެ ލީޑަރުންގެ އަރާރުމުގެ ތެރެއިން 'އެނިމަލް ފާމް' ގެ ހަގީގަތް ދިވެހިންގެ ލޯމައްޗަށް އަލުން ތިލަވެގެންދިޔަ ހިތި، ނަމަވެސް ބޮޑު ޖޯކަކަށެވެ.