ށ. ޅައިމަގާއި މަރޮށީގައި ލެބޯޓަރީގެ ހިދުމަތްދޭން ފަށައިފި

ށ. ޅައިމަގާއި ށ. މަރޮށީގައި ލެބޯޓަރީގެ ހިދުމަތްދޭން ފަށައިފިއެވެ. 

މި ދެ ރަށުގައި އެ ޚިދުމަތް ފަށްޓަވައިދެއްވީ، އެ ދެ ރަށުގައި ވަކިވަކިން ބޭއްވެވި ރަސްމިއްޔާތުތަކުގައި، ސިއްހަތާއި އާއިލާ އާއި އިޖްތިމާއީ އެހީއާ ބެހޭ ވަޒީރު ގީލާ އަލީއެވެ.

އެގޮތުން، މަރޮށީގައި ބޭއްވެވި ހާއްސަ ރަސްމިއްޔާތުގައި ވަނީ މަރޮށީ ޞިއްޙީ މަރުކަޒުގައި ލެބޯޓަރީގެ ޚިދުމަތް ފެށުމުގެ އިތުރުން، އެ ރަށުގެ ޞިއްޙީ މަރުކަޒުން ދެމުންދާ ޚިދުމަތް 24 ގަޑިއިރަށް ބަދަލުކޮށްފައެވެ.

މި ރަސްމިއްޔާތަށްފަހު ވަޒީރު ވަނީ، މަރޮށި ސިއްހީ މަރުކަޒުގެ އިސްވެރިން އަދި މުވައްޒަފުންނާ ބައްދަލުކުރައްވާ، ސިއްހީ ޚިދުމަތް ދިނުމަށް ދިމާވާ ގޮންޖެހުންތައް އޮޅުންފިލުވާ، ޚިދުމަތް އިތުރަށް ފުރިހަމަ ކުރެވޭނެ ގޮތްތަކާ ބެހޭ ގޮތުން މަޝްވަރާ ކުރައްވާފައެވެ.

މަރޮށީގައި ވާހަކަދައްކަވަމުން ގީލާ ވަނީ މި އައު ލެބޯޓަރީއާއެކު، އެ ތަނުން ދޭ ހިދުމަތް 24 ގަޑިއިރަށް ބަދަލުވެފައިވާ ކަމާއި، މިއީ ލިބުނު ވަރަށް ބޮޑު ކާމިޔާބީއެއް ކަމަށް ވިދާޅުވެފައެވެ. ލެބޯޓަރީގެ ހިދުމަތް ފެށިގެން ދިޔުމުން ޓެސްޓުތައް ހެދުމަށް އެހެން ރަށްރަށަށް ދަތުރުކުރަން ޖެހުން ނިމުމަކަށް އަންނާނެ ކަމަށް ވެސް ވަޒީރު ވަނީ ވިދާޅުވެފައެވެ.

ށ.މަރޮށީ ޞިއްޙީ މަރުކަޒުގައި ލެބޯޓަރީ ގެ ޚިދުމަތް ފެށުމަށާއި، އެ ރަށުގެ ޞިއްޙީ މަރުކަޒުން ދެމުންދާ ޚިދުމަތް 24 ގަޑިއިރަށް ބަދަލުކުރުމަށް ބޭއްވި ޚާއްސަ ރަސްމިިއްޔާތުގެ ތެރެެއިން https://t.co/Jg2DDDWEKc

— Ministry of Health, Family and Welfare (@MoHmv) October 3, 2026

ޅައިމަގުގައި ލެބޯޓްރީގެ ހިދުމަތް ފައްޓަވާދެއްވުމަށްފަހު ވެސް ވަޒީރު ވަނީ، އެ ރަށުގެ ޞިއްޙީ މަރުކަޒުގެ އިސްވެރިން އަދި މުވައްޒަފުންނާ ބައްދަލުކުރައްވާ، ޞިއްޙީ ޚިދުމަތް ދިނުމަށް ދިމާވާ ގޮންޖެހުންތައް އޮޅުންފިލުވާ، ޚިދުމަތް އިތުރަށް ފުރިހަމަ ކުރެވޭނެ ގޮތްތަކާ ބެހޭ ގޮތުން މަޝްވަރާ ކުރައްވާފައެވެ.

ޅައިމަގުގައި އޮތް ރަސްމިއްޔާތުގައި ވަޒީރު ވަނީ ސިއްހީ މަރުކަޒުގެ އައު އިމާރާތާއެކު، އެ ތަނުން ދިވިގެންދާ ހިދުމަތް 16 ގަޑިއިރަށް ބަދަލުވާނެ ކަމަށެވެ. އަދި އައު އިމާރާތުގައި ހަތަރު އެނދާއި ލެބޯޓަރީ އާއި އެހެނިހެން ވަސީލަތްތައް ހިމަނާނެ ކަމަށް ވަޒީރު ވިދާޅުވިއެވެ.

ށ.ޅައިމަގު ޞިއްޙީ މަރުކަޒުގައި ލެބޯޓަރީގެ ޚިދުމަތް އިފްތިތާހުކުރުމަށް ބޭއްވި ޚާއްސަ ރަސްމިިއްޔާތުގެ ތެރެެއިން https://t.co/Z8QXlOB2zY

— Ministry of Health, Family and Welfare (@MoHmv) October 3, 2026